انا مع التقارب في السن
بالنسبه لي اشوفه افضل .. كل واحد يفهم على الثاني عشنا نفس الحياه
مرينا بنفس التجارب .. وبالنسبه للنضج الزواج لحاله يخلي الحرمه او الرجال ينضجون
مو معناته اذا كان فيه تقارب راح نلاقي المره تحس انها كبيره والرجال بيكمل هبل في حياته
بالنسبه لي تزوجت وعمري 23 سنه وزوجي اكبر مني بسنه بس
وغير كذا عايشين بغربه لحالنا عشانه مبتعث
والحمدلله امورنا ماشيه .. شايلني من جميع الجهات
أحسه ينتبه لي كثير ويخاف علي ويلبي لي كل طلباتي
ولا مره حسسني انه مجبور يقعد معي
مع انه يقدر يطلع ويسهر مع ربعه خصوصا هنا الأماكن حلوه وكثيره
بالعكس صار اذا طفش نطلع حنا الثنين مع بعض
ايام الخطوبه ماكان يقعد في شقته دايم ادق عليه طالع او يدق علي من برا
الحين من جامعته للبيت ومن البيت للجامعه
بينما اعرف كم وحده من صاحباتي رجالهم اكبر منهم
ويعانون من طلعات الإستراحه لآخر الليل
او تهور أزواجهم وعصبيتهم
اللي ابي اوضحه ان التقارب ماله دخل بالنضج
النضج شي نفسي .. ياما نشوف شباب صغرا بالعشرينات ونحسهم ناضجين اكثر من رجال بالثلاثاثينات والأربعينات
والزواج لحاله تجربه تخلي الإنسان ينضج ويكبر عقله
انا بالنسبه لي افضل انه يكون قريب بالعمر وأكثر شي يكون بينك وبينه 5 سنوات
اكثر من كذا احسه زياده عن اللزوم .. انا رفضت كم واحد والسبب العمر
والحمدلله ربي رزقني بزوجي قريب مررره مني في العمر
تفكيرنا واحد .. عشنا بنفس الفتره
مرت علينا نفس لتغيرات .. طفولتنا نذكرها بنفس الاشياء ونفس الالعاب
شي مرره حلو