التكملة
على الساعة 6 الصباح من يوم الاربعاء ابتدت الام الطلق تشتد مثل ماقلت لكم وصرت مو قادرة اسيطر على نفسي قمت اصارخ ومن الحركه انقطع سلك المغذي وانفتح جهاز التخطيط وصرت اصرخ عليهم اني ابي كمام البنج والدكتورة تصارخ علي وتقول بتنادي الاستشاري يسوي لي عملية والسسترات يساعدونها يصرخون علي يقولون ليه ماقلتي انوا ماتتحملي الالم ودخلتي عملية وريحتينا , حسبي الله عليهم بولاداتي السابقه بالموسى ماكنت احس باي الم وكنت انام وقت الطلق ومانتبه الا لحظة خروج الراس وحتى الخياطه مااحس فيها مع مخدر الكمام .
وصرت اقول للدكتورة ان مستشفى الموسى افضل منكم , فتواخذت على نفسها وقالت عطوها الكمام , وربي انبسطت عليه وصرت اشم وانسى الالم واحس بخدر خفيف في جسمي يسكن الالام , وماامداها دقايق الا بديت احس بالالم صار اسفل البطن وصرت احس ان البيبي بيطلع والام فضيعه في المثانه ياااااه كل ماتذكرت هالموقف وهالبهدال اموت من القهر , حتى مستشفى الحكومة مايخلون الوحدة تتعذب بالهعذاب وقت الطلق , بس هذا يبين قل خبرتهم واهمالهم للاشياء اللي ممكن تسبب مضاعفات بعد الولادة .
وعند الساعه 9,30 في صباح يوم الاربعاء الحمد لله رب العالمين ولدت طبيعي , ومع خروج الراس تمزعت وصارت شقوق , الغريب انهم ماعندهم اسرة متخصصه للولادة وولدت على نفس سرير الطلق , وصارت تقول يالله ادفعي على شان تطلع المشيمة , بس انا انهكت وماقدرت ادفع وخاصة ان الام المثانة مستمرة , وصارت تضغط بطريقة مؤلمة على البطن وتعصره الى ان طلعت , وقتها التفت على طفلي ابي اشوفه وابتسمت لما شفته كامل الخلقه ويصارخ , بس اللي استلموه هم السسترات وهم اللي نظفوه وقطروا في عينه وقصوا السرة , وبالعادة في كل المستشفيات يستلمه اخصائي اطفال .
بس مو قادرة ارتاح لان جا وقت الخياطه واشيل همها واقول للدكتورة طيب عطوني الكمام الان
وتقول لا حعطيك ابرة بنج , وماسوت شيئ واموت من الم الخياطه وانا اطالع في الخيوط واتالم , بعدها حطت لي تحاميل مسكن للالم , انا اول مرة احس بالم الخياط وحاولت استحمل الى ماخلصت وقالت لي انها استخدمت خيوط تجميلية وانها بتعطيني مرهم جروح يزيل اثر الخياط .
بعد ماخلصت حسيت ببرودة شديده وصرت ارجف وجات السستر غطتني بلحاف وانا انفض واحس بالام مغص في البطن مثل الطلق راحت الدكتورة وقالت ان دوامها خلص , بس انا مازلت اتالم وراحت السستر نادت الدكتور , وجات وصارت تضغط على بطني وتدخل صبعها وانا صرت اتلوى من الالم وطلعت مثل التجلطات من الدم وقالت انها هي اللي تسبب الالم ..
دخلت امي وزوجي وباركوا لي وصرت اشكي لامي وانا خايفه منها تلومني لانها قالت لي قبل لاتروحين للاحساء متخوفة ان ماعندهم خبرة , وعاندت ورحت لهم مثل المسحورة ..
وامي جالسه جنبي ناديت السستر توديني الحمام وانتوا بكرامة لان انحصار البول مسبب لي الام وضيق , ورحت وهم ماقدرت ... بس تنظفت بالحمام ولبست ملابس غير
وجلستني على كرسي وقالت انتظري ربع ساعة ودخلي بعدها الحمام ,, واجلس مع امي وتسولف معاي اشوي وبعدها ادخل الحمام واخيرا ارتحت وكان الاحتباس شيئ خيال وكان الالم فضيع
استغربت ان كل هذا كان متخزن بجسمي والحمد لله ان ماسبب لي مضاعفات وقتها على هالالم اللي سببه لي وقت الطلق .
يتبع