استفسارين مهمين جدا ....

[أماني آل ظاهر]

السلام عليكم ورحمة الله وبركاته

أخواتي الكريمات الله يخليكم ردو علي ضروري ، فإني بهم ما يعلمه غير رب العالمين ، عندي سؤالين في قمة الأهمية وأنا مو بكرية بس حامل بتوأم وحيل تعبانة ، وما عندي حد أسأله لأني وحيدة ، ما عندي غير الله ثم أنتن ، فأرجوكم ردو علي وإذا أي وحدة تعرف حالة مشابهة لي تبلغني لأني أبي اتطمن أنا الأولى من عائلتي إللي صار معها كذا مع إن اختي حامل ونفس الشهر ولكنها ولله الحمد لا تعاني من اي مشاكل في الحمل ، وربي يتمم لها على خير .
السؤالين هم :
1- وصفت لي الدكتورة حبوب الوحام أو منع الترجيع واسمها
( Navidoxine ) بمقدار حبتين ف اليوم ، لكني كنت أستخدمها أحيانا 4 مرات في اليوم بسب التعب اللي كنت أحس به وعندي طفل عمره 3 سنين ما عنده بعد الله غيري ، فآكل الحبوب عشان أقوي نفسي وآكل عشان اهتم فيه وأرعاه ، بس آخر مرة رحت للدكتورة قالتلي الجرعة الزايدة من هذي الحبوب تسبب تشوهات بالجنين وآنا عندي توأم ، فخوفتني ، أسألكن بالله إذا أي وحدة تعرف وحدة افرطت ف اكلهن وما صار لها شