|
محتاجه وقفتكم معاي
السلام عليكم .
كيف حالكم خواتي ان شاء الله بخير بصراحه مو عارفه اشتكي لمين وش اسوي وكيف اتصرف الموضوع يخص علاقتنا انا وزوجي بقول لكم باختصار شديد لان المواقف طويله وعشت ايام وفترات صعبه جدا جدا لدرجة ماتتخيلوها المهم ان اكتشفت ان زوجي مدمن حبوب كبتاجون وهذا السبب الرئيسي لكل مشاكلنا من تقلبات مزاجه وانعدام الميزانيه والنكد في البيت والحبسه لاطلعه لانشوف احد لاحد يشوفنا واختلاف الاراء والردود الغبيه اللي تستفزني وتسبب مشاكل كبيره وفجوه كبيره بيننا زوجي اكتشفت كم مره ومره انه ياخذ فلوسي على انه بيصرفها على شي وتختفي بعذر سخيف ومع تكرار المواقف فتحت عيني وصار مايقدر يمشيها علي ابد ومن هنا بدينا نختلف بالاسابيع والشهور ولا اتنازل ويكبر الموضوع وتوصل للسب والاهانات والتجريح مليون مره كرر هالموقف معاي ويحطني بمواقف سخيفه مع اهلي وصديقاتي والناس استحي والله اتفشل مثلا موقف صار كنا بنركب ستاير للبيت وقال عطيني الف ادفع العربون وراح الالف وبعدها قال بدفع حق الستاير وخلاص جابوهم وانتهى الموضوع رحت مع اخوي ابغى افصل كنب قال الباكستاني ترى زوجك ماعطاني الا العربون والباقي كله وحق التركيب قال بعدين ولاجاب شي يعني انا ادفع مرتين ادفع للستاير وللبيت واكون دفعت لشي ثاني الله يعلم هو حلال ولا حرام وكم مره اذا نزل راتبي تهل عليه اتصالات ربعه ودايما ردوده طيب بشوف بسال بكلمك بعدين ايه لا بعدين بكره بمرك بتصل كله كذا وكل شوي جايين للباب ربعه زي المجانين تعبت من هالعيشه وفي الليل لما انام معاه ريحة حلقه مقززه كانه مادة كيماويه ويرتجف يدينه ورجوله ومايعرف ينام يتنقز كل شوي بشكل مقرف وطول هالسنوات يمثل ويكذب مره يقول وهومعصب شفت حادث قدامي ناس ميتين ومارعف انام ومره يقول رجولي تعبانه من الدوام ومره يقول احلم احلام تخوف وظليت امشي امشي امشي طول هالسنوات وبيخلص عمري والاعذار ماخلصت وخلاص صار مفضوح ومابي يجي وقت يصير الشي علني قدامي خلاص ماتحمل بيوقف قلبي صار يكلم ربعه ويطلع لهم واشوف اكياس صغيره بكل مكان ماياكل 3 ايام بس دخان ومواصل ماينام وبعدها ينام 3 ايام وللعلم من قبل انا عرفت ورحت مع خاله الامل وظل شهر وطلع انسان جيدد وكلها كم شهر ورجع زي قبل وانا خلاص قلبي واعصابي ماتتحمل انسان مهمل متقلب مزاجيته احسه مرضني مره ساكته ومره اضحك ومره ابكي ومره افكر ومره ارق ومنعزله عن العالم مو عارفه اعيش سعيده معاه وسامحت وصبرت وصبرت وصبرت ومقصر في حقوقي كلها انا اصرف وانا اطلع بناته وانا اعزم وانا ادفع فواتير وانا اجدد البيت وانا اسوي صيانه واجيب اغراض ومقاضي خلاص مليت اتطلق ولا وش اسوي كل شي سويته بالطيب بالهواش بالتهديد بالسكوت مافاد شي اعذروني كلامي مخربط بس والله مو عارفه وش اقول ومواقفه ماتخلص كم مره خانني بمقابلات مع زميلات عمل ومسن وواتس وصور وكم مره تعرف على شباب على انه بنت يحولون له فلوس وكم مره كذب علي وكم وكم وكم بس الافلام الاباحيه اللي اشوفه جد جد قطعها وماعاد يتابعها او يرسلها شورور علي يابنات حاليا هو طالع من امس وماجا وقلت له لا يجي والبيت بيتي انا وعندي بنتين هو ماكمل دراسه ولا يبي يكمل ويشتغل يوم ويطلع انا اللي درست وتعبت وسهرت وضحيت وسويت وصبرت شورو علي انصحوني خففو عليي تعبت |
