سبب اجهاضي المفاجئ ..!!

[يارب أصير أم]

نزولا عند رغبة بعض الاخوات بمعرفة سبب إجهاضي ..

حبيت أكتبها في موضوع مستقل ..

أعذروني يابنات إذا فيه كلمات تؤذي عين القارئ لكن عشان أوضح لكم وعشان تستفيدون ..

وإللي عندها خبره في سبب إجهاضي ممكن تفيدني ..

لآستفيد منها وأحرص في الحمل القادم إن شاء الله ...

كان حملي تمام ولله الحمد .. وكنت في الاسبوع السادس ويومين ..
ما حسيت أن فيه شيء ماهو طبيعي ..
لا نزيف ولا شيء غريب .. يمكن حسيت في فترة أن فيني إلتهابات بسيطة ..
لكن بعدها راحت وما عاد حسيت بشيء ..

يمكن منكم من درت عن بداية خوفي من الاجهاض هنا على هالرابط ..

http://forum.hwaml.com/t47498.html

يوم الجمعة قبل صلاة الجمعة .. رحت الله يكرمكم الحمام .. ولما تبولت لقيت مثل الخيط صغير جدا من الدم .. خفت وقتها أول مرة يصير كذا ..
رحت طواري مستشفى الولادة ولا فادوني بشيء .. ما غير يقولون الجنين مو واضح ..
لكن كان فيه جنين لآني رحت مستشفى ثانية مستشفى التداوي وسوولي سونار والجنين كان واضح ..

السالفة وما فيها يوم الجمعة محد فادني بشيء والدم خفيف بس لما أمسح يبان فيه دم شوي ..وما جاني ألم ..

يوم السبت بعد صلاة الفجر أحس الالم بدا يزيد شوي شوي .. إلى أن وصلت الساعة سبعة .. صحيت زوجي ورحنا طواري مستشفى التداوي ..

وحسبي الله ونعم الوكيل أخذوا منا قريب الف ريال ما حسيت أنهم فادوني ..

دخلوني طواري أخذوا خمسين ريال وما سوولي ولا شيء .. بس الدكتورة تقولي كيف كان الدم كثير ولا قليل قلت لها السالفة وقالت وريني الله يكرمكم الفوطة ..
قالت خلاص إذا جات الاستشارية كلميها ..وتجي الاستشارية الساعة 8 ونص ..

وراحت تخيلوا يابنات أخذوا خمسين ريال عشان بس تقولي هالكلمتين ؟!!!

أنتظرت الاستشارية من سبعة ونص وحضرتها ما جات إلا الساعة تسعة تقريبا ..

الله العالم يقولون مشغولة مع مريضة فوق .. وأنا يا بنات بطني يألمني ولازم بعد أمسك البول عشان السونار ..

أنتظرتها قريب تسعة .. بعدها أرسلتني عند السونار وهناك بهذلتني كشفتلي من فوق ومن تحت .. تقول الجنين ما فيه نبض .. وتقولي ليش تركتي عمرك لحد ما وصلتي هالدرجة ... قلت لها أن هالشيء صار أقل من 24 ساعة أستغربت ..

ورجعت للاستشارية وقالت لازم انا أكشف عليك .. وكشفت بيدها ..

وقالت لازم ننتظر تقول فيه امل .. بس سوي تحليلين اليوم تحليل وبعد بكره تحليل ثاني .. وخذي دافستون .. وقالت التحليل يحدد هل الجنين عايش ولا ميت .. وممكن نسويليك عملية تنظيف يوم الاربعاء ..

طبعا كل ما رحنا خطوة أدفعوا .. أدفعوا ..

في النهاية أخذوا تحليل الدم ورجعت البيت قريب الظهر قعدت تقريبا ساعة رحت الحمام وحسيت بشيء ينزل الله يكرمكم ..

بعدت شوي عن كرسي الحمام إلا لقيت قطعة نزلت وحطيتها بفنجان وكلمت أمي إلا وانا أكلمها حسيت بقطعة أكبر تنزل على الفوطة .. ولما شفتها سبحان الله حسيت قلبي تقطع ..

تخيلوا والله شفت الجنين طوله ربع الاصبع تقريبا وشكله قريب من اللي أشوفه بالصور صح قطعة مثل قلب الدجاج لكن هذي قطعة مني ونزلت والباقي كيس الجنين تقريبا بحجم نصف كف اليد ..

الحمدلله على قضاء الله وقدره .. رحت مستشفى الولادة وقالوا إيه هذا هو الجنين ..

أخذوه مني وحطوه بعلبة وقالوا نرسلها للمختبر عشان نشوف وش سبب الاجهاض ..؟؟

وكشفولي بالسونار عشان يشوفون هل أحتاج لتنظيف ولا لا ..

فقالت ما أشوف شيء يمكن نزل كله .. لكن أفضل نتأكد ونسويلك أشعة صوتية .. وحددوا لي موعد يوم الثلاثاء الجاي ..

واعطوني مضادات حيوية .. وهذي قصتي وإجهاضي اللي صار خلال 24 ساعة ..

سبحان الله .. ربي له حكمة وأكيد كان يبيلي الخير ...