تفاصيل حملي و ولادتي ~ مع صورة الحلوة ^^

Ŏ₥ ђĂłẩ · 06-21-2011, 09:52 PM

حبيت اكتب قصة حملي ولادتي اللي صارت قبل سنتين و نص ,, طبعا راح أطول شوي ^^ ...

حملت بعد 3 أشهر من الزواج ,, مضى اول 4 أشهر من الحمل كأنهم 4 سنوات ,, كان اصعب شي بهالشهور وجع راسي كنت كل يوم أشرب 4 حبات بنادول اكسترا ,, ولوعة المعدة القوية أخ منها جد قرف > عكس حملي هذا < ...

المهم بالرابع بينعرف جنس البيبي ,, و اهلي واهل زوجي كانو حابين يعرفو شو اللي في بطني ,, لانو اول حفيد للجهتين ,, يعني اللي بخليهم اجداد ...

سافرنا عالاردن للترفيه ,, و من هناك رحت عدكتور استشاري للحمل ,, و سألني شو حابين يكون جنس البيبي قلناله اللي من الله حياه الله ,, وقالي مبرووك اللي معك ولد ...

رحت عالمول اشتري ملابس للبيبي وانا احساسي انو اللي ببطني بنووتة ...

كل شي اشتريته كان لونهم وردي الا لبستين بس ولادي ^^ ...

رجعنا من السفر بعد ما قعدنا شهر هناك ,, و بس خلصت الشهر الخامس رحت على دكتورتي اطمئن عالبيبي بس المفاجئة انها قالتلي البنوتة بخيير

...

بالشهور الوسطى كنت مرتاحة بالحمل > فرق عن اول الأشهر< و ما كان شي مزعجني الا حرقة بسيطة أطفيها بالحليب البارد ,, ومضت هالأشهر و أنا أقضي لبنوتتي الحلوة و أشتريلها و أختار بأسامي تعجبني و تعجب زوجي ...

أما بالشهور الأخيرة كبر بطني و بين و ما كان شي مضايقني غير راس البيبي لانو كان فوق > تحت القفص الصدري < و ما نزلت الا باخر شهر ...

باخر الشهر التاسع رحت عند دكتورتي بعد ما كانت محددتلي انه بهاليوم في فحص داخلي > كنت خاااااااااايفة من الوجع < بس تطمنت عالبيبي سوت الفحص > دكتورتي دبدوبة و أنا كنت خايفة فتوجعت كثيير < قالتلي مفتوح نص سانتي بعد اسبوع تعالي و فحصت بطني بايدها و قالتلي بيجي البيبي

3 و نص وبهذا الوزن بتحتاجي جرح وخياطة ...

بعد اسبوع الا يوم بيوم الاحد بالضبط ,, صحيت من النوم الساعة 8 الصبح > مش من عادتي أصحى اقل من الساعة 12 الظهر < لاني كنت متضايقة وكنت أحس بوجع بسيييط جدا ببطني .. توقعت انه يكون من التعب لانه قبلها بيوم نظفت البيت بشكل كااااااامل ...

المهم مضى اليوم وانا أحس بوجع بسيط أقوى شوي من الصبح و كل مرة الاحظ انو يقترب ,, يعني بالصبح كان كل نص ساعة و مرات ربع ساعة بس مش منتظم ,, أما بالليل صار اقرب كل 10 دقايق تقريبا ,, مرة يقرب و مرة يتأخر وصارت الساعة 10 بالليل وأنا مش عارفة انه طلق ...

بس اجا زوجي قلتله عن الوجع صار يحسب معي ,, و لاحظت انا وياه انه صار ينتظم يعني صار يجي كل 10 دقايق تقريبا ...

مرت الساعات و صارت الساعة وحدة بالليل و انا ما اكلت شي من الفرحة انه احتمال اولد و افتك من الكرشة اليوم قبل بكرة ...

طبعا انا ما كنت خايفة ومتشجعة للولادة كثييير لانه ما كان حد قايلي عن الوجع الحقيقي ...

