انا صاحبة موضوع زواجي وفقداني الثقة بنفسي جايتكم معي حل وابي مشورتكم

[الروووووح]

مساء الخير
كتبت الموضوعهذا بد مابكيت وروقت
نمت الفجر كالعاده وزوجي على اللاب صحيت 7 وجيت جلست عنده ومازال على اللاب لما يشوفني جاية يفح صفحة الفوتشوب ويشتغل فيها ومادري شكان فاتح على العموم ماعاد صرت اهتم بس اجي عنده اذكره ان فيه انسانه موجوده معاه في البيت طبعا اكون لابسة قميصي وارجع انام وصحيت الظهر 12 صليت وغيرت لبسي وكشخت وتضبطت عشان اغير نفسيتي شوي للعلم اني فوق هذا ابتسم له واضحك معاه ولا كأنه صار شي وجيت جلست معاه ونفس الحالة فاتح صفحة الفوتشوب
اول مره افكر بنفسي شوي ماسويت غداء ولما شفته مو معي رحت نمت فيني صفه مو حلوة اذا تضايقت انام
صحيت 2 قبل ساعه واخيرا تحرك زوجي عن اللاب راح ينام والاكيد ماراح يصحى الا بكرة بما انه اجازته اليوم انا طفح الكيل بكيت من القهر ليه مايعاملني كأنثى وزوجة هو محترم معي ويحبني ويضمني ويضحك معاي لاكن عايش حياته بالطريقة اللي يبيها على العموم هو لا لما ينام مايقوم الا بكرة وانا اكون خلاص امداني بكيت ونمت وصحيت وهو نايم
جيت استأذنت منه اني بتصل على اهلي يرسلون لي السواق قالي طيب

حاليا افكر اروح لاهلي ولا ارجع الليلة وبيفقدني لاصحى بكرة
ابي اقسى عليه انا تعبت نفسيا وانا حامل مليت من الاهمال اللي يصير
لاتقولين كلميه كلمته ولانفع وهالشي خلاني انكسر اكثر واكثر لانه ماراعى نفسيتي ولاراعاني وانا اكلمه عن موضوع حساس بالنسبة لي واقوله انه مهملني بالفراش على العموم
تقترحون لما اروح لاهلي مارجع اكيد بكره حيتصل اطنشه ولا ارجع معاه
للعلم من زواجنا وانا ماعمري سويت مشكلة كبيره معاه بالعكس اتغاضى واساير حتى موضوع خيانته ماعمري صارخت عليه ولا قللت من احترامه يمكن عشان كذا شافني بوجهه وحاس انه مستحيل يفقدني

زوجي حاجته لي لشيئين بس هم اني اصحيه للدوام لان نومه ثقيل واسوي اكله لانه مستحيل يعيش اليوم من غير ماياكل كبسته لو يصحى المغرب

انا صرت انسانه حقودة على نفسي صرت ابكي لما اقرى بمنتدى زوج يتشكى ان زوجته مهملته وانه يحبها ليه صار الاهماليخلي الواحد يحبك اكثر
صرت ابكي لما اشوف اختي زوجها يجي ياخذها من بيت اهلي لانه يبيها ومحتاجها ماشاءالله تبارك الله الله يهنيها لاكن شي غصب عني انا توي عروس ماكملت سنة وبحياتي ماشفت نظرات اعجاب من زوجي هالشي كفيل انه يقتل مشاعر الانوثة فيني على العموم تأيدوني اروح ولا ارجع له الا لما يحس باهماله لي

[مس فتون]

غلط وستين غلط معروف اول سنه زواج يكون فيه اختلاف وكل واحد متمسك بالاشياء اللي كان متعود عليها قبل
انتي لا تتركين فرصه للشيطان
خليك مثل ما انتي اصبري وتجملي وكلميه مره ومرتين وثلاثه

[سوزان الرياض]