رد: محتاجه وقفتكم معاي
الله يعينك على ما بلاك اظن انه العيشه معاه اصبحت مستحيله واصبح وجوده او عدمه لا يفرق شيء خصوصا انك انت حامله البيت والبنات والمصروف على عاتقك لذا اطلبي الطلاق تخويفا له واذ لم يتعظ اطلقي جد
لانه بصراحه تصرفاته راح ادمر نفسيتك وحياتك كلها يا رب يصلح الحال و ما تضطري للحل الاصعب وهو الطلاق |
رد: محتاجه وقفتكم معاي
انا فعلا احس اني تدمرت اكتئبت واحس اني ميته اوانا عايشه ماعرف ابتسم ولا اشوف شي حلو في الحياه ومرات والله اقعد اسغفر الله اقول متى اموت لاني تعبت
ماحس اني متزوجه ولا اقدر انسى خياناته احس اني مجروحه وقلبي محطم مهشم ومايعطيني فرصه جتى تلتئم الجروح واليوم كلمته قلت له ابغى ورقة طلاقي قال لي احلمي اطلقك وتحرميني من بناتي وظلي كذا معلقه في بيتك وماراح تشوفي وجهي احس هو خايف من المحاكم يقول لي انتي قليلة ادب واسلوبك دنيء ولسانك طويل وهو فعلا احس انهار لين اضرب نفسي واشتم واصرخ واكسر ادعولي ربي يخفف علي احس تعبت |
رد: محتاجه وقفتكم معاي
علاقتنا مافيها اي احترام ولا ثقه ولا اخلاص ولا اي شي
اتوقع منه اي شي واحسه يستاهل يتسوى فيه وينقال له اي شي وحاولت انسى واعدل بس كل موقف يصير يذكرني بالمواقف نفسها اللي صارت طول هالست سنوات انا عندي بنت عمرها 3 ونص وبنت عمرها شهرين |
رد: محتاجه وقفتكم معاي
لا حول ولا قوة الا بالله
الله يهدي قلبه وعقله ويرده لك أبغض الحلال الى الله الطلاق حاولي تدخلي حد من اهلك او أهله او اصدقاءكم المشتركين احكو معه بالحسنى بجلسة هادئة تذكريه بأخرته تذكريه بالحلال والحرام وتحاولي تلمسي ضميره يمكن حاولتي هالمحاولات كتير ... بس العمر بيمشي وانتي حرام تضلي عايشة بهالجو استخيري رب العالمين وادعيلو من قلبك وان كنتي ميالة الو وقلبك مستعد يسامحو اعملي المستحيل وحاولي تلمسي وجدانه وان حسيتي حالك خلاااص مش قادرة تتحمليه ومافي بقلبك محبة له اتركيه ورح ترتاحي نفسياً والحمدلله انك مستقلة مادياً والك شغلك وحياتك مارح تضيعي يمكن تتغير وقتها حياتك للأفضل وتنتبهي أكتر لبناتك ولدينك ونفسيتك مستقر بدعيلك من قلبي ربي يجبر عنك ويفرج كربك |
رد: محتاجه وقفتكم معاي
