ولادتي ومغامراتي

[موزه فوشيه]

السلام عليكم

انا لي سنه وشوي من ولدت بنتي الله يحفظها وتعرفون المسوؤليه زادت مع اختها الله يعين على تربيتهم التربيه الصالحه

اناولدت ببنتي البكر قيصري وسالفتها تلقونها في ملفي

طبعا بعد القيصري اقل شي تجلسين سنتين عشان يلتأم الخياط وانا ماشالله علي حملت بعدها باربع شهور

انا دورتي منتظمه الحمدلله ولما تاخرت يوم بس خفت. كثير ورحت للمستوصف اسوي تحليل قالو انتظرو ساعه من كثر الخوف
جلست عندهم ماقدرت اطلع وخلال اقل من نص ساعه ناداني المصري قلت نعم قال مبروك حامل لما قالها طحت عنده تسدحت وجلست ابكي هو مسكين خاف وجلس يهديني ويقول دول كلهم رزق من ربنا ولما جا زوجي راح المصري لزوجي

يقول انت زوجها يقوله ايوه يساله المصري طيب هي بتعيط كدا ليه وقاله زوجي السالفه وانا فاكتها مناحه << كل ماتذكرتها ضحكت

المهم كنت كارهه ذا الحمل وساكته ماقلت لاحد حتى امي قلت يمكن يطيح وارتاح << استغفر الله

كانت بنتي الكبيره عند امي لاني كنت ادرس وكل مارحت قالت لي امي انحفي ترى السمن موب زين << كنت سامنه بعد ولادتي الاولى

وسويت المستحيل عشان يطيح لاني ماكنت ابيه حتى لما رحت لموعدي في الحكومي كنت متأمله انه كيس فاضي او مافيه نبض لاني اجهضت مرتين

وتكشف الدكتوره وتسوي سونار وتلقى النبض وانا توي بالاسبوع السادس وجلست اصيح واقولها ابي اطيحه من كثر ما انا كارهته بس سبحان الله

واسافر انا وزوجي واخذنا عمره ورحنا دبي بالسياره طويييل الطريق وكله حفريات ومطبات على امل انه يطيح وكنا نمشي بالاسواق ست ساعات متواصله << الله يسامحنا

وتعدي الايام وسبحان الله مو راضي ينزل او يتحرك بس كان ينزل معي افرازات بنيه وكنت مطنشه ولا قلت لاحد حتى امي

الى الشهر الخامس رحت للدكتوره قالت المشيمه نازله يبيلك راحه حتى ماتولدي عمليه

وقلت لامي تعالو شوفو التهزيئ اللي جاني

وجلست عند امي شهرين بس اروح لبيتي انظف وكنت ذاك الوقت تخرجت الحمدلله

الشهر التاسع

رحت لموعدي طبيعي ومسكوني ملاحظه عشان السكر نازل وطلعت وخيرتني الدكتوره بين العمليه والطبيعي

قالت اذا سويتي عمليه خلاص بتصير ولاداتك كلها عمليه وحرام توك عمرك صغير

واذا تبين الطبيعي بنحطك تحت الملاحظه وبيكون معك خمسه دكاتره واستشاريين

قلت لها ابفكر وارد لك الموعد الجاي ..جلست اقلبها في راسي العمليه ساعه وانا خالصه لا الم ولاشي << ما احب الوجع

والطبيعي شغله وحوسه وخياط والم .. الله يعظم الاجر

تتوقعون ايش اخترت،،،،،؟؟









اخترت الطبيعي وفي حاله لاقدر الله صار شي يسوون عمليه ووقعتني على اختياري ، وسوت كشف وقالت لسه على الولاده

وطلعت .... مافي لا الم ولا هم يحزنون.


