السلام عليكم ورحمة الله وبركاته ...
ساليتو ... كيف حالك ياحبيبة وكيف حال البيبيات ... طبعا كالعادة ... مواضيعك لازم يطيحوا بين ايديا .... هههه
آني حنقولك بالنسبة لعاداتنا كطرابلسية ... والبرنامج اللي ماشية عليه عيلتنا الفترة هادي ... ماهو كل فترة موضة ... ههه
برنامجنا ياستي كالتالي ...
طبعا اول ماتجيبي في العيادة لازم يكون عندك شكلاطة قنينة كواليتي ستريت او باتشي او فيريرو روشيه ... لأن كيف بتجيبي يعني لأنك نضتي والحمد لله بالسلامة اول حاجة توزعي شكلاطة على الممرضات اللي في القسم اللي جبتي فيه وكان في دكتورات ودكاترة موجودات وفي هادي الحالة اكثر حاجة اطيح كمية كبيرة كواليتي ستريت... وبعدين القراب منك هلبة اللي بيسمع بيجيك .. زي عماتك وخالاتك والخوات ... وامالي راجلك زي عزوزتك وحماواتك وكان عندك سلفات واماليك طبعا هما في الغالب اللي بيستلموا تقديم الشكلاطة للي بيجي في العيادة .. وبيكونوا القراب هلبا .... باهي ..
وبعدين كيف تطلع النافس من العيادة .... يبدوا الناس يسئلوا يقولوا شني بتدير اسبوع والا نلموا بعضنا وانجوا والا بتدير هيا لمات في الحوش وهادي كل حاجة وليها برنامجها... طبعا في حالة ان يسمعوا بيها انها بتدير اسبوع فكل واحد يشد مكانه لين تجيه عزومة السبوع ... لكن في الأسبوع الأول ... يجو في حوشك العمات والخالات وكان الحناني موجودين يعني مش شرط يعتمد على المقربين في العيلة ... وامها طبعا وكان عندها وخيات لازم للعوالة طبعا كله كله يوم والا يومين هادوا كان العمات يلموا بعضهم في هضاكا اليوم وهادي جية الأقارب هلبا يعني كمعزة خاصة انهم ماعتبروش روحهم برانية وبيقعدوا للصالة بس فيجوا ... والجية هادي اللي يندار فيها .. عصير وشكلاطة " مش روزاطة وعبمبر " بحكم ان في اسبوع بعدين ... وبعدين طويسة شاهي معاها حلويات .. وفي الغالب في الأيام هادي تكون الحلويات الزمنية يعني مقروض وغريبة وكعيكات ... وبعدبن ياحنة ... " العصيدة بالرب " " وعصيدة بالعسل والسمن " لازم يكونوا موجودين الخيارين .. بش اللي مايحبش حاجة ياخد الثانية ...
وبعدها على حسب في اللي يكتفوا بالحاجة هادي بس .. وفي اللي يدير فاكهة او فروت سلط .. وبعدين كان تبي تعطي كويسات مكسرات بما اني مانشوفش فيها لازمة ماداما بعدين في اسبوع او الأفضل عندي انها تندار المكسرات في متيرد كبير ومعاه صوينيات صغيرة وكلينكس ويلودوا بيه بعد الحلاوات والشاهي وقبل العصيدة آني انحب اللقطة هادي اكثر في الحوش احلى من الكويسات .. وهادوا ياحنا الأقارب هلبا ...
كويس ... وبعدين في اليوم السابع .. انديروا العقيقة .. اللي هوا ندبحوا ... وتصير عزومة رجالة ... عندنا اللي يديروا فيها في الصالة وعندنا اللي يديروا فيها في الحوش " كل قدير وقدره " .. يدبحوا ويديروا حاجة بصيلة " رز بالبصلة والا كسكسي " ومعاها سلاطة ومسير وزيتون ومعاها بوريك وامبطن او واحد منهم كان تبي وطبعا المشروب وبعدين الفاكهة ..... وفي اللي يقول للعمات وبنات العمات والخالات وبنات الخالات والقراب في هذا اليوم يجوا بش يحضروا ويعولوا في نفس الوقت البنيات ههه ويصير جو يهبببل في هادي الحالة كيف يعرفوا انهم يوم العقيقة بيجوا فمايجوش يوم قبلها يقعدوا ليوم العقيقة ..
وبعدين تحدد موعد اسبوعها آمتى ماتبي وتوتي برنامجها ...
وبش نضمن ان الرسالة ماتمتسحش وتكون طويلة هلبا توا انكمل الباقي في رد ثاني ...