[sweet moon]

//




الحمدلله , بعد ماإنتهينا من صلاة العشا ..


وانا قاعد ابي ذا يخلص عشان انشب له مرة ثانية واقوله خلاص ترى خلصنا الصلاة يلا وشو هالشي


إلا وألقى الإمـآم يآخذ الميكروفون ويقول : اللي جآيين عشان الجلسة يروحون الغرفة الخلفيه بجوآر مكتبة المسجد


أنا بديت أتلفت يمين ويسـآر يآهوهـ وش الطبخهـ ووش جلستهـ


شفت العالم بدو بعضهم يقومون من اللي كانو حاضرين ويروحون لهالغرفة , والأكثرية كانو يطلعون من المسجد ..



وانا نظري منصب فقط للوآلد والعم وهذا الحبيب ..



::


شفت الوآلد جآيني وعليه إبتسامة عليها ألف تعبير , لا هي فرح ولا هي ذيآبه ولا هي ولا هي .. إلخ

وقالي : أمش يالله خل نروح للغرفه

قلت : وش غرفتهـ ووش السالفهـ طيب ..



قال : أبد أبد بس رقية شرعية نبي نرقيها لهـذا

ويقصد صديقهـ ( ص )



انا ماصدقت توهـ رآسي قآعد يفتر بصرآحهـ , بس قلت ياولد أمش معهم وخل نشوف وش نهايتها اليوم .




::



جينا عند بوآبة الغرفة وعليها وآحـد من العاملين في المسجد واقف و يـعد عدد الحضور في هذه الجلسة ..




غرفه كبيره جدآ جدآ جدآ !! , عليها سـمـآعآت ومضخمات كبيره على كل مكان في الغرفه ..

وفي الوسط يوجد مكروفون .



أول مادخلنا , وكان تقريبا عدد الحاضرين غيرنا من اللي جو 11 وآحد , وحنا 4 يعني كملنا الـ 15 وآحـد في الـ غ ـرفة ..



::


جا هذا ( ص ) ومسك يدي وقال : أبيك تقعد جنبي

وأنا بس قاعد أهز برآسي ومصاب في حالة من ( الفهـآوة ) من اللي قاعد اشوفه اللحين ..



العاملين في هذه الغرفه عددهم 3 , وجا واحد قاعد يقول اقعدوا على الجدار جنب بعض كلكم , وانا أقول بنفسي : عز الله اليوم فيه أكشن



أول واحد من جهة اليمين ( ص ) وبجنبه أنا , واللي جنبي الوآلد وبعدهـ عمي وبعدهـ البقية الموجودين ..



::



شوي الا ويدخل علينا شيخ ويآخذ الميكروفون ويقول : ياجماعة الخير قبل لا نبدأ الجلسة ..

اللي كان يدخن أو يعسل أو يشرب حشيش وشرآب وغيرهـ لآزم يبطل ويعاهد الله بالإمتناع عنهـ , لأن إنت شلون تبي ربي يعافيك بكتآبهـ مما فيك وإنت قاعد تعصيه ...



وأستمر تقريبا حوآلي الـ5 دقآئق ينصح فيها ويذكر طرق الإمتناع من المحرمات وغيرهـآ ..


شوي وقام يقرأ الفاتحه بصوتهـ الجميل ماشاءالله تبارك الله ..

وكآن الصوت عالي جدا , لو أحد جنبي يصرخ ماراح اسمعه ..

وأنا بس كلش قاعد أسمع التلاوة ومنزل رآسي للأرض ..



شوي اشوفه يقول للمساعدين اللي معه وهو بنص قرآيتهـ ومآزآل يقرأ , ويأشر لهم أنهم يربطون عيون ثلاثة من الجهة الأخرى ...


وأنا أشتغل فيني عرق الفضول وقاعد أناظر لأقصى اليمين ابي اشوف وش صاير هناك ..


ومامدآني أناظر واشوف وش فيه ...


