تجربتي في التجهيز للولاده ...

[beautifulspirit]

بسم الله الرحمن الرحيم
السلام عليكم ورحمة الله وبركاته

حبيت افتح هذا الموضوع لكل ام مستقبليه .. واتمنى من الامهات الباقي مشاركتي ارائهم ايضا .. الكل مرحب به في موضوعي المتواضع .... وانا مستعده للإجابه على اي سؤال


بدايه : بحثت واجد في النت قبل لا اولد بنتي فطوم عن اغراض واحتياجات المواليد الجدد .. وشنطة الام والطفل .. وبصراحه استفدت واااااجد من خلال بحثي ... فقررت احط لكم تجربتي والاغراض الاساسيه اللي حسيتها مهمه جدا ... والاغراض اللي ما اشتريتها وحصلتها هدايا ... يعني بشكل عام المفيد والمبالغ فيه راح احط لكم تجربتي ...


أولا ببدأ بــــ مسهلات الولاده :

قريت واجد عن تجارب البنات في الاعشاب والمسهلات كف مريم واللي حطيتهم في بالي اجربهم لي بعد بحث طويل ((زيت خروع- يانسون - حبه سوداء- عسل طبيعي - كف مريم- مرميه- حليب وهيل وزعفران وماء ورد- زعتر )) ...
بس ماشربتهم كلهم .. لان في نقطه مهمه عن المسهلات .. انش لازم تشربينهم بعد ما يبدا التوسع .. وليس قبله ...

المهم : انا جربت في نفسي .. انا بكر وتاخرت عن موعد ولادتي 9 ايام وخلاص طفشت .. يوم تاسع كنت بروح ارقد في المستشفى حق طلق صناعي ..
اللي جربتهم : 1- زيت خروع : شربته يوم سابع من الشهر العاشر .. وجاني اسهال وانتو بكرامه .. ولا توسعت ولا صار فيني شي...
2- منقوع الزعتر: شربته قبل لا اروح المستشفى يوم موعد الطلق الصناعي .. يعني قبل الطلق الصناعي .. من الصبح ... ((ما اتوقع سوى شي))
3- خليط ماء ورد وحليب وهيل وزعفران : هذي الخلطه القاضيه
بصراحه هذي الخلطه امنت بها واااجد وكانت اكثر وحده مفيده .. وانصح الككككككككككل يجربها بسسسسس بشررررررط .. بعد ما يبدا التووووسع مو قبل...
انا شربتها بعد ما اخذت حبة الطلق الثانيه .. وبدا عندي الطلق والممرضات قالوا لا هذا مو طلق محد صدقني ..عطوني حبة الطلق الساعه 6 المغرب وقالوا لي انتي مابتولدين الا يوم ثاني يمكن الظهر ... شربت الخلطه الساعه 8 .. والحمدلله بفضل الله ولدت الساعه 2 الفجر...
حبة الظلق الصناعي هي اللي بدت لي الطلق .. لكن خلال الطلق هذي الخلطه واجد ساعدت

اهم نقطه خلال الطلق هي التنفس... تقنيات التنفس لاتتساهلين بهالموضوع .. التنفس بالطريقه الصحيحه هو الشي الوحيد المخفف لللآلم وراح يهدئ اعصابش بعدد



ثانيا : شنطة الام
1- ملابس للام للاستقبال: انا ماشريت ملابس جدد .. استخدمت بيجامات الحمل.. اشتريت لي بس روب كاشخ وشبشب مايزلق عشان المشي بالسيم ماتطيحين ولا تزلقين بالغلط .. وشيله جديده مناسبه للروب والشبشب ..

2- لحاف خفيف للطلق و مفرش ثاني للاستقبال: اثناء الطلق راح تحسين بالبرد .. نصيحه اخذي وياش لحاف يدفيش مهم جدا .. ومفرش اخر للستقبال .. لان اثناء الطلق ممكن تنزفين دم وخلاص يخترب اللحاف .. فاخذي واحد مو شرط جديد لان ممكن انه يخترب

3- ملابس داخليه : ستيانات الرضاعه و الاندروير .. خلي سايز ال... يكون واسع خصوصا ان البكر غالبا مايصيدها جراحه بعد الولاده .. والجراحه تحتاج تكون المنطقه جافه .. يعني اخذي ملابس داخليه واسعه ..
شي تمنيت اني اخذه ماكنت اعرف عنه من قبل : في فوط نسائيه خاصه بالجراحه بعد الولاده وهذي تتوفر في محلات مذركير.. بس مادريت عنها الا بعد ماطاح السيم يعني ماجربتها

4- كريم MEBO ميبو للجرح بعد الولاده : جدا مفيد .. إذا كنتي مثلي جبانه لووول وتخافين تلمسين الجرح .. اشتري قطن جونسون مال تنظيف الميك اب واستخدميه .. ضعي الكريم على القطنه وربتي على السيم نفسه .. وان شاء الله بيطيح باسرع وقت

5- شنطه ميك اب خفيف وسشوار: انا حملت الميك اب بس من التعب ماقدرت بصراحه استخدمه خخخخ .. بس السشوار مهم استفدت منه .. اختي سشورتني

6- طبعا فوط صحيه ...