قبل لا اخلص التاسع جاني شد عضلي في فخذي وسرت اسحب رجولي ما اقدر امشي << انرحم

وخلصنا التاسع وعوشرت اخذت ثلاث اسابيع بعد التاسع

لما رحت لموعدي انهبلت الدكتوره وقالت لسه ماولدتي قلت لا قالت فيه الم قلت لا قالت الحين انزلك للتنويم قلت لا بروح اجيب اغراضي واجيكم. << ابي النحشه

قالت لك اربع ايام اذا ماولدتي ولا سوينا عمليه ماتجلسي كذا وكلمت التنويم وحجزت لي سرير

وطلعت وكنت عند امي بعد اربع ايام كلمني زوجي وانا عند امي الساعه 8 صباح قال المستشفى دقو علي يقولون لازم تحضر

انا من الخوف سكرت الخط بوجهه ورحت للحمام << الله يكرمكم اسهال

ورحت لامي تصلي الضحى جلست انتظرها او ماسلمت جلست ابكي هي انفجعت قلت لها انهم اتصلو قالت توكلي على الله

وجا زوجي يقول يالله مشينا وانا رافضه اطلع له ودخل للمقلط ينتظر وانا راكبه راسي مابي وهو يقول ماراح اطلع الا وانتي معي

جلست اصيح واهاوشه قلتله انت وش دخلك مو انت اللي بتولد انا اللي بيشقوني وانا اللي بتعب حرام عليك خلني << احزن

وجلس يقنعني وانا اصيح وامي تقول روحي والله يسهل عليك وجلست اوصيها على بنتي

وطلعت وطول الطريق اصيح واشوهق وزوجي يضحكني وانا اضربه وشرا لي فطور ولا اكلت بس شربت حليب

ووصلنا المستشفى

ولما دخلنا وحنا نمشي انا اتاخر شوي وادخل سيب ثاني واضيع نفسي عشان اهرب << خبله وزوجي يدق علي يقول تعالي واستهبل عليه واقول ضعت لما عصب وخفت منه الصراحه

لما وصلنا قسم الولاده قالي ادخلي وانا بروح اصلي قلت طيب لما شفته راح دخلت انتظار النساء خايفه

شوي الا اسمع اسمي ينادون علي <<< طفشتهم خخخخ

طلعت من الانتظار لقيت وحده من الاستقبال قالت انتي فلانه قلت لا بعدين قلت ايه قالت متاكده واعطيها بطاقه المستشفى

قالت وينك ننتظرك من الصباح ... قالت ادخلي ماقدرت جلست اصيح وهي خافت ضمتني وتسمي علي ياحبيلها قالت انتي بكريه قلت لا قالت اجل ليش خايفه واخذتني في مكتبها وعطتني مويه ونادت الممرضه حقتي وجلست توصيها


قالت انتظري في الانتظار اللي جوه دخلت وجلست لقيت دكتوره حامل وتشرح لطالبتها على نفسها << ياحليها

وتشرح بالانجليزي وانا دخلت جو معهم وما اذكر ايش اللي صار وتسال الطالبات ولا عرفو وتحمست وجاوبت << داخله جو بقوه

قامت تهاوش طالبتها وتقول المريضه جاوبت احسن منكم شوي تدخل حرمه واستأذنت الدكتوره وترح مع الطالبات بغيت الحقها

والحرمه ماشالله عليها دخلت وصلت الظهر وجات السستر تسال ايش المشكله وقالت المويه انفكت وعادي عندها ماهي خايفه ولا شي وتهاوش السستر تقول بسرعه عطيني البس. << الله لايضرها

شوي نادتني السستر حقتي وتعتذر ان مافيه سرير فاضي قلت عادي مو مشكله اجلس لبكره تضحك تقول لا استني ساعه

وجلست واسمع صياح الحريم واتوتر زياده وفيه حرمه رحمتها مره جا دكتور ياخذ المعلومات منها وهي مسكينه تطلق ويقول بتولدين قيصري وهي تترجاه تبي طبيعي وهو رافض مسكينه واخذوها للعمليات


وتجي السستر وتقول يالله ندخل جوه <<< عالم ثاني


اكمل لكم بكره ان شالله لانها سالفه لحالها ..

