مرحبا اخواتي و عزيزاتي كيفكم ان شا الله تكونون باتم الصحة والعافية ,,,,
مشكلتي مشكلة اتمنى اجد النصيحة و الفائدة و المواساة لي على مشكلتي ,,,,
زوجي تعب نفسيتي و دمرها بسبب راسه اليابس و عناده و اصراره على تصرفاته الغلط يسهر تقريبا كل يوم يروح الى مكان لعب القمار يطلع من البيت من ساعة 10 مساء و مرات ساعة 8 مساء يرجع الى ساعة 6 صباحا طبعا هاي قبل كا كان يسوي بس هسه ضاعف المدة السهر و قام يجي للبيت لساعة 3 الظهر يعني مثلا يطلع من البيت من ساعة 10 مساء و يرجع الى ثاني يوم 3 ظهرا و مرات 2 الظهر ,,,, و يرجع هلكان من تعب السهر و جوعان و يريد بس يرمي نفسه بالسرير وينام و اضافة للخسائر المادية و الغضب مبين بوجه و نفسيته زفت ,,, ويروح ينام بالساعات الطويلة و اني باقية بحالي صافنه على جدران البيت و اني في بلد الغربة ,,, كلمته اكثر من كذا مرة مرارا وتكرارا تكلمت معه بالطيب و اللين و الادب و مرات بالزعل و البكي بس ميفيد يعمل الي براسه حتى لو كان غلط لا يتقبل النصيحة لا من اخت كبيرة ولا مني و لا من اي احد من البشر شخص مغرور بكل معنى الكلمة و متكبر و اهله من اساس تربيته معلميه على الدلال الزايد بحيث ميسمع احد و اني المتضررة لان اني الي اعيش وياه و متحمله كل سلبياته ,,,, بالنسبة الي اني احاول قدر الامكان ارضيه و حتى على حساب رغباتي ,, البس اله و احاول اسوي اله اجواء حلوة ورمانسية بس ميفيد تعبت ,,, كل شي سويت وياه ميفيد البارحة اتوسل بيه ميطلع من البيت و قفت عند الباب حتى امنعه من الطلعة و اتكلمت وياه و نصحته ميسمعني يصير عصبي حتى باوقات هو هاديء و زين هم كلمته ميسمع يقول اي ميخالف اني هم اريد اترك اللعب بس شنو الفايدة ما عنده كل ارادة و لا اصرار ,,, البارحة طول الليل ابكي من القهر و حزنانة وقلت اله انت مو قلت اني اريد اترك اللعب ليش ترجع و تروح يقول اي من اكون خسران كذا اقول ,,, و يقول اي غيرت رأيي اريد اروح ,, انتي مالك اي دخل ,,, شسوي اله اقوله خليني اساعدك ميفيد ,, و الى هسه هو خارج البيت و بمكان لعب القمار لان مكان لعب القمار 24 ساعة مفتوح ,,, لتكولون اخاف ممرتاح بالبيت او اني ممريحته اني محتاجة للمساعدة و تكلمت بكل امانة و صدق عني و عن وضعه ,, لان حتى من نروح سفرة سياحية من يشوف مكان لعب القمار كل الوقت يقضيه بها المكان ,,,, احس نفسي اعيش وحدي و انسانة خالية من اي شي و حتى كابة بدت تصير عندي ,,, نسيت اكر شي اخر فلوسه كلهن خالهم على قلبه و يصرف كم هائلمن الفلوس في القمار و اني من اطلب شي منه مينطيني و اذا نطاني فلوس بالتعب و الجهد الجهيد اخذ الفلس منه و يحاسبني عليه و مصروف شهري ما عندي كلمته و قلت اله انطيني مصروف خاص بيه شهريا حتى لو شي بسيط يطنش و من لحيت عليه و صلت الى مرحلة الاذلال ياله نطاني و كم شهر و قطعه عليه بس على قد اكلي وشربي معه و مرات من اريد اشتري كم قطعة ملابس مناسبة اسعارها ياله ينطيني للامانة اكثر من هذا الشي ما اشوف منه.
خواتي نصحوني شنو بعد اسوي وياه حتى يبطل السهر و طريق القمار الي راح ينهيه على الاخر و راح يحرقه ويحرق فلوسه و يدمر حياتنا ,,, عذروني على الاطالة بس قلبي مشتعل بنار و القهر كتلني و حتى اوضحلكم حالتي و معاناتي ,,,
و شكرا جزيلا لكم مقدما
تحياتي للجميع