خشي ع مواضيعي ياقلبي القديمة
بتلاحظي موضوع لي نفس موضوعك اطلب نصايح قبل قيصريتي
وحتستفيدي من ردود البنات في موضوعي
المهم بالنسبة لاسئلتك
اولا انا كنت بنج كامل وفوقوني بعد العملية مباشرة في غرفة العناية المركزة من ضمن غرفة العمليات
وكنت بوعيي تمامآ مع شوية دوخة
يعني تحسي نفسك مليانة نوم لكن بعقلك ماتهلوسي ولا شي
وافتكر ان اول مافقت كلمت الممرضة اللي جنبي بسألها انا ايش جبت ويلا وروني ابني جيبوه من الحضانه
ومديت يداتي اتحسس بطني هل راحت الكرشة وولدت فعلا لاني ماحسيت بولادتي كوني نايمة خلال العملية
خلوني ساعة بالعناية وبعدين طلعوني غرفتي وقعدت اتكلم مع زوجي واخويا واختي واتصلت لامي واقاربي
ونزل زوجي للحضانة صور ابني وطلع لي الصور بالكاميرا اشوفه
وجاني ابويا واخواني
كل هاذي الاحداث خلال اول 3ساعات بعد العملية
يعني لاتحسبي انك حتكوني دايخة ومهلوسة
بالعكس حتكوني بوعيك لكن مع دوخة خفيفة تحسي انك تبي تنامي
بالنسبة للسؤال الثاني
الشعور الرغبة بالنوم يستمر نصف يوم فقط
لكنك بوعيك ومصحصحة وتشوفي الكل وتكلمي الكل
تراني ماشالله بعد 3ساعات من العملية مسكت الجوال وارسلت للكل ابشرهم بقدوم مولودي
بالنسبة للسؤال الثالث
مافي اي خياطة
حتخرجي من غرفة العمليات وجرحك ملتئم بالليزر
مجرد هم كل يوم يسوولك مطهر ويغيرو الشاش
وبعد عشر ايام ترجعيلهم يشيلو الشاش بالمرة ويطمنو عليكي
وخلال هاذي العشرة الايام لاتوصلي الماء عالعملية
اذا تبي تتروشي غسلي اطرافك بدون وصول المويا لبطنك
اما لما يشيلو الشاش تروشي عادي بس نشفيها مزبوط وامسحيها بالمسحة الطبية
بالنسبة لاخر سؤال
دامك عارفة انك عملية اشربي حبتين حديد باليوم عشان ماتحتاجي نقل دم
انا دكتورتي نصحتني وقالت طول الشهر التاسع خذي حبتين حديد يوميآ
والحمدلله ماحتجت نقل دم
هما ينقلو الدم للي نسبة الحديد في دمها ناقصة
وكنصيحة لما تشربي حبة الحديد خذي معها برتقالة او عصير برتقال
لان فيتامين سي يسهل امتصاص الحديد
ولاتجمعي حبة الحديد مع حبة الكالسيوم عشان مايكسرو مركبات بعض
وقعدت يومين بالمستشفى وخرجت ثالث يوم الصباح
كل مستشفى لها نظامها
انا المستشفى اللي كنت فيها نظامهم للقيصري تخرج ثالث يوم
اه نسيت اقول
لو القسطرة اتعبتك اطلبي من الدكتورة تشيليها
اختي شالتها بعد 12ساعة من عمليتها
وانا شلتها بعد 24ساعة
ونصيحة اخيرة
امشي بنفس يوم العملية
يعني بعد العملية في الليل لو زوجك معاكي خليه يوقفك ويمشيكي
حتحسي بتحسن وتتعافي اسرع
وامشي قدر الامكان يوميآ في ممرات المستشفى اخر الليل لما مافي احد
وربي يقومك بالسلامة
ماشالله ياوميض ماني مصدقة ان ولادتك قربت
دوبنا كنا مع بعض في تجمع الاشهر الاولى
سبحان الله مسرع تمشي الايام
ربي ينولك شوفة مولودتك بالسلامة
ويرزقك برها وصلاحها