أنا كنت مركبة لولب وبشيلته بعد طهارتى من الدورة وبعدها بحوالى أسبوع لقيت نازل دم افتكرته الدورة وقولت جايز تغير فى الهرمونات عشان شيلت اللولب , المهم لقيته فعلا بينزل بنفس طريقة الدورة وابتدى يخلص بالتدريج ويفنش زى الدورة وبعدها لقيت الدم ابتدى ينزل تانى زى أول يوم فى الدورة ورحت لدكتور وعمل سونار وقالى انى الدم اللى عليكى دورة واللى فات كان نزيف ومكتبش على أى علاج على أساس دى دورة وتكرر نفس الموضوع مع الدم اللى عليا واتصلت عليه ان الدم بعد ما وقف رجع تانى بغزارة قالى ده نزيف وقالى أخد برشام كابرون ودايسينون وبرشام منع الحمل ومشيت عليهم حوالى 3 أيام وقف الدم ونزلت افرازات بيضة وقلت للدكتور قالى وقفى برشام النزيف وكملى منع الحمل ال21 يوم المهم بعدها مفيش يومين وحسيت بالام فى الرحم شديدة والدم نزل تانى والدتور قالى خدى 2 من منع الحمل هيوقف النزيف وبقيت ألاقى الدم يوقف شوية وينزل شوية ومنتهاش ومفيش افرازات بيض وكل أما أمسح بالمنديل ألاقى فى دم حتى لو مش بينزل وكنت حاسة انى الدم بيقل بالتدريج قولت خلينى لما يخلص وفعلا استمريت على برشام منع الحمل وقبل ما اخلصه بحوالى 5 أيام مكنش فى دم بينزل وبعد ما خلص نزلت الدورة وبعدها لقيت الدم رجع تانى روحت لدكتور تانى عملى أشعة مهبلية وقالى انى المبيض اليسار شكل حجمه كبير شوية وده ممكن يكون طبيعى بس نعمل أشعة للإطمئنان وعملتها (أشعة سونار ومهبلي) ودكتور الأشعة قالى كيس دموى أو تجمع دم وده بناخد برشام ينشفه أو يتفتت بالليزر وحسسنى أنى الموضوع عادى ومش مقلق وبعدين زوجى راح للدكتور بالأشعة وقاله ده تجمع دموى ينشف بالعلاج ومش محتاج عملية ان شاء الله وفعلا مشيت على العلاج اللى كتبه ومن أول يوم الدم اترفع وخلصت العلاج وروحت استشارة قالى الحمد لله انسى الموضوع ده تماما خلاص انتهى ومقالش ان فى أى مشاكل (معلش طولت عليكى بس حبيت أحكيلك تجربتى مع التجمع الدموى بالظبط)
وان شاء الله خير المهم تشوفى دكتور كويس وبيفهم وسيبها على الله