[ميرا العطاس]

يالله قطعتي علي التشويق يلا بكرة انتظر التكملة
حلوة مغامرتك والله يوفقك ويحفظ لك ذريتك

[موزه فوشيه]

المشاركة الأصلية كتبت بواسطة ميرا العطاس

يالله قطعتي علي التشويق يلا بكرة انتظر التكملة
حلوة مغامرتك والله يوفقك ويحفظ لك ذريتك

الله يجزاك خير

[دانة العراق]

بصراحة قصتك تنفع تكون فلم لان فيها تشويق كبير هههههههههه
بس ان شاء الله العاقبة خير

[موزه فوشيه]

اكمل لكم

بعد مادخلت جات الممرضه تسأذن مني ان فيه طالبات تدريب واذا ممكن انه يطبقون علي ووافقت في حاله وجود طلاب ما ابي


وطلعو طالبات الحمدلله عسل الله يجزاهم خير

وهي تشرح لهم صارت تتكلم عن القمل بالانجليزي ورديت عليها واستغربت اني افهمهم قالت انتي موظفه عندنا قلت لا

قالت كيف تفهمين علينا قلت انا دارسه جامعه

وشوي جات الدكتوره المشرفه قالت بنعطيك في البدايه نص تحميله طلق عشان مايتفتح الخياط بس في البدايه عطوني حقنه شرجيه وانتو بكرامه

وحطت التحميله تقريبا الساعه اربع العصر وقالت يمكن يبدي مفعولها على العشاء قلت خير ان شالله

والسستر عندي ماتفارقني وجات طالبه التدريب وجلست اسولف معها واقولها قصروا التبريد مررره بارد قالت بشوف

وطلعت ورجعت ومعاها كوفي لي << ياحبيلها

وتوني باشربه جا الاستشاري قال الله عندكم ريحه كوفي قالي ماشالله عليك عيوني فيه ابيه قلت خذه اخاف اشربه ويجيني شي ويضحكون هو والدكاتره اللي معه << رهيب ذا الاستشاري

وبس كشفت الدكتوره اللي معه وقالت لسه مطوله اذا حسيتي باي الم في منطقه الخياط او حراره قولي للسستر لا تسكتين وطلعو

وجلست اسولف مع السستر وركبت جهاز الطلق واسالها انتي كم لك بالسعوديه قالت لي سنتين وحيبت الرياض تقول ماتخيلت ان السعوديه كذا تقول توقعت ابجي في وسط صحرا ماعندهم حتى تلفون
وتقول جربت اشرب اللبن وماحبيت طعمه الا لما خلطت معه عصير منجا << جربوه

وتقول ابي اجيب اولادي يشوفون السعوديه << حبوبه حليلها

ولما خلص شفتها مسكت يدها قلت لها لا تروحين ابغاك تولديني قالت ماعليك ابوصي الممرضه الثانيه عليك قلت لها خلاص ابمسك نفسي لمايجي شفتك وتضحك

ولما جات الممرضه الثانيه بدا يزيد الطلق وامي جات عندي وتقولها السستر اطلعي وترجتها امي وقعدت اصيح قالت خلاص بس اذا طلعوك الدكاتره اطلعي

وانا في وادي ثاني اهذري على امي وشوي جا الاستشاري وطلعت امي ودخل زوجي وجلس يقنعني بابره الظهر قلت ابفكر فيها قال انا والله عجزت اقنع زوجتي فيها ماتبيها << طيب انا وش دخلني

قال اللي معك عريس ولا عروسه قلت لا بنت قال خلاص اجل سميها مشاعل على زوجتي قلت كم تعطينا قال لكم اللي تبون
قلت ميه الف قال حرام عليك انا جالس اعمر وابني ماعندي << فاضي مره

قال ابفك كيس المويه عشان يحمى الطلق و لما بدا يفكها صرت اصرخ واقول وخر عني ولا ترى بتشوف شي ما يعجبك وزوجي يمسك يدي واهاوشه اقول وخر عني والاستشاري ادفه برجولي باقوى ماعندي وهو جبل ماشالله ماتحرك ويقول ماكنا حلوين ليش كذا قلت انت خلك بعيد ونصير حلوين

