السلام عليكم ورحمه الله وبركاه
شلونكم حبيباتي عساكم بخير
الي حامل عسى ربي يهون عليها حملها
واللي منتظره الحمل عسى ربي يرزقها بالقريب العاجل وتجي تبشرنا بحملها 🙌🏻
انا بشرتكم بخبر حملي قبل اسبوع وواعدتكم ارد واسرد لكم التفاصيل
أولا ارجع واعيد واذكر بوضعي انا عندي ولد وبنت ولدي عمره 12 الله يحفظه وبنتي عمرها عشره الله يحفظها وقطعت الموانع لمه كملت بنتي خمسه
واجهضت خمس مرات بدون سبب وولاداتي قيصريات بسبب ضيق الحوض
بلشت احاول احمل لمه بنتي ادخلت المدرسه بسن الخمسه صف تمهيدي وسنه تجر سنه ومافي فايده واذا اكتشف حامل ثاني يوم اسقط وبدون سبب
ماخليت فحوصات ولااشاعات ولاسونارات ولااي شي يخطر ببالي
انا اقيم بدوله اوربيه واوربا مايفهمون اسم الطب
خذيت لي فتره واكتشفت بصدري حليب ورحت للدكتوره ردت علي وقالت هذا مومرض هذا هرمون يروح لحاله
لغايه اخر سنه ونص قررت اراجع عند عياده خاصه واتابع
صحيح غاليه وجهنم بس قلت ميخالف دام زوجي يبي وعيالي لهفتهم على اليهال موطبيعيه وزائد ع هالشي عاطفه الامومه عندي اذبحتني
لذالك رحت واجريت كل الفحوصات وقررو ع اشعه الصبغه وكررتها ثلاث مرات وكل ماروح لأهلي زياره اسويها بدوله عربيه اقول يمكن عندي التصاقات واشعه الصبغه تنفع ماتضر وصحيح كنت اتعب من اسويهم بس الحمدلله اتحمل واضغط على نفسي علشان العاطفه عندي
وقررت اسويها للمره الثالثه بالعياده الخاصه وبالفعل سويتها وشهر يجر شهر ومافي حمل ورحت وقابلتهم وقلت لهم وحده من الاثنين ياانا منحوسه او انتم ماتعرفون تعالجون عدل
قالو والمطلوب قلت لهم كل ماجيكم مراجعه اقط بلاوي فلوس ومافي فايده عطوني حل شافي او عطوني ذره امل اتعلق فيه
قالو خلاص نبلش تلقيح صناعي
وبالفعل جربت اول عمليه بعد ماسويت كل تحاليلي وكلها سليمه وتحليل لزوجي والحمدلله زين
وعطوني منشطات من ثالث يوم الدوره عباره عن حبوب كلوميد خمسين غرام للحبه
وقالو من تخلص الحبوب راجعينا يوم فلاني
وبالفعل كنت اروح وكل سونار يبشر بالخير واكثر من بويضه تطلع ويعطوني ابره تفجيريه عباره عن قلم
انا اخذها بالبيت عن طريق البطن بعد مايحددون لي الساعه جم الساعه اطقها
وعقب عطوني ورى يوم موعد التلقيح وقالو يااما تجيبين عينه لنا الصبح الساعه ثمانيه او هو يجي
طبعا ابو الشباب يعتبرها اهانه ان قلتي له روح وكنت اخذ العينه واروح اعطيها لهم وانتظر اربع ساعات للعياده علشان يحقنون السائل
ويعطوني مثبت عباره عن حقن مهبليه كل يوم وحده بالليل
سبحان رب العزه مااكمل عشر ايام الا والدوره طايحه علي بوقتها انجنيت والله واقول ليش من دون العالم دوتي تطيح قبل موعدها
ومن حرقه قلبي كررتها الشهر الي وراه وبنفس الخطوات وبنفس الوقت الي انزلت فيه بالمره السابقه انزلت وطبعا اليوم الي تنزل فيه تعالو شوفو حالتي حدث ولاحرج
وكررت العمليه بشهر سته قبل رمضان قلت يمكن هالمره تصيب وربي يكرمني وايام فضيله مقبله وكررتها بنفس الخطوات وورى اسبوع انزلت وبعد فشل العمليه الثالثه خلاص فقدت الامل وكلشي وقلت قاعد اقط فلوس ع الفاضي كل عمليه 800 دولار وفوق كل هذا زوجي يقول احسبي حسابك هاذي اخر مره
بعد فشل العمليه الثالثه بلغتهم بالفشل وسألوني اذا حابه اعيدها قلت لهم لا ابي ارتاح ومسافره لاهلي وعقب مارد افكر وخذيت حبوب مانع من راسي وبكيفي من غير استشاره من حرقت قلبي
وكل هدفي وتفكيري اقول ممكن عندي هرمونات والحبوب تعدلها وبعد مارجعت من السفر خاطبتهم قلت لهم مابي اكرر العمليه ولاكن ابي اجتماع مع الدكتور
ورحت له قلت له قطيت بلاوي عندكم للادويه والتحاليل ولاشعه الصبغه ولكل عمليه من غير ابر ولمه احسبهم يطلعون قيمه عمليه اطفال انابيب لو انتم من البدايه عارفين تفشل العمليات ليش ماقلتو لي سوي انابيب وفكي عمرج
قال انا متفهم الوضع والتفكير حقج وكلامج صحيح قلت له تنصحني بشنو شسوي قبل لااخطي خطوه التفكير والخوف بالفشل ذابحني ومخليني متراجعه واذا عندي امل فالفشل قتل كلشي داخلي
يتبع