7- علبة تمر .. اهم شي التمر اكليه من تدخلين شهرك التاسع وحتى بعد الولاده ... اول شي بعد الولاده اكليه هو التمر والماء ... كما جاء في سورة مريم..

8- ماء

9-كلينكس

9- مقص الاظافر حتى ماتشمخين البيبي الناعم هههه

10- منظره صغيره

11- كريم تشقق الصدر : انصحك بـــ Purelan

12- قطن الصدر .. ما استخدمته لان اول ماتولدين مايكون الحليب كثير.. بس استفدت منه من خلال عمل كمادات ماء دافيء لتخفيف الالم

13- مشط شعر وكريم او شي اذا تحبين.. ولا تنسين ربطة الشعر

14- مطاره لتخفيف الم الطلق .. بس مارضوا يحطوا لي فيها ماء ساخن قالوا لي they are not allowed to
فما استخدمتها .. انتي اسالي مستشفاكم قبل لا تحمليها .. انا ماسألت

15- ادعيه وقرآن

16- ساعه وتلفون وجارج التلفون ..

لاتنسين الكاميرا .. خلي زوجك يجيبها وياه

18- مزيل عرق بدون رائحه .. او رائحته خفيفه ...

19- معقم الايادي ... مهمممم جدا بالنسبه لي

20- فوطه لجسمك وثانيه لشعرك لبعد السباحه

21- شامبو الجسم والشعر والبلسم .. حطي في بالك اذا صادك تشققات في الصدر من الرضاعه .. لازم ماتستخدمين صابون لمنطقة الصدر ابدااااا ... حاسبي لا يزيد عندك التشقق.. بس لاتنسين كريم الصدر puerlan احسن كريم وعادي ترضعين بدون ماتغسلينه .. وهذا الكريم زين لبشرة الطفل بعد الولاده .. بتلاحظين بشرته تتقشر .. حطي حلى وجهه وفي يومين بيصفى تمااااااااااااااااااما .. مجربه انا

22- معجون وفرشاه مهم .. وإذا تحبين بخاخ فم ..

23- فازلين للشفايف

24- مخدة رضاعه اذا تحبين .. انا ما اخذت كنت اظنها مو مهمه .. بس احتجتها في المستشفى تمنيت لو كنت اخذتها

25- اهم شي اوراقك الطبيه لاتنسينها

كمية الملابس اخذي وياك اقل شي 3 بيجامات .. ماتدرين كم يوم بترقدين في المستشفى.. وبعدين يحلها الف حلال خخخ

وبس اتمنى مانسيت شي خخخخخخخخ

هذي الاشياء المهمه جدا جدا يعني نسميها احتياجات ..

نجي للكماليات : مفرش وتزيين للغرفه تكونين متفقه مع محل من قبل .. وتوصين زوجك او اختك او احد يتصل لهم لما تولدين .. والتوزيعات ابدائي تسوينهم من الشهر السابع .. عشان بعد بس تلفون والمحل يجيبهم لك وانتي مرتاحه ... واهلي جابوا الشاي والقهوه والحلويات .. حتى الضيوف بيجيبون حلويات فمايحتاج تكثرين من حلويات انتين.. ووووووو ميلاد سعيد
راح تحتاجين ماء لك وللضيوف وللبيبي بعد فكثري من الماء والعصيرات ...


وبعض الاغراض اللي راح تحتاجينها لما ترجعين من المستشفى:
1- ماء المرقدوش لك .. وراح يوصل في الرضاعه الطبيعيه لطفلك

2-ومره .. للجرح .. ماحبيت ريحتها بس بسسسسرعه طيحت الجرح .. في البدايه استخدمت بس كريم ميبو.. وعلى اخر ايام السيم استخدمت المره وطاح بسرعه .. يعني عالجت المنطقه اول بعدين استخدمت المره اللي تجفف السيم وتطيحه...