بس صارت الساعة 2 بالليل قلت لزوجي يروح ينام و انا رحت نظفت جسمي بالفيت

و تسبحت

و سشورت شعراتي

و تمكيجت مكياج خفيف

> توقعت ان الولادة سهلة بس بروح اولد على هالوجع وارجع خخخ < ...

صحيت زوجي بس خلصت و قلتله ان الوجع انتظم وصار كل 7 دقايق وكانت وقتها الساعة 3 الصبح تقريبا ,, اتصل بامه وسألها شو يساوي ,, و قالتله خليها تتجهز عشان نروح عالمستشفى بعد اذان الصبح ...

كان وقتها الطلق عبارة عن وجع خفيييييف و ما كنت متوقعة اني بولد ...

اتصلت على اهلي قلتلهم اني بروح المستشفى ,, أبوي و امي صارو يطمنوني انه ما في شي بيخوف و انا اقولهم حاسة اني ما بولد اليوم ...

و قالولي انهم راح يلحقوني عالمستشفى بس يطلعو اخواني الصغار عالمدرسة ...

راح زوجي جاب حماتي ,, و سوالي زوجي حليب مع عسل شربت شوي بس > من الفرحة ما قدرت اشرب مستعجلة عالولادة < وطلعنا عالمستشفى

...

وصلناالمستشفى الخاص كان أحسن مستشفى بالمنطقة ,, كانت الساعة 4 الا شوي الصبح تقريبا , دخلت غرفة التعذيب عفوا قصدي غرفة الفحص ,, و فحصت التوسع ممرضة > ما حسيت بوجع كثير من الفرحة و لانها ضعيفة < فقالتلي 1 و نص مفتوح الرحم ولادة ...

أنا وقتها فرحتتتتت و بنفس الوقت خفت شووووي , سألتها متى بالضبط بولد قالت الظهر بتكوني جايبة البيبي ... المهم اجو ممرضتين قليل انهم يتسمو ملائكة الرحمة ... ما في اطيب منهم قالولي يلا الحين بنحطلك ابرة بالوريد للاحتياط عشان العملية ,, وانا اقول بخاف و زوجي يا حرام يهدي و يدلع يلا شطورة عشاني هههه

...

طبعا ماكان عي وجع الا شي خفيف جدا , حطو شي على بطني تخطيط الطلق وقالتلي انه كل شي أوكي ... جابو روب المستشفى البسه , شفت انه مكشوف من ورا ,, فتحججت اني بردانة فخلوني ببلوزة طويلة شوي تحتها عالاقل مغطية المناطق ههههه

...

بعدها عطتني الدكتورة حقنة شرجية ,, لما شفت الابرة خفت بس هي طمتني و ما حسيت فيها بس حطتها ... و رحت عالحمام اصلا انا مش ماكلة من قبل يوم فما تغلبت بس شي خفيف "اكرمكم الله" ...

اجت الممرضتين اللي كانو معي بس جيت يودعوني و يدعولي و قالو انه مناوبتهم خلصت ,, و الله لا يحطكم بهالموقف و تشوفوا مين اجا مكانهم ممرضتين الله لا يسامحهم لا ابتسامة و لا رأفة و لا تعاطف بس صراخ ...

اجت وحدة و شافتلي التوسع والله وجعتني لانها بتفحص بدون نفس وعالسريع ,, و سألتني : ما نزلت مية الراس أنا قلتلها لا ,, راحت جابت شي طويل و رفييع مثل القلم بس طويل و قالت يلا افتحي رجولك ...

انا خفت وسألتها شو هذا و شو بتساوي قامت صرخت وردت افتحييي ما راح أموتك ,, اول ما دخلتها و طلعتها نزل علي ماي و كانت قليلة وما حسيت بوجع منها بس بالنسبة للطلق ما كنت حاسة فيه قوي لهاللحظة ...

