السلام عليكم ورحمه الله
باختصار ده حلم كل البنات من واحنا صغار كنا نشترى العروسه ونلعب لعبه انا الام والعروسه بنتى دى غريزه طبيعيه فينا واحلى حاجه فى الدنيا لما تشوفى ضناكى فى حضنك وضحكه بريئه تنسيكى هموم الدنيا يارب ما يحرمنا جميعااااااا من اننا نكون امهات
باختصار نفسى اكون ام نفسى البس الفستان الواسع نفسى امشى فى الشارع واقول لكل الناس حبقى ام نفسى فى ضمه طفل نفسى اسمع كلمه ماما
نفسى اكون ام نفسى البس الفستان الواسع
نفسى اعيش الحلم والحلم يبقى واقع
انا متاخره فى الانجاب بقالى 7سنين والشهر ده هبدا فى 8سنين ومازلت ولازلت اقول ظنى فيك ياسندى جميل
حياتى تعبت فيها كتير من اول جوازى من سفر جوزى وغيابه عنى وبعد 3سنين عمل الدوالى وانتظرت بعدها سنيتن على امل يحصل حمل وعدى 6سنين
وفجأه رحمه ربنا وسعت كل شىء لقيت نفسى حامل بدون حسبان وكانت فرحتى مابعدها فرحه وخصوصا كانت اختى متجوزه فى نفس الشهر ده وعرفت انها حامل وكنا احنا الاتنين مع بعض ودى كانت اكبر فرحه لاهلى وليا وفجأه بردو الحلم بقى كابوس اتخطف منى قبل ماافرح بيه فى نفس اليوم اللى رحت فيه اسمع النبض واشوف كيس الحمل بكل فرحه ولاول مره فى حياتى اشوفه قالتلى الدكتوره لازم ينزل نزل عليا الخبر ذى الصاعقه كسرت فرحتى حسيت انى مت وانا عايشه ودموعى ملت المكان وقلت انا لله وانا اليه راجعون
ودخلت العمليات ويشاء القدر ان عمليه التنضيف تكون يوم عيد الام كانت صعبه عليا اوى وكنت لوحدى فى الغربه بعيده عن اهلى وقلت يارب هون واخر حاجه نطقتها قبل مااروح فى التخدير رب لاتذرنى فردا وانت خير الوارثين
الشهر الجاى يبقى عدت سنه ولازلت انتظر صغيرى
بدعى ليل ونهار وببكى ليل ونهار لدرجه انى ساعات بقوم من النوم الاقى دموعى على خدى
وفى مره جوزى داخل عليا بيقولى نفسى اخلف بقيت اصبره واهون عليه وانا قلبى هيتقطع ومش مبينه ليه ودموعى مليا عنيا وماحدش حاسس بيا
ساعات بضعف واقول خلاص حلم الامومه بدا ينهار وارجع اقول الحمد لله على كل حال واصبر نفسى وافتكر قول الله تعالى ( واصبر لحكم ربك _ ولسوف يعطيك ربك فترضى _وبشر الصابرين ) صدق الله العظيم
ومازال الامل وحسن الظن بالله لاينقطع وادعى واقول
يارحيم لاتكتبنى عقيم
يارحيم لاتكتبنى عقيم
يارحيم لاتكتبنى عقيم
الهى انت تعلم كيف حالى
فهل ياسيدى فرج قريب
فيا ديان يوم الدين فرج هموما
فى الفؤاد لها دبيب
وانسنى باولادى واهلى
فقد يستوحش الرجل الغريب
ولى شجن باطفال صغار
اكاد اذا ذكرتهم اذوب
ولكنى نبذت زمام امرى
لمن تدبيره فينا عجيب
هو الرحمن حولى واعتصامى
به واليه مبتهلا اتيب
الهى انت تعلم كيف حالى
فهل ياسيدى فرج قريب