3- المزيد من الفوط الصحيه ههههه والملابس الداخليه

4- قطن الصدر

5- شفاطة الحليب

6- خلي عندك كم فلس للنيو لوك وللصالون .. وللمراخ ..((مساج مابعد الولاده)) انا جتني المراخه في البيت ما رحت لها بيتهم ومسجتني 3 ايام وصرااااحه ردت لي روحي من بعد المساج وبسرعه تحسنت صحتي ... لبنات البحرين اللي يبي رقمها يخبرني

7- ادوات طبخ اكل النفاس .. مثل اغراض الحلبه والعصيده

8- برتقاااااااااااااااااااااااااااااااااااااااااااااا ااااااااااال
ياجمااااعه البرتقاااااال .. يمشي البطن ويزيل الامساك ... الوصفه المجربه : برتقاله واحده قبل وبعد كل وجبه يوميا... او اذا ماقدرتي قبل الوجبه .. لاتنسينها تاكلينها بعد كل وجبه .... وتطمني وارتاحي من مسألة الامساك اذا مشيتين على هذي الوصفه السهله الرخيصه المفيده الممتاااااااااااااااااااااااااااااااااااازه ...
ونصيحه اخرى للامساك .. ابدأي يومك على الفال بكاس ماء دافيء وسبع تمرات ....

بنااات النصائح اللي اكتبها ترى كلهم مجربتهم انا شخصيا وهذا كله من تجربتي الخاصه واي استفسار انا حاضره ...

9- المشد الاندونيسي.. نصحتني المراخه ان ما استخدم المشدات الا بعد ما اكمل الاربعين .. وانا كملت الاربعين ولحين ما استخدمت المشد خخخخخ متكيسله عنه ..



يتبع لعيووووووووووووووووووووووووووووووونكم

[doody]

ربي يسعدك ويريح بالك
يسلموووو عالموضوع الحلووو

[soul of love]

مشكوره على التجربه المفيده

[سلافتي]

حلووووووو مرررررررررررررررررره موفقه

[خير ان شاء الله]

مشكووووووووره عا المعلومات

[اغليك يا الجنوب]

يسلمووووووووووووووووووووو

[beautifulspirit]

doody
soul of love
سلافتي
خير ان شاء الله
اغليك يا الجنوب

h waml03
شكرا لكم حبيباتي عالردود الحلوه ربي يوفقكم كللللكم

[al-sham5h]

يسلمو عالمعلومات الله يجزاك خير

[!راما!]

جزااك لله خــــــــــــــــــــــــر

[beautifulspirit]

بسم الله الرحمن الرحيم
السلام عليكم ورحمة الله وبركاته


يالله نكمل ...


احتياجات النونو بشكل عام .. بعدين بقول لكم شنو المهم لشنطة المستشفى

سرير ( يكفي لخمس سنوات أو اكثر) ..
انا اخذت سرير بنتي من مذركير سنتر بوينت .. عندي بعض الملاحظات المهمه ...
1- المفرش ماكان قطن 100% .. كان بوليستر وشي .. وملمسه شوي خشن بالنسبه للطفل.. بس كنت اظن ان مافي مكان ثاني يبيع مفارش واستعجلت واشتريته ..

2- القسم المتحرك من السرير بينزل لارتفاع بسيط فقط .. يعني اذا كنتي مثل حالتي ماتستغنين عن بنتك.. ((انا سرير بنتي خليته في غرفة نومنا بجانب سريرنا)) .. حطي في بالك نقطه ان بداية الولاده بتكونين تعبانه تقومين مرتين او ثلاث كل ليله عشان تشيلين بنتك من سريرها وتلبين طلباتها ... فنتيجه لهذا قررت ان اشيل القسم المتحرك من السرير عشان يكون ماترس سرير البيبي ملاصق بماترس سريرنا بشكل مباشر بدون اي حواجز عشان بنتي تكون بجنبي واسهل للحركه ....... وعشان نشيل القسم المتحرك لازم نشيله من الاساس بسكاريبه .. يعني بيختر السرير

3- كنت اتصفح كتيب الاعلانات مال مذركير الاصلي.. واكتشفت ان عندهم نوع من انواع الاسره المخصصه لمثل هذه الحالات ... مهد لجانب السرير .. جانب الانزال فيه يكون متأرجح فينزل على طول لتحت سرير البيبي بطريقه سهله جدا ومريحه ... ندمت ما اشتريته


.................