حبيبتي احسن شي تطلبي طلاق لانك تتكلمين بسلبية وادا ضل الوضع هيك رح يسير اسوء ﻻيش اتقولين انتي ميت ﻻ انت عايش وتستحقين تعيشي احسن عيشا وتربين بناتك وتعيشيهم بي استقرار نفسي حبيبتي كيف نفسيت بناتك اكيد هما يحسون فيك ويشفون ويسمعون سب وشتم وتكسير وعايشين فرعب كيف بنتك لما تكبر رح تكون عندها قابلية لزواج ودا تزوجت وغلط فيها زوجها او ضربها رح تقول عادي ماما كانت تصبر وانا رح اعمل مثلها مارح تحطلو حد حبيبتي ﻻاشجعك على طلاق بس اوقات يكون طلاق رحمة ترحمي بيها نفسيك ونفسيت بناتك ومستقبلهوم
|
رد: محتاجه وقفتكم معاي
لا حول ولا قوة الا بالله
الي عودة لانك موضوعك بدو وقت |
رد: محتاجه وقفتكم معاي
الله يعينج انتي الي لازم تقررين شوفي ضروفج مجتمعج بيتج يتقبل فكرة الطلاق والاهم زوجج ممكن انو ينصلح لو فقدتي الامل انتي بحالة انهيار عصبي واعصابج تعبانة حاولي تاخذين وقت تريحين بي نفسج وعدها فكري بهدوء والله يخيرلج البي صالح الج ولاطفالج
|
رد: محتاجه وقفتكم معاي
انا اضطر اودي بنتي بيت اهلي اذا بتكلم معاه الحمدلله مو قدامها ولا كانت بنتي الحين بسم الله عليها نفسيتها دمار
احاول اعطيه قدر وقيمه وهيبه قدام الناس وابين ان مابيننا شي وانا مايهمني الناس ولا كلامهم ولا المجتمع تهمني راحتي وماعرف وين راحتي كل اللي يسويه مجرد تخدير والحمدلله اقدر اصبر واتحمل وانسى بس لما ينعاد الموقف اتذكر كل شي بتفاصيله لان مو راضي يخليني انسى اللي راح انا اعصابي تتلف لان يسوي شي كبير ومايحس بحجم غلطته وبدال لايعتذر يطلعني غلطانه ويقول انتي نكديه ولسانك طويل وهو يوصلني للصراخ والصياح اسلوبه جدا ينرفز لما اتكلم معاه وهو هادي بكل هدوء ورايق مايرد يحقر ويقوم عني يشيل جواله ودخانه بكل هدوء بدون مايتكلم ويخليني قاعده عالكنب واروح له بكل هدوء الغرفه واكمل كلامي ويطلع من الغرفه وهو ساكت . يعاندني ويكذب واكتشف بعدين انه يكذب علي يقول ابغى فلوس اصلح السياره واعطيه واكتشف ان السياره لسه خربانه وماحط القطعه فيها وماشراها اصلا يقول اكلت برا وهو ثلاثه ايام ما اكل شي عشان يخبي ان ماله شهيه بعد الحبوب تعبت والله وابيه ينصلح وجيت معاه بكل الاساليب لا خليت طلعات ولا فنادق ولا لبس ولا شياكه ولا جلسات صلح ولا نصح ولا كلام باللين والطيب ومسامحات وصفحات جديده مانفع جيت بالصراخ بالتهديد بالحقران بالتهميش بالتجاهل مانفع دخلت خاله واخوي وتعالج في الامل ورجع زي اول واكثر الله يكون بالعون ادعولي باللي فيه الخير لي وحده قالت لاتعطيه فلوس طيب نص الليل لو البيبي تبغى حفاضات يطلع ولا يرجع الباقي ونتهاوةش لو فلوس الشغاله اعطيه يحولها ياكلها لو اعطيه يطلع للمطعم ياخذ الباقي كيف ماعطيه واللي تقول لاتكلميه كيف معاي في البيت وماكلمه وسريرنا واحد كيف اتصرف عجزت جربت كل شي ماعرفت ماقدرت |
رد: محتاجه وقفتكم معاي
مشكورين على ردودكم ربي لايحرمني منكم
وبانتظار الباقي |
| الساعة الآن 05:31 PM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Friendly URLs by vBSEO 3.6.0 (Unregistered)
لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .