قصة ولادتي

[نسمة المساء]

سلامي للجميع حبيت أكتب قصة ولادتي لكم وأتمنى دعواتكم :
يوم الأربعاء 18/6 ميلادي كنت حابة كتير أولد وقررت أمشي مشي عمري ما مشيته من قبل ويمكن بهداك اليوم مشيت أكتر من 5 ساعات بس مش متواصل ... وللأسف ماجاني طلق ... لكن يوم الخميس الظهر نزل علي افرازات بنية وسألت والدتي وقالتلي خلص رح تولدي بإذن الله ... انتظرت طول اليوم والافرازات مستمرة و ما جاني طلق.. صباح الجمعة صحيت الفجر ومعي وجع في ظهري خفت وقلت خلاص جاءت لحظة الحسم ورحت أخدت دوش ونظفت حالي بالموس ولما طلعت من الحمام بدت عندي أوجاع الطلق بس كانت خفيفة وشوي شوي بدت تشتد حتى الساعة 7 صباحا كانت قوية لكن لسا مش متقاربة ضليت في البيت للساعة التاسعة وأنا متحملة الألم لكن بعد هيك ما عدت قادرة وصارت الأوجاع كل 5 دقائق ورحت المشفى وياريتني ما رحت ..عملتلي الدكتورة المناوبة فحص داخلي مؤلم جدا وبعدها قالتلي التوسع عندك لسا 2سم ورح نعملك تخطيط علشان نشوف إذا الطلقات متقاربة بندخلك المستشفى وإذا لأ بتروحي البيت وبترجعي لما يشتد الألم ... قلتلها الألم شديد وما بقدر أتحمل أرجع للبيت قالتلي بنشوف بعد التخطيط... وبعد التخطيط اتأكدو إنو الطلقات كل 5 دقائق وعملولي ادخال وكانت معي والدتي ... دخلوني غرفة الولادة ونيموني وحطولي مغذى بعد ما أعطوني حقنة شرجية ودخلت الحمام أكرمكم الله ... وضليت على هالحالة وأنا أتلوى من الوجع للساعة 2 وكل ساعة تيجي الدكتورة المناوبة وتعملي فحص داخلي وتقول لسا التوسع 2 سم ... قالتلها ماما طيب احكي مع دكتورتها خليها تيجي تشوفها بلكي بدها عملية .. قالتلها لأ شكلو بنتك عندها التهابات وهي مش مميزة وجع الولادة علشانها بكرية ورح أكتبلها خروج ... ماما انجنت وقالتلها أنا جايبة 8 أطفال وبعرف أكتر منك إنو هاد طلق وإذا بدك تروحيها بدك تكتبي ورقة تتحملي فيها المسؤولية لو صارلها أو للجنين أي شي .. قامت الدكتورة لفت وجها وما حكت ولا كلمة ... الممرضة الله يجزيها الخير شفقت على حالتي واتصلت مع دكتورتي وحكتلها الحالة ... والدكتورة قالت انها شوي وبتيجي ولكن الحمد لله بعد ساعة اتصلت الدكتورة وقالت انو الشارع أزمة ومسكر لأنو في حادث كبير... وضليت أتوجع للساعة السابعة مساء والدكتورة المناوبة تيجي تفحصني داخلي وتقول ما في توسع قامت ماما قالتلها طيب جهزو البنت لقيصري خلص ما في أمل هيها 12 ساعة وما صار عندها توسع قامت هادي الدكتورة الله لا يسامحها صرخت بماما وقالتلها لا تضلي تقوليلي قيصري وطلعت من الغرفة وأنا شايفة الدمعة بعين ماما بس هي مو حابة تعمل معها مشكلة من خوفها علي لا تعمل فيي اشي ... الساعة 7 وصلت دكتورتي وعملتلي فحص داخلي وأنا أصرخ من الألم وأقولهم ارحموني مشان الله وأول ما شافت حالتي على طول قالت قيصري جهزوها للعملية وبدأو يجهزوني وغابت الدكتورة خمس دقائق وبعدها رجعت وقالتلي بدي أطقلك مية الراس وأنا من الألم أقول على كلشي حاضر ولما نزلت مية الراس لقتها خضرة متل مية المستنقع الله يعافيكم قامت قالت ركض على العملية لأنو في خطر على البيبي من التهابت الصدر لو طولو علي وأنا سمعت هالحكي وزادت ألامي أكتر وأكتر وجابو لماما ورقة توقعها وكانت ماما بدها تقرأها قلتلها مشان الله يا ماما وقعي حتى لو بدهم يموتوني مشان يطلعو البيبي سليم ... بس ماما صارت تبكي علي وما رضيت إلا تقرأ الورقة أول وبعدين دخلت غرفة العمليات وأعطوني ابرة الظهر وبعدها ما عدت حسيت بألم وعملولي عملية وأول ما سمعت صوت ابني حسيت اني نسيت كل الي صار معي طول اليوم وكانت ولادتي الساعة 8 بالليل تقريبا والحمد لله على كل حال

[روز55]

الحمد لله على سلامتج وسلامة الطفل

والف مبرووك

[جوادية]

الحمدلله على سلامتك سلامة البيبي
والف مبروووك ويتربى بعزكم

[قمررهم]

الحمد لله علا سلامتك ،،،،، والله يعين اذا جا ذاك اليوم الي بولد فيه اخاف اتبهذل مثل ولادتي الاولى تشوفين نااس ماترحم ،،، الله يسهل علا كل حامل

ومبروك ماجبتي يتربى بعزكم

[أصآآيل]

الف مبروك على سلامتك وسلامة البيبي الله يخليه لك يارب ,,,

[أم ح ــنونـہ]

الحمد لله على سلامتك يا قلبي
وعلى سلامة البيبي
وان شاء الله يكون من مواليد السعاده

[نسمة المساء]

شكرا للجميع والله يجزاكم الخير ويبارك فيكم

[زهرة الألماس]

الحمدلله على سلامتك
والف مبروووووووووووووووك ويتربى بعزك
يمكن قصدك ولدتي ب18-5..لأنو 18-6 لسه مااجى هه
انا بعديكي ب4 ايام ولدت ب22-5

[نسمة المساء]

المشاركة الأصلية كتبت بواسطة زهرة الألماس

الحمدلله على سلامتك
والف مبروووووووووووووووك ويتربى بعزك
يمكن قصدك ولدتي ب18-5..لأنو 18-6 لسه مااجى هه
انا بعديكي ب4 ايام ولدت ب22-5

هههههههههههههههه
مزبوط كلامك زهرة والله الواحد بطل يجمع مع صوت بكى البيبي
مبارك ما أجاك ويتربى بعز البابا والماما آمين

[مراااحب]

الحمد لله ع سلامتك
وجعله ان شاء الله تكفير ذنوب ربي يكون بعونا