[أمل ليبيا]

نبي نفضفضلكم ومعليشي تحملوني لو طولت لكن قتلني السكات والدموع اني زوجي انسان طيب وحنين وخلوق ويحبني بصدق وجربت في هلبا مواقف ولقيته جنبي وبصدق بس لايخلو الانسان من العيوب اني كان حلمي بيت صغير مستقل بسوره ونعيش اني وياه مرتاااحه بس هو كبير العيله وبوه مريض من زمان وهو تحمل مسؤلية اهله كأنه بوهم مع انه مهندس نفط لكن ماقدرش يتزوج لين زوج خواته كلهم وعالج بوه وتحمل مسؤلية العيله وبعدها بدا يبني ودار حوش ماشاء اللعه كبير وزي العسل لكن امه شرطتت قتله نبي نسكن جنبك ابنيلي قبل ع خاطر حوشها قالت قديم ويبي صيانه المهم بنالها حوش صغير في نفس صوري وقبل العرس قتله ارفعني عمره ورفعهاوتخيلو واحد خاش ع عرس بمجهوده الذاتي فقط يعني مفروض استقرار ولدها اهم المهم ماقدرش يكمل الحوش كله خلاه ع الزواق وخدا جناح بس كمله وتزوجنا فيه وفي العرس جابولي كسوة وذهب اقل مايمكن هو مقدراته لكن امه بالذات كان بأمكانها تساعده لانه من يوم مادار مرتب وهو راجعلها المهم في عرسي مشت شرت تاكم وحرير لروحها ومن رابع يوم العرس واني بحنتي دخلتني للمطبخ نطيب للعيله كلها بروحي وفي العرس والثالت والاسبوع دارتلنا مشاكل واهلي تحملوها فوق من النفس المهم وشرطت لازم لما تطلعو تقولولي واي حاجة تخش لحوشي والله حتي فطور الصبح لازم يجبلها قبلي مع العلم هي بمرتبها وعندها اربع شباب يخدمو وعزابه بس هي هكي المهم بنحاول نختصر والله العظيم خلتنا ع الحديدة ديما تطلب في فلوس وتوصي ع القضيه وكله من زوجي اني عشت اكره شهور ماحسيتش روحي عروس كل ماديرلي حاجه نخش نبكي وخلاص متقيده لانطلع ولامستقله ولما سافرنا خديت معظم اثاث الحوش وخديت لابتوب زوجي وخدت معاهم فلوس مرتبه نزلو بعدنا وصوري مدايره فيه جداول خضرة ومخازن ومخلياته حاله وحوشي حاليا تستعمل فيه علي مانوصفلكم استغلاليتها لينا مانقدرش رغم انها مش محتاجه ومن لما تزوجت بدت تلبس ع الموضه وتمكيج في المناسبات والحنة ماطيرش منها والله تقولو عروس هي مش انا رغم انها كانت تلبس في شاربات كبار وجلباب فقط توا تغيرت وللاسف لما صرتلي مناسبات والله اهلي بروحهم الي وقفو جنبي وهي زي الضيفه المهم حسيتها هي سبب تعاستي كلها