2- مدس الطفل ... انا ما اشتريته

3- مفارش لحمل الطفل عدد 2
قماطات للف الطفل .. انا اخذت 4 بس بعد الولاده اكتشفت اني احتاج على الاقل 6

4- بساط المفرش الصغير .. هذي جدا مفيده اخذيها عدد القماطات لانها تجي طقم وياه

5- لحافين 2 (خفيف ومتين)

6- شنطة أغراض النونو ...عدد 2 كبيره وصغيره

7- شنطه نحمل فيها النونو ..

8- شباحات 3نيوبور + 3 زيرو تو ثري..... بشكل مؤقت لاول اسبوع ولاده فقط .... بعدين عقب الولاده اشتريت اكثر وعرفت بالضبط سايز بنتي وعرفت شنو المناسب ليها

9- بجامة نوم 2 كل وحده سايز.... اخذتهم ولا استخدمتهم .. دايما كنت استخدم الشباحات لانهم بيجودووون الحفاظات

10- قبعات 3

11- جوراب وقفاز 1 .. مو ضروري

12- فستان.. ما استخدمته لان بنتي كنت الفها بالقماط واريح لها بالشباح

13- صديريات وراهم نايلون ..لايلعوزون ثيابهم بالزوع والحليب ..
ما استخدمتهم لان رقبتها صغيره وخفت عليها ... استخدمت ليها الفوط الصغار

14- طقم فوط التنظيف الصغار .. وحتى نحطهم على كتفنا اذا بنجشي النونو

15- طقم بدكير منكير ويجي وياه مشط وبروش .. من مذركير

16- مصاصه 1

17- مرضعتين اصغر حجم 2 للماي والشاي
مرضعه متوسطة وكلهم يكونون unti-colic مضاده للغازات ..

18- حلمات مشابه للصدر عشان مايحس البيبي بالفرق ويفضل المراضع على الرضاعه الطبيعيه

19- معقمة مراضع... ضروووووريه ... لاتقولين بتعقمين ادوات البيبي في الماي عالفرن وتخلينهم يفوحون ... ترى ان نسيتينهم بالغلط راح يختربون من الحراره .. انا مجربه هالشي .. فالمعقمه ضروريه واحسن حل

20- ثيرمومتر

21- أدويه للمغص : انا اخذت ماء الحيج وماء الحلوه وماء المرقدوش وبعد ماء الحندبان .. كلهم يجون ست مع بعض .. مخصصين للاطفال منذ اليوم الاول.. انا شربت بتي مقدرا 5 ملل عند الحاجه .. ماء الحيج يمشي البطن .. وماء المرقدوش للمغض .. وماء الحلوه يهديء البيبي وللمغص بعد .. وماء الحندبان عن ابو صفار.... عطيتها اياهم من اليوم الاول والحمدلله وااااجد خفف عليها الالم .... ولاتنسين انتين اشتري لش ماء الحندبان اذا فيها ابو صفار والمرقدوش عن المغص لك ولبنتك واشربيهم قبل لا ترضعين عشان يوصل للبيبي من الحليب وبعد يهدأها ..


22- بودره للسر ماركة تايرسور .. Tyrosur

23- فوطة سباحه ام قبعه 1

24- فوطة لتبديل الحفاظات حجم أصغر 2

25- طربال اسفنجي لتبديل حفاظ الطفل للبيت

26- طربال للشنطه

27- ستاند سباحه يكون على شكل كرسي من القماش

28- السفنجه الصفره المخصصه لتسبيح الطفل

29- حوض البيبي

30- سفنجه لجسم البيبي.. ما استخدمتها .. ايدي انعم على جسم بنتي

31- طقم سباحه .. شامبو صابون كريم باودر .... اخذت ماركة سيباميد الطبيه للبشره الحساسه .. حلوه وخفيفه


32- دولاب او مجرات لثياب النونو.. ضروري

33- كلينكس مرطب وحفاظات

34-قطن واعواد اذن

35- ماء مخصصل لتحضير طعام الاطفال + شاي ميلوبا

36- سخانة ماي ومراضع كنت اتوق اني ماراح احتاجها لان صيف بيكون وقت ولادتي .. بس بعد الولاده احتجتها

37- كرسي للسياره.. حصلته هديه

38- لعبة للسرير.. اهيء اهيء لليوم ماشريتها خخخ كل يوم اقول بكره

39- قفص اللعب.. مو مهم ..

40-كرسي للبيت.. حصلته هديه

41- فرشاة تنظيف المراضع.. ضروري

42- صابون غسل ملابس الطفل الخاص: جربت الوردي والبنفسجي .. ثنينهم ماسببوا حساسيه لبنتي .. بس من ناحية التنظيف حبيت البنفسجي اكثر..

43- علب الحليب للشنطه



واذا ذكرت شي راح ارجع لعيووووووووونكم