السلام عليكم ورحمة الله وبركاته
لا اعرف كيف سابدا موضوعي لاني اذا اردت سرده بالتفصيل فلن انتهي ..
باختصار انا ما اذكر مرة اني اعطيت حياتي شيء تستحقه واقل ما فيها الدراسة والتعليم .. في البداية كان كل همي اني اخلص بكالوريا وااخذ شهادة وما افكر بالتعليم وفعلا حصل .. انهيت ثانوي وخطبت وبكل فترة خطوبتي اربع سنين ما حملت دفتر وقلم او كتاب وقرأته .. كنت اتابع البرامج الترفيهيه ستار اكاديمي وسوبر ستار وغيرها من برامج حتى صلاتي ما كانت تمام وكان عندي مشاكل ما حدا بيعرفها غيري انا ورب العالمين .. كان الكل يقولي ادرسي وانا ما اقبل اكتفي بقول ما صدقت ايمتا خلصت مدرسة بدكم ترجعوني كمان مرة للدراسة مع اني كنت شاطرة ومتفوقة بس كنت مهملة ولامبالية .. وما افكر بشي غير كيف امضي حياتي باللعب والضحك والاغاني والرقص .. المهم تزوجت وهلأ انا في بداية السنة الثالثة من الزواج وربنا لسا ما رزقني الذرية بحس انه بعاقبني وبستاهل هالعقاب لانه صلاتي مو صلاة وحياتي مو حياة الايام اللي بجلس فيها بالدار وبكون زوجي بالشغل بلتهي بالموبايل والانترنت .. بينما كل رفقاتي استغلو حياتهم ووقتهم باشياء مفيدة ودرسوا ونجحوا وتخرجوا .. من بداية الزواج شعرت باني غلطت اكبر غلطة بحياتي وهيي عدم الدراسة ودخول الجامعه .. رجعت افكر بالتعليم بس في شي بخليني اخاف بدي اتعلم بس بخاف لاني انا ما فيي ما اشوف امي كل يوم ولما بفكر اني بدي اتعلم بقول ما رح اشوف اهلي مليح وازا بدي ادرس رح تأخذ فترة الدراسة وقت كثير مو اقل من اربع سنوات يعني ما بعرف بحس اني مو جريئة .. وبرجع بقول طيب مرقوا اربع سنين من عمري هيك وانا مخطوبة وهلأ كمان ثلاث سنين راحوا هيك ويروحوا كمان ثلاث سنين بس لشي مفيد .. ما حكيت لحدا عن هالموضوع وما بقول لحدا اني ندمانه على العمر اللي ضيعتوت هيك بس الكم انتوا بحت بهالمشاعر 😥
ساعدوني اعطوني نصائح من تجاربكم في الحياة لو سمحتوا ...