انبشرك اني كتبت هالرد 5 مرااات ويارب يوصلك هالمرة تعبت بجد ... الايام الاولى: ويارب ترجعي لحوشك بالسلامة ليك وللنونوات لازم تجهزي حجرة تستقبلي فيها العيله واتحطي فيها سرير فردي لانك رح تكوني تعبانه من الخياطة واختاري مفرش حلو وانيق من توا وننصحك اتخلي صغويرتك في دار نومك ما يشوفهمش كل واحد لان العين حق اتسبلي قولي راجلي راقد معاهم او راقدين او الدكتور قال مناعتهم اضعيفه ومش لازم ايخش اعليهم حد الا امهم دبري راسك نصحتك لله في الله - ولو انتي فاضيه هالايام ومكسدة خوذيلك فكرة من النت وزيني باب الدار طبعا اتكون الشكلاطة من اول مرة جاهزة على الطاولة في علبه او سله او صندوق انتي واختيارك واشري اي نوع اتحبيه انا انفضل جالكسي جواهر وميرسي وقدمي معهم عصير اي نوع ما يهمش لانهم مش برانيه ومن اتخشي شهرك وقبل موعد عمليتك بايام بري اشري من مراه معروفه ومشكورة او معمل 3 انواع حلويااات مثلا: المقروض الليبي الرائع وخوذي معاه نوعين تانيين للتقديم وقدميهم مع الشاهي او القهوة وبعدها انتم وعوايدكم احني لازم طبيخة الحلبه والعصيده وانحطوا فاكهه وفي النهاية للعيلة انديروا طاسة شاهي باللوز