اختي انا مثل حالتك خاين وينافخ وكل وجع قلب عايشته معه
بس وش تسوين مالك الا تصبرين وتدعين ربي وتحاولين تغيرينه شوي شوي
بكرا ربي يرزقك بطفل ان شاء الله يغيره
يعجبني فيك انك فاهمه زوجك وفاهمه وش يحتاج
ان شاء الله يجي يوم ويفهمك واتوقع اذا شاف البيبي راح يتغير
انت في مرحله الحمل وراح تكوني حساسه شوي
اذا وصلتي شدي عليه شوي وغيريه
واشتري له ايباد قولي له يالله نطلع وادخل النت من ايبادك اسهل
وشوي شوي لما ربي يهديه
الله يهديه ويسخره ويتمم لك حملك بخير

[سوزان الرياض]

نسيت اقولك روحي لم اهلك وعيشي حياتك والدنيا فانيه
اذا ولدتي ابدي غيريه والله المستعان

[روح راقيه]

بصراحة انا افكر فيك من امس من بعد ما قرأت موضوعك

الله يعينك والله مو عارفه هل هو صح او غلط
بس لو كنت مكانك ممكن اسوي مثلك


بس انتي جربتي كل الطرق جربي هذا الطريق معه يمكن ينفع


بس لا يدرون اهلك عن شيء يعني الموضوع بينك وبين زوجك


ماله داعي تفشيلنه قدام اهلك


في بعض الرجال كل ما اعطيتيه يتمادا لازم تاخذين منه عشان يعقل


استخيري وتوكلي على الله والله راح يعينك


وللمرة الثانية لا تنسين الدعاء هو سلاح قوووي

[فاغره]

روحي بس قولي له بجلس كم يوم اغير جو احس اني متضايقه وطفشانه ودي اغير جو واجلسي كم يوم واذا رجعتي يارب يكون مشتاق لك ويعبر عن مشاعره واكيد بيفقد اقل شي اهنمامك

[om yosof]

أنا أأيدك في قرارك بس بقول لك ع شيء اول .. انتبهي لعلاقتك مع رب العالمين واعرفي ان مالك غيره لان القادر على كل شيء . ثانيا نصيحة لله لاتقارني نفسك باحد او ع الاقل حاولي لان هالشيء مدمر نفسيا بشكل غريييييييييييييب ويخرب بيوت والله يصلح لك الحال انتي وزوجك ويرده إليكي ردا جميلا ويبعد عنو الفتن يارب

[ام جوري&&]

جربي ممكن تنفع معه ويحس بفقدانك000 وتفائلي انه بيكون احسن 00 لاتصيري دايم تفكيرك سلبي00ودايم فكري انه بيكون احسن لاتفكري انه مستحيل يتغير وانك بتضلي على ذا الحال 0000واذا على النت كثيرين الوقت ذا مدمنين نت 000 لكن لا تخلي الافكار السلبيه تسيطر على عقلك 00 تفااااااااااااااااائلي 000شوفي سبحان الله يقولك الانسان فيه عقل باطني العقل هذا سبحان الله قادر الانسان انه يتحكم فيه وانتي طبعا اذا فكرتي باجابيه سبحان الله ذا العقل البطاني يخليك تتحمكي بنفسك وتشوفي انه لسه في امل 0000والله عن تجربه ذا العقل كنه سحر؟؟ قبل تنامي دايم حطي في بالك انه زوجك بيصير افضل والله بيتحسن الحال باذن الخالق000 وعلى نياتكم ترزقون احسني الظن بالله وابشري بالسعد 00والله يسخر لك زوجك

[ياسسسه]

كفو ووفو البنات مالي الا ادعيلك

الله يبعد عنه الحرام ويسخره لك يارب عاجلا غير اجلا
ويسعدكم ربي ويفرج همك واستغفري كثير بنية انه ربي يسخره لك

[زووووز]

انا مع راي الاخت روح راقيه
روحي عند اهلك بس لاتقولين لهم شي بس اشتقت لكم وحابه اقعد يومين
وخليه قصدك الاساسي بينك وبين نفسك

وهو اذا اتصل كلميه ببرود وحسسيه انك مرتاحه ومبسوطه انك قاعده يم اهلك
ولا تعطينها احساس انك زعلانه منه او مشتاقه له يمكن اذا حس بالاهمال شوي يخاف يفقد اهتمامك