انا كنت اقوم اروح برا عند زوجي > جد كان ملل < و اقوله خلاص روحني زهقت .. شكلي ما بولد ,, اجت الممرضة شافتني طار عقلها و قالتلي ليش قمتي عن السرير ,, ولما رجعت قالت يلا بوصلك المغذي بالابرة > يعني ما في قومة بعدها < انا من الخوف قلتلها بروح عالحمام و اصلا انا ما كنت بساوي شي بس عشان اهرب منها ...

بس جيت شفتها بالمرصاد و وصلته ,, الرحم كان فاتح 3 بوجع مثل الدورة ...

قالتلي الممرضة بعطيكي دوا يولدك بسرعة ,, كانت الساعة 5 وشوي الصبح انا فرحت و قلت بداخلي و اخيرا بفتك من هالوجوه وعطتني الابرة بدون ما تقول انه طلق صناعي اللي كنت بموت منه ...

ما مر 5 دقايق الاالطلق حمي و الله اني شفت الموت و انا اتوجع ومش قادرة لا اتنفس و لا اثبت بالسرير ,, بس تشوفني الممرضة تيجي تصرخ و تقولي انتي مش صغيرة خليكي نايمة > كان عمري 19 < والله حتى ما كنت قادرة أبكي أو أصرخ من الوجع بس أحاول اخذ نفس و انادي على أمي اللي و على زوجي

> من ما عطتني الطلق ما خلت حد يدخل عندي كنت أتوجع بروحي <

...

دخلت حماتي بس طلعن الممرضات و صارت تقرأ قران على بطني ,, كان الشباك مسكر كنت حاسة اني بنخنق قلت للممرضة من قبل افتحي الشباك مش قادرة اتنفس ,, سوت حالها ما سمعتني و راحت,, و انا كنت عطشانة كمان كنت اتمنى نقطة ماي تبل ريقي بس لا حياة لمن ينادي

...

بس قوي الوجع صرت أئن بصووت مسموع والله مهما اقول و اشرح مابوصل جزء بسيط من الوجع اللي حسيته

...

أجت الممرضة و تتظاهر انها مش شايفتني و تطلع لحد الساعة 8 نص

حسيت انو شي بينزل ,, صرخت و ناديت على حماتي وقلتلها ناديهم بولد ...

أجت ممرضة و قالتلي يلا قومي على غرفة التوليد بسرعة مشيو انا مش قادرة امشي من قوة الوجع فصرخت علي بصوت عالي وانا قمت امشي للغرفة وانا ميتة من الوجع

...

وصلت دكتورتي عالغرفة و ما قدرت انام عالسرير من الوجع ... من الوجع القوي المغذي طلع من ايدي اكثر من مرة و يرجعوه بسرعة و يحطوه غلط كل مرة و انا اتعذب قالت الدكتورة يلا البيبي بموت اذا ماساعدتيني ,, زوجي أجا يدخل معي منعوه الممرضات بالاول بس سوا حرب وصار يتوعد و يهدد دخل > بس جينا نشوف المستشفى قبل ما اولد قالولنا انه عادي يدخل الزوج مع الزوجة عالولادة < وقف زوجي عند راسي و مسك ايدي و انا ما كنت قادرة ادفع من الوجع ,, وزوجي الله يخليلي اياه يمسكني و يهديني الدمعة مبينة بعيونه

,, و بعدها مش متذكرة بالضبط شو صار من الوجع بس متذكرة انها الدكتورة جابت خدرتني و جرحتني جرح كبير عشان تطلع البيبي ...

وبعد هالمعاناة نص ساعة و أنا بغرفة الولادة و مش متذكرة شي غير اني حسيت بنزول بنتي وقالت الدكتورة شوفي كيف تعبااااااانة و جسمها ازررق بعدها سمعت واااااااء واااااااء كانت الساعة 9 الصبح ...

انا كنت بنام من التعب و الجوع و الارهاق > يومين و أنا بطلق و بدون أكل ونوم < بس الدكتورة قالت لا لسة باقي الخلاصة >المشيمة< طبعا ما دفعت ولا سويت شي من التعب ,, بس هي طلعتها طريقتها ...

بعدها الدكتورة خيطتلي الجرح ,, كنت حاسة بالابرة و هي تطلع تدخل > ولا كإني مخدرة < بس متحملة ...

نظفتني الدكتورة و لبستني بعدها طلعوني عغرفتي ونمتتتتت يمكن للمغرب و أنا كأني ميتة ...

جابو بنتي بعد ساعة بس ما كنت بوعيي من التعب فما رضعتها و كنت تعبانة لدرجة اني ما شفتها للمغرب ...

المهم جبت بنت سميتها حـــلا ...

ما قدرت أرضعها أول 4 ايام من كثر التعب ووجع القطب و نشف الحليب بصدري ...

بالنسبة لدورة النفاس اجتني أسبوعين بشكل غزير و بعدها عادي شي خفيف ...

الخيوط ضلت لليوم الاربعين رحت قمت اخر قطبة و حطيت لولب ...

اخر أخباري ^^ ,, أنا حامل و قررت بالاتفاق مع دكتورتي بوقت الولادة على > ابرة الظهر < ...

و توتة توتة جبت أحلى بنوتة ...

هذي صورة للحلوة ...

rooraa · 06-21-2011, 10:11 PM

الحمد لله على سلامتك وتتربى بعزككم
وعقبال البيبي الجي ان شاء الله

ام رتيل · 06-21-2011, 10:31 PM

ماشاءالله ..الله يحفظها يااااارب
وتقومي بالسلامه انت والبيبي

بنت فلسطين · 06-21-2011, 10:52 PM

يجعلها من ابناء السعاده الف حمدالله عالسلامه

عذبوك ياقلبي · 06-21-2011, 10:52 PM

الحمد الله اهم شي كانت سلامتكم

ملكة الغربة · 06-21-2011, 11:30 PM

هههههههههههه
شكلك غرتي ونزلتي قصتك مع انو من زمااااااااااااان والدة

والله لخبطتيني بحكي شو الحمل الاول والتاني
بس لما قرأت القصة للآخر فهمت

وان شاء الله تولدي بالسلامة هالكتكوت التاني

ويخليلك بنتك متل القمر ما شاء الله

أ م ل · 06-22-2011, 12:11 AM

تعذبتي حيل
ان شاء الله تولدي بسلامة

جامعية · 06-22-2011, 01:05 AM

الحمدلله على سلامتك والله ييسرلك ولادتك الثانية اكثر من الأولى

ويخليلك بنتك ويحفظها ربي وتجي تبشرينا

مملوحة الوصآيف · 06-22-2011, 05:53 AM

ياناااااااشو ماشاءالله تبارك الرحمن تدنن ربي يحفظهآ ويخليهآ لكم

وان شاءالله ولادتك الثانيه تكون اسهل من الاولى

وربي يسهل للجميييييييع

مس زيزو · 06-22-2011, 06:09 AM

احلى حلا الله يخليها ليكى

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تفاصيل بالصور عن ابرة الظهر	عزيزة النفس	منتدى حوامل الطبي	28	08-22-2011 05:42 AM
هذي موب قصة ولادتي..هذي قصة حملي كللله..هههه	دلوعته	إستفسارات مرحلة الولادة	50	05-10-2011 01:57 AM
هل انتي ممن تحكي تفاصيل يومك لزوجك؟؟؟	ام حاتم	منتدى الحياة الأسرية والزوجية	18	01-23-2011 02:51 PM
تفاصيل عن عبدة الشيطان(لى بتخاف ما تدخل	rania	المـنـتـدى الـعـام	9	09-15-2010 09:43 PM
ساعدوني بحساب مدة حملي وموعد ولادتي	جناوي	إستفسارات حوامل من الشهر السابع إلى الشهر التاسع	6	06-07-2010 06:12 PM