منتديات حوامل النسائية

منتديات حوامل النسائية (https://naqatube.com/index.php)
-   منتدى أنواع الحمل (https://naqatube.com/forumdisplay.php?f=32)
-   -   أستفسار عن جنس الجنين ممكن؟؟ (https://naqatube.com/showthread.php?t=60215)

الصدر الحنون 06-03-2011 01:54 AM

أستفسار عن جنس الجنين ممكن؟؟
 
السلام عليكم ورحمة الله وبركاته



حبيباتي الأمهات اذا ماعليكم أمر حبيت أستفسر عن شئ بسيط
ومن حكم خبرتكم بالحمال أبي رايكم..
أنا حامل ولله الحمد كل أسبوعين موعد سوناري في الأسبوع السادس عشر قالو الجنين جنسه ان شاءالله ولد وكأنه متأكد بعدها بأسبوعين قال دكتور ثاني بنفس المستشفى الجنين انثى ..
صراااااااحه استغربت شتفرق اسبوعين فقط ؟
وقبل 3 أيام وأنا بأول يومين بالخامس حسيت بتعب رحت مستشفى آخر أتطمن على الحمل وقالت دكتوره ان شاءالله بنت
أنااااااااااا اقول الحمدلله بنت والا ولد اهم شئ الصحه والعافيه يارب ويتمم حملي ان شاءالله ماتفرق معاي انا وزوجي..
لكن مستغربه ان اختي وحماتي حمل واللي فيهم بنت وشكل البطن عريض وبالجوانب وكل من شافهم عرف انه بنت..
لكن انا بطني مرتز جدام وشكله دائري مرتفع كأنه كره وماعندي جوانب وكل من شافني قال ولد ..
أختي قبل حملي بشهر حلمت أن عندي تلفون وشكله حلو وقلت لها توني شاريته.. وسبحان الله بعدها بشهر حملت

حتى اخوي حلم انه عطاني تلفون وحلمت زوجي عطاني تلفون يديد والحلم الثالث ان اخوي الصغير عنده تلفونين وخيرني اخذ واحد فيهم..
والمعروف ان حلم التلفون ولد صح والا انا غلطانه؟؟
وغير هالشئ يدتي سوت لي طريقة العيايز قديمه هي اللي تحط قلم رصاص وبالممحاة ابره وخيط وحطتها على كفي طلع ولد والله أعلم؟
وانا الحمدلله من بداية حملي بس اكل موالح ماني شفقانه عالحلى
فسؤالي هل ممكن يخطأ السونار؟
أو هل ممكن اعضاء الطفل لو كان ذكر ماتتكون او ماتبان عدل الا بآخر شهرين؟؟
لأن مرت اخوي كانت حامل وقالو لها بنت لما كانت بالشهر الخامس وسبحان الله بالشهر التاسع يالله بين ولد وصج يابت ولد الله يحفظه

والله نعمه من رب العالمين ماتفرق كلها زينة الحياة الدنيا بس عشان لا أتسرع بالتجهيز للطفل ..
فياليت تفيدوني الله يرزقكم الجنه

الصدر الحنون 06-03-2011 02:33 AM

رد: أستفسار عن جنس الجنين ممكن؟؟
 
الله يجزاها كل خير من تجاوب وتعطيني على حسب خبرتها

فولة 06-03-2011 03:11 AM

رد: أستفسار عن جنس الجنين ممكن؟؟
 
واللة ماعندي فكرة بس ال.سونار يخطأ دائما
ماصدق كلامهم الا بشهر الأخير

rose 06-03-2011 03:15 AM

رد: أستفسار عن جنس الجنين ممكن؟؟
 
عادي ممكن السونار يخطئ انت انتظري للسابع وشوفي

الصدر الحنون 06-03-2011 03:17 AM

رد: أستفسار عن جنس الجنين ممكن؟؟
 
فراوله


يعطيج العافيه حبيبتي لاهنتي


مشكوره واااااااااااااايد عالمرور

ام اسكندر 06-03-2011 04:48 AM

رد: أستفسار عن جنس الجنين ممكن؟؟
 
بالنسبة للتجهيز جهزي ابيض للاربعين
وبعد الاربعين اشتري له او لها كل شي مناسب له
وخصوصا انه حتجيكي هدايا كمان
وبشكل عام احلى شي للمواليد سواء بنت او ولد الابيض لانه يفتح بشرتهم لانها تكون حمراء وصفراء وزرقاء مع المغص
كل يوم لون مع البكاء

وبالنسبة للنونو انا كمان اعرف ان الجوال ولد
وانا حلمت سليفتي ان معايا جوال وفعلا جبت ولد
بس ترى ماتصدق الاحلام لان في كثير تخيب ظنهم احلامهم وتطلع العكس

وبالنسبة للبطن ترى بعض الناس مش دايما يكون عندهم البطن المكورة ولد والبطن العريضة بنت
صح انها الغالب عند الحريم
لكن في بعضهم في كل حملهم يكون البطن عريض سواء ولد او بنت
وبعض الحريم في كل حملهم بطن مكورة للامام سواء بنت او ولد
الحريم طبايع

زوجة اخويا عندها ولدين وبنتين وفي كل حملاتها بطنها عريض لانه طبع جسمها كذا في الحمل
وأمي العكس في كل حملاتها سواء ولد او بنت البطن للأمام
وصاحبتي عندها بنتين .. البنت الاولى بطنها عريض وتوحمت ع الحلو وجابتها بنت
وبنتها الثانية بطنها للامام ووحمها ع المالح وجابتها بنت كمان

يعني مافي شي يصدق الا الولادة الفعلية عشان تعرفي ايش معاكي

وبالنسبة للسونار وكلي امرك لله
الله اعلم ايش الصدق فيهم
فكرتيني بجارتنا قالولها عندك ولد وفرحت وجهزت لولد وزوجها فرح
ويوم ولدت وجابت بنت عصب زوجها يوم بلغوه وقال انتو غالطتوني وكاان حيجيب لهم قسم الشرطة يبلغ ع المستشفى انهم بادلوا ولده واعطوه بنت
قاموا الدكاترة راجعوا ملف الام وراجعوا السونار السابق لقوا ان الحبل السري كان امام فرج الطفلة فخلاهم يعتقدوا انه عضو الولد

ويالغلا ولد او بنت كله نعمة وماهي مشكلة عوية الملابس جهزي بس حق الاربعين ابيض
وحتحصلي ان شاء الله هدايا كثير وممكن تخلي بعد الولادة اي حد من اهلك يشتريلك بدلتين ع حسب جنس النونو اللي انولد

محتارة بزماني 06-03-2011 03:33 PM

رد: أستفسار عن جنس الجنين ممكن؟؟
 
اذا كان جسمك مليان ماتبان مسألة البطن بس اذا كنت حامل ببنت تكون البطن غير مرتفعة جدا وكانها حزام حول الخصر ملفوفة بس اذا كانت البطن زي الكورة ليكدام اعتقد انه ولد وانتظري للسابع يبين تمام بالسونار وانشالله ربك يعطيكي الي تتمنيه يارب

الصدر الحنون 06-03-2011 09:56 PM

رد: أستفسار عن جنس الجنين ممكن؟؟
 
تسلمون حبيباتي لاهنتو على الرد والافاده
حبيبتي الاخت اللي قالت اذا كنت مليانه لا انا قبل الحمل وزني 58 نحيفه ماني مليانه
والاخت اللي قالت الجوال ولد انا حلمت اكثر من مره والسونار قال العكس
وان شاءالله اللي عندها بعد افاده بهالشئ تبلغني

اغليك يا الجنوب 06-03-2011 10:29 PM

رد: أستفسار عن جنس الجنين ممكن؟؟
 
مادري والله انا بعد للحين ما تاكدت من جنس البيبي اهم شي وباذن الله يكون بخير وعافيه وتعدي لحظات الولااده على خير
الله يعطيك ما يرضيك غلاي
دعواتك

الصدر الحنون 06-03-2011 11:43 PM

رد: أستفسار عن جنس الجنين ممكن؟؟
 
تسلمين حبيبتي بنت والا ولد نعمه من رب العالمين
ولكن شئ فضولي ودي أعرف عشان ارتاح


الساعة الآن 11:14 AM.

Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Friendly URLs by vBSEO 3.6.0 (Unregistered)

Privacy Policy - copyright

لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .