[أم أيوب]

السلام عليكم ورحمة الله

أنا زمان ما دخلت المنتدى .. لكن سيرة رمضان غير .. بتجذب الكل ..

المهم بالنسبة لعاداتنا فهي مختلفة انا ما الي غير سنة ونص متزوجة يعني ما حضرت غير رمضان واحد مع زوجي .. ورمضان هالسنة بتكون مع زوجي وابني الله يحفظلي اياهم ..
قبل الزواج كان رمضان بالكويت اما بعد زواجي فصار رمضان في غزة :)
حتكلم عن رمضان العام السابق يعني في سنة أولى زواج .. كنت وقتها حامل بالشهر السادس وكان الجو حرررررررر كتييييييير .. بس مع ذلك صمته كله ولله الحمد .. كنت اصحى الساعة 10.30 الصبح ومرات الساعة 11.00 .. وبقوم بشوف شو عندي طبخات لهذا اليوم وببلش احضر في الاكل .. وبالنسبة للسفرة لازم يكون فيها شوربة وسلطة وبعض النقنقة يعني سمبوسة بطاطا مقلية ناجتس دجاج عجة خضار أصابع الجبنة المقلية يعني اي نوع مقبلات ومو لازم يكون نفسه كل يوم .. بس اهم شي لبن اب والتمر .. والأطباق الرئيسية كتيييييير ومتنوعة .. وانا اهم شي عندي يكون في رز :) وما بننسى الحلى بكون اما عوامة او حلب او تشيز كيك ومهلبية وعيش السرايا وغيره وغيره .. وطبعا الأكل بكون بعد صلاة المغرب يعني بالاول بنفطر على لبن وتمر وبعدين بنروح نصلي وبنرجع نكمل فطارنا .. وبعد الفطور بننزل عند دار عمي << اهل زوجي وبنضل نتحدث لحتى يأذن العشاء وبعدين بنروح انصلي العشاء والتراويح وبس نخلص بنروح نتمشى انا وزوجي وأوقات بنروح عند بيت أهلي أو خواته او خواتي بس الحين مو عارفة اذا حنروح نتمشى او لا لأن هالسنة معنا بيبي صغير والعشاء بكون بوقت متأخر من الليل الساعة 10 بالليل بتبدأ الصلاة ... بس الله يعينا على الصيام وعلى حر الصيف .. ومع الرضاعة الله يستر :) .. وبالنسبة للقرأن انا ختمت القران السنة اللي فاتت مرتين وطبعا احلى وقت لقراءة القرآن بالنسبة الي كان قبل الفجر بنص ساعة ولحتى تطلع الشمس .. وبعدها بنروح نام للصبح .. وأكيد هالجدول راح يتغير مع استاذ ايوب المحبوب .. لأن النوم والصحوة على مزاجه بتكون ... بس مع ذلك بضل رمضان غير كل الشهور سبحان الله اله فرحة لا توصف حتى لو كان فيه تعب بالصيام ..
بالنسبة لسؤال الاخت فلسفة حب الاكله الجديده اللي نفسك تسويها في رمضان ؟
ما في شي محدد بس نفسي اجرب كل الوصفات اللي على الانترنت وتزبط معي :) ..

وأخيرا ادعو الله ان يبلغكم رمضان وينعم عليكم بالرحمة والغفران والعتق من النيران ..