إلآ والشيخ يقرأ الآية : وَاتَّبَعُوا مَا تَتْلُوا الشَّيَاطِينُ عَلَى مُلْكِ سُلَيْمَانَ وَمَا كَفَرَ سُلَيْمَانُ وَلَكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ ... الآية


والله مآمدآهـ يكملهـآ ! ولا أمدآني أكمل نظرتي للشعب اللي هناك وابي اشوف وشوله ربطو عيونهم !



الا والحبيب هذا اللي جنبي يطيح رآسه على كتفي ..


جيت لمسته قلت : بسم الله وش فيك


إلآ ويفتح عيونهـ ويهيج علينا بصوت !

أقسم بالله كانت الأبواب تتحرك من قوتهـ !


ع ـيونهـ !


والله لونهـآ آحمر وطآلعه لبرآ وأنا بحياتي ماشفت هذا المنظر الا بالتمثيل والأفلام !


ولكن هالمرة أمام عيوني ! ولا وبيني وبينه اقل من شبر !



يعني رآحت عليك ياسعود !



::


قـآم يصـآرخ بصوت غريب جدآ ومخيف لأبعد الحدود !

ويسب ويشتم بالشيخ ويقوله : أسكت أسكت , قفل فممك لا تقرا !

والشيخ يشد بالقرآءة وهو يلتف حول نفسه ويركض ويضرب بالجدآر بأقوى ماعنده !

وأنا أنآظر بشـآعة المنظر والضربة وأتخيل إن ألمها يجي في جسم المسكين هذا صديق الوآلد لكن مو بيدهـ ..


لدرجة ! إني أسمع صوت عظآم رقبته من قوة الضربه اللي يضربها لنفسه !


مرآت على رآسه ومرات على كتفه ومرات يتسدح ويلف ويرافس ... إلخ !




::


شوي يأشر الشيخ بيدهـ على هذولي الإثنين اللي معه وقالهم بحركات يدينه أنهم يربطون يدينه ورجوله .. وجآبو وآحد ثالث معهم يمسك معهم ويشد من أزرهـم ..



طيب اللحين صار كل وآحد معه قطعة قماش جافة جدآ عشان ماتنقطع بسهوله , وماسك يدهـ اليمين والآخر اليسار , والثالث ماسك الرجل اليمنى , طيب بآقي رجل فاضيه !


أشوف هذا اللي ماسك رجله يأشر لي يعني تعال وأمس معنا ...



قمت وعطاني قطعة قماش مثل اللي معهم ...


ووالله !


إن توني حطيت يدي بس على طرف رجـله , الا ويلتفت علي بسرعه وبحقد !

ويشيل نفسه ويطير أبونا كلنا ! وقـآم يبي يطق وحآلته حآلة بس الحمدلله قدرنا نبعد عنهـ ..




::


الشيخ تعب من شدة القرآءة , والآخرين اللي كانو معنا بالغرفه كل حـآلآتهم كانت فقط حسد أو مس خفيف أو عين ..




أما هذا حـآلته كانت الأقوى فيهم , وهي دخول ( جني ) فيه ..



الشيخ جا عند الوآلد قال : روحوا للمكتبه حق عند الشيخ الفلاني بتحصلونهـ هو أقوى مني بالقراءة وإن شاءالله يشفيه لكم بعد الله .

الوآلد قال أوكي وقمنا انا والوآلد وعمي ..

وهذوليك الثلاثة مساعدين الشيخ ماسكين هذا ويسحبونه عشان ياخذه للمكتبه ..

شوي الا ونسمعه يقول : أدري أدري تبون تاخذوني عند الشيخ فلان بن فلان !

وجآب اسمه الكآمل !



::


سحبوهـ بعد عنآء شديد جدآ الى غرفة هذا الشيخ وجينا نبي نخش قال : لا اعذروني ممنوع تدخلون لان والله ماراح تتحملون اللي بتشوفونه


جآ الوآلد يحاول يقردن فيها منا مناك ... مآفيهـ .


جلسنا بجنب الباب ونسمع وش اللي يدور بينه وبين الشيخ ..


وحنا فقط في حآلة ( ذهول ! ) وآضحة على ملامح كل وآحد منا ..





_____________________________________
______________________
____