السلام عليكم ورحمة الله
بداية معاناتي كانت في هالموضوع :
http://forum.hwaml.com/t304213.html
واستمريت على هالحاله شهر وإسبوع وأنا منومه الين جاء اليوم الموعود
وقالت لي الدكتوره لازم نعطيك طلق صناعي بيوم الاثنين 3 نوفمبر
طبعا أنا كنت حاسه إنه ماراح يطلع طبيعي والأسباب هنا بهالموضوع :
http://forum.hwaml.com/t306510.html
بعدها استخرت وتوكلت ع الله وقلت راح آخذ بنصيحة الدكاتره اللي هو طلق صناعي وولاده طبيعية
في اليوم الموعود قالوا لي مافيه سرير بالعنايه للجنين وانتظري لبكرى ولما جاء بكرى نقلوني لغرفة الولادة وكشفوا علي طلع الرحم مفتوح 2 سم وقالت الدكتوره لازم نعطيك تحميلة مهبلية تفتح الرحم زيادة لأن الجنين صغير والمويه تقريبا جفت
ولما عطوني اياه بدت معي آلام شديدة ولكن الغريب إنها ماهي تقلصات يعني طلق جدا غريب !!
تعذبت ساعة كاملة وزوجي ماسك يدي ويهديني وبعدين جت الدكتوره فحصتني قالت لسا 2 سم وشوي نزل نبض الجنين نزول رهيب واستمر بالنزول واخترشوا وأخذوني ع غرفة العمليات وجلست أبكي من القهر أكثر من الألم لأني من البداية قايله لهم حاسه إنه مو طالع طبيعي وأبي عملية للأسباب اللي ذكرتها بموضوعي فوق
وماشاءالله العملية تمت بسرعة بتخدير موضعي وسمعت صوته يبكي وقلت لهم أبي أشوفه ويسلكون لي قالوا الحين نجيبه لكن للأسف أخذوه للعناية قبل أشوفه
وودوني لغرفة الإفاقة ولما بدا يروح البنج جتني آلام قوية جدا وتخف شوي مع المسكنات
ودوني لغرفتي نفسها بجناح التنويم وهنا بدت حكاية ثانية
بديت أحس بآلام طلق شديدة جدا جدا وجتني الدكتوره بكل بساطه قالت طبيعي لأن مفعول التحميلة ياخذ وقت!!
تخيلوا حجم الألم النفسي والجسدي اللي تعرضت له
نفسي ماشفت ولدي وجسدي ألم طلق + ألم جرح العملية !!
ومن بكرى طلعت للعناية ع الكرسي المتحرك وشفت ولدي
سبحان الله يابنات دخلت يدي بالقزازه اللي هو فيها وأول ماحطيتها ع راسه فتح عيونه يطالعني
وحطيت اصبعي بيده ومسكني بقوه
يابنات إحساس لايوصف وكنت ممنوعه أشيله بهاليوم
ومن بكرى شلته وضميته والحمدالله
طلعت أمس من المستشفى وهو باقي عندهم
وإن شاءالله كلها كم يوم ويطلع
وهذي قصتي باختصار
والحمدالله أولا وأخيرا
وهنا نصائحي الخاصة لكل الكروشات عشان يتجنبوا الأخطاء اللي أنا ارتكبتها بحق جنيني خلال فترة الحمل
http://forum.hwaml.com/t307067.html
واسأل الله تعالى أن يسهل ع كل الحوامل ويرزق المحرومات