حبيباتي:
بعرف إنو كتير منا بعتمد على كلام الدكاترة حرفيا وما بناقش وشو ما صرفولنا أدوية بناخدها من تم ساكت ...
لكن الله يجزيها الخير أم دانة نبهتني لشغلة مهمة ... قرأت ردها لأحد الأخوات كانت قايلة إنو الدكتورة صرفتلها فولترين وهي أخدتو ... وأم دانة وضحت إنو الفولترين يسبب انقباض الرحم وهاد موجود بالنشرة الي بتيجي مع الدوا يعني ما بناسب الحوامل لكن مع هيك الدكتورة صرفتلها إياه...
وكمان حبيباتي جارتي الدكتورة صرفتلها دوا للمعدة اسمو فامودار وهي حامل وكانت تاخد منو وقالت إنو كتير بريحها من الحموضة لكن بعد حوالي أسبوعين قرأت النشرة ولقت إنو ممكن يسبب إنقباضات تؤدي للإجهاض ولا يجب صرفه للحوامل
وآخر نهفة أنا كتبتلي دكتورة مرهم لقرص البعوض لإني صار جلدي كتير حساس مع الحمل وصار مكان القرص يتورم ويضل أيام وهو منتفخ وبوجع وبحك . والله هداني قبل ما أستعملو أقرأ النشرة وشفت فيها إنو بحتوي على كرتيزون ولا يجب استخدامه من قبل الحوامل لاحتمال أن يسبب تشوهات للجنين خصوصي في الأشهر الأولى (ترى رجعتلها وزفيتها)
الخلاصة حبيباتي لا تاخدو كلام الدكاترة مسلمات ترى هم بشر وممكن ينسو (مع إنو المفروض يكونو حريصين أكترر لأنهم في حالة الحامل بتعاملو مع روحين مش روح وحدة) وكل وحدة قبل ما تشرب أي دوا تتأكد من النشرة المرافقة ...
مع تمنياتي للجميع بالسلامة هني والبيبيات يا رب