قصة ولادتي بالتفصيل في مستشفى الاحساء العام

[دانو]

مرحبا بنات حوامل وامهات

كنت اتابعكم طول فترة حملي بس بدون تسجيل , وبعد ماولدت حبيت اكتب قصة ولادتي , وبعد اقتراح من زميلة لي منتدى ثاني "ام الشيخ محمد الصالح " اشتركت في هذا المنتدى الرائع واللي استفدت منه وحابة افيد فيه خواتي الحوامل ..


تابعت حملي في مستوصف النسائي اللي بشارع النجاح د. رجاء هي صدق تختصر وماتعطي اهتمام كثير , بس هي في السونار بتحديد جنس الجنين وموعد الولادة ممتازة .
رحت لها بداية من الاسبوع 20 وسوت لي سونار وحددت لي عليه موعد ولادتي 30 اغسطس وان جنس الجنين ولد .. ووثقت في كلامها وجهزت للبيبي على اساس كلامها ورتبت نفسي على الموعد اللي عطتني اياه ..

تحيرت في حملي للولادة بين مستشفى الموسى ومستشفى الاحساء انا جربت الموسى في ولادتين لي , وكان رووعه من ناحية الخدمات الطبية والمراعاة خبرتهم كانت عاليه , بس هالمره قلت بغير واجرب الاحساء وسألت عنه في المنتديات وماشفت تجارب حقيقية كثير , لان اللي يكتفون ويكتبون روووعه اعرف انهم متمصلحين من الدعاية . ومع هذا رحت يوم للطوارئ على شان اشوف الطبيبه المشرفة على التوليد وسألتها عن كل شيئ وهي د هيام المصريه نفسها اللي ولدتني

بس للاسف طلع كل كلامها كذب وماشفت شيئ من اللي سألتها عنه , اللي اكتشفته بعدين انها طماعه وكان هدفها مادي ومايهمها ابد هالمراجع اللي تتعامل معاه ..

صحيت يوم الثلاثاء بتاريخ 31 اغسطس يعني بعد موعدي بيوم من كثر الماي اللي نزل علي , وكان في الام طلق بارد يعني متباعد بس لاني كنت مكملة التاسع فتوقعت ان الام الطلق بتتسارع وخفت رحت المستشفى الاحساء على طول


يعني دخلت المستشفى الساعه 11 الصباح , جات الطبيبة المصرية هيام وكشفت وقالت مفتوح واحد ونص وركبت علي جهاز التخطيط لمدة ساعة وقالت خلاص تنييم بنخليك 24 ساعة اذا ماجت ولادة طبيعية بنركب تحميلة الطلق الصناعي ونولدك , ودوني غرفة التنييم اللي هي نفسها غرفة التوليد , وركبوا علي جهاز التخطيط
والطلق كل ماله ويروح يعني مافي طلق , وانا مت خوف من الطلق الصناعي , وجلست في الغرفة طول اليوم وانا اسمع صراخ النساء في الغرف المجاورة يطلقون ويولدون وانا مكاني واسمع تبريكات اهاليهم وازواجهم واحاتي نفسي

بصراحة حسيت باهمالهم لي الطبيبة كلش ماتجي ولاتمر , واذا ناديت قالو السسترات انها مشغولة في التوليد , يعني المفروض يعطوني اي شيئ محرض في المغذي على الطلق , عاد جات الساعة 3 الفجر وطقيت من الزهق , وناديتها وقلت للسستر ابي حقنة لتنظيف الامعاء طبعا ماكان عندهم وقامت السستر تكذب وتقول انها خطره وان هم مايعطونها , هنا بديت احس انهم بدائيين , معقولة مايعرفون ان الحامل تحتاج تفريغ الامعاء والمثانه على شان الطلق , طبعا تهربت , مع اني كنت الح عليهم وبعدها جات السستر ركبت في المغذي مضاد يفك الماي , ومن بعدها بدا الطلق يحمى ويتتابع

جات د هيام وكشفت على الساعة 4 وتقول انفتح 4 قلت لها ابي مسكن , فقالت لنيرس عطيها ابرة مسكن في الفخذ , وعطتني ابرة المفروض انها تجيب النوم , بس ابد ماقدرت انام لان الام الطلق بدت تشتد وتتابع
ولما صارت الساعه 6 جات كشفت ومافتح الا 5 سانتي , وقلت ابي كمام بنج لان

الالم صار فضيع ومو قادرة اتحمله , وانصدم من النيرس انهم مايعطونها الا اذا انفتح 8 سانتي , واعصب عليهم ليه يكذبون مع ان اكثر اسئلتي للدكتورة كانت عن البنج وضحكت علي قالت نعطي ابرة مهدئة للالم , وطلع كله دعاية
واللي زيد علي الالم هو احتباس البول وانتم بكرامة انبح صوتي وانا اطلب قسطرة

طلع هم ماعندهم يحطون هوز وصحن وماينزل شيئ فيضحكون علي ويقولون مافي شيئ وانا احس ان المثانة بتنفجر من الامتلاء والام الطلق تجي متضاعفة من الاحتباس والله انقهرت حييل وصرت اصرخ من الالم لاكمامة بنج ولا قسطرة بول

الالام فضيعه وصرت اتالم واصارخ من قو الالم , وربي حسيت اني بكر حتى اسلاك المغذي تقطعت مو قادرة استحمل الالم وصرت الح عليهم ابي كمام البنج
بعد الالحاح جابوه لي ومايمداني اشم هوا وارتاح اشوي من الالم الا تجي هالهنديه وتقفله وش هالبخل حسبي الله عليهم , وتجي تتحجج الهندية ان نبض الجنين يضعف
وتسحبه مني .....وانا بس ابيها دقايق تريحني على الاقل دقايق وانام اشوي من شدة الالم ..


يتبع

برجع اكمل الموضوع