هذا كله الساعه تقريبا 9 ونص وطلع الاستشاري واقول لزوجي معليش على اللي صار قال اهم شي انه مايعرفني << لان زوجي يشتغل بالمستشفى

ويحمى الطلق وتجي امي واطلبهم ابره ثانيه وعطوني نص ساعه الا انا نايمه بس اقوم من قوه الطلق اقوم ارقص على السرير لين يهدا وامي تقولي اذكري الله واقولها اش اسكتي تقول امي لو انك مو بنتي ولا اعرفك قلت هذي فيها جن بسم الله

واجلس اطلق الى الساعه تقريبا 12 ويجي الاستشاري يقولي تبين ابره الظهر تهديك قلت سو اللي تبغا اهم شي يخف الالم << الله يعظم الاجر لنا ولامهاتنا

ويجي الدكتور المسوؤل عن ابره الظهر ويقرا علي التعليمات صرخت بوجهه قلت هاتها وانت ساكت قال وقعي قلت وقع انت << خخخ

قال لا مايصير يا اختي قلت لامي وقعي عني قالت لا لازم انتي ووقعوني وبصموني

وعطانيها وبعدها شفت العافيه اشوف جهاز الطلق يرتفع واقول للسستر شوفي ما احس بالم تقول يالله نوم ونمت لين الساعه 2 الا ربع وتكشف السستر وتلقاه 10 الحمدلله وتنادي الدكاتره

وامي تمسح على راسي وتقول هانت شكلك خلاص بتولدين واقولها من اللي بيولد << حشيش خخ

ويجون 3 دكاتره. و2 استشاري و2 سستر 2 سستر للبيبي يعني الغرفه فللل

ويقولون اذا حسيتي بضغط ادفعي وادفع وهم يصفقون ويشجعون لين طلع الراس ويخلوني ادفع نص دفعه ويوقفوني وسحبوها جلست اصرخ واقول لامي خلصت ولدت واصيح واشاهق وافتح وجهي من الفرحه وقال واحد من الدكاتره خلاص بس اسكتي قلت مالك دخل خلني مو انت اللي عانيت << قهرني

واخذوها والدكتوره دخلت يدها من جوه قالت فيه الم قلت لا وتضغط من فوق مكان العمليه تقول فيه الم قلت لا

وجلسو يخيطوني وبنتي نظفوها وعطوني ايها حظنتها وبستها وعضيتها عقاب لها خخخ

وجلست ساعه لين ماجابو لي عربيه وودوني لغرفتي الحمدلله

وسبحان الله عسى ان تكرهو شيا وهو خير لكم بنتي ماتصدقون غلاها عند الكل محبوبه من الجميع ماشالله

وهذي حكايتي باختصار

وانا ولدت في مستشفى الحرس الوطني بالرياض ماشالله عنايه واهتمام حلوه الحمدلله

وتوته توته خلصت الحدوته اسفه اني طولت عليكم واي سوال انا موجوده بالخدمه

[موزه فوشيه]

نسيت اقولكم بنتي طلعت مع اذان الفجر يوم الاحد تاريخ 24/2 هجري

وشرفت احلى جنى الله يخليها لي ويخلي لكم ماعندكم

[الحياه حلوة#]

ماشاء الله القصه مرا روعه. دخلت جو ولاده معاك
مبروك ماجاك وتتربى بعزك

[أم حمودي وعبودي]

بالفعل مغامرات

الحمد لله على سلامتك وسلامة جنى

[دانة العراق]

هههه
مبروك والحمد لله على السلامة
وبصراحة قصة جدآ جميلة
بس لو اعطوكي ابرة الظهر من البداية كان زين
بس عمومآ ربي يهنيكي ويخليلك حبيبتك جنى

[كآدي*]

مرررة دخلت جوو مع قصتك
الله يفرحك فيها و في اختها يارب
تخيلي انا امي حملت بعدالأربعين على طوول
راحت مراجعة عادية و جاتها الدكتورة تبشرها بالحمل ههههههه
الله يسعدك و يرزقنا الولادة السهلة