حسبي الله ونعم الوكيل
اذا انتي سنة ونص وشفتي الاهانة والذل والضرب
انا ليا 6 سنين متزوجه وزوجي جدا جدا انسان عصبي ويحب كل شي على كيفو بداية زواجنا
ماكان فيه شي والله وثم والله مني مقصرة في حقو ولا شي من بيت من جماع مامني قصور
وفوق هذا كلو يهينني ويضرب بس مو الضرب المبرح بس في النهاية اسمو ضرب واذا فيه ضرب يعني مافي احترام
وكل ماازعل اروح لاهلي ويعرف انو انا زعلانه مااكلمو يرجع يتصل كل يوم كل شوية وانا عشان احبو ارجع
لا وفوق هذا كلو ابشرك مايجيب بزورة عقم شايفه ومومقدر انو انا عايشة معاك وحارمة نفسي من البزورة
لكن اخر شي يخونني واكتشف واواجهو ويعترف ويبطل ويرجع تاني والشهر داه وانا رايحه لاهلي في السيارة
يعني مافي نية زعل قاعد يتفلسفف ويجرح في الكلام واذا موعاجبك روحي لبيت اهلك
ووصلت بيت اهلي وقلتلو ماراح تشوفني بعد اليوم قام طنش كلامي لانو عارفني برجع لكن والله وقفتو عند حدو
وكلمت بابا وطلع كل الي في قلبي قام قلي خلاص انا اكلمو وكلمو وقلو خلاص بنتي ماراح ترجعلك وقام قلو لا مقدر اطلقها انا احبها ومن الكلام داه طبعا بابا مايبغى يخرب بيتي وجاني وهدى الموضوع ولمن جاه يبغى ياخدني قعدت انا وبابا وهوا وقعدت اقول كل الي في نفسي ابغى وابغى وعن الضرب والاهانة والعادات السيئة وشوفيني رجعت ليا اسبوعين لين دحين الوضع تمام والله انو حس في قيمتي وسار يتكلم بهدوء طبعا في زلات بسيطة بس هوا طبعا ماراح يتغير في يوم وليلة ...الله يهديه ويصلحو
اما عن وضعك انتي انا ماراح اقلك اطلقي ولا تغضبي شوفي احنى في زمن ملهيات ومافي بيت يخلو من مشاكل وانا اقلك هي بعد روحتي لبيت اهلي وقعدت هناك وذهني صافي عرفت اشياء كتير وانو كل الناس الي بتنصحني انو ماارجع وانو ارجع كلهم في كفه وحياتي مع زوجي في بيت لوحدنا في كفه تانية ومحد راح ينفعني اذا اطلقت وبرضو محد حينفعني اذا قعدت معاه في بيت لوحدنا وعلى الخيانة ترى كل الرجال لازم يغيرو وينفهو عن نفسهم حتى لو كنا احنا كاملين وهمو عارفين اننا محنا مقصرين لكن طول منتي عندو في البيت اعرفي انو مايبغى يتركك وانو انتي الي في القلب بس احنى بالنسبة ليهم العمر كلو والي بيسوه مع البنات نزوة والنزوة من الشيطان مدامو بعيد عن ربنا حيسوي كده وانا مو مع الي يقلك بيتك وولدك لا احنى بشر ونحس وانتي لازم لازم لازم تستخيري وحطي ربنا قدامك صدقيني ربنا وحدو الي حينور طريقك انا استخرت وقريت ياسين وقعدت ابكي وقلت يارب اذا فيه خير عدلو واصلحو واذا فيه شر ابعدو واصرفو ونمت ساعه وصحيت لقيت 5 مس كول و3 مسجات كلها احبك ومقدر اعيش من غيرك صدقيني محد في الدنيا كلها راح يفيدك ويخترلك الخير غير ربنا يااختي في الله احنى ولاية والرجال سند اليوم في ابوكي واخوكي بكرة مافي وربنا يخترلك الي فيه الخير والله يعطينا على قد نيتنا ويرحمنا برحمتو وطول منتي قاعده استغفري وقولي يارب رحمتك تنزل عليكي سكينة موطبيعية وحتنشغلي في ولدك وحطنشيه وخليه هوا الي يجيكي.... والله يهدي سركم ان شاء الله....
ومعذرة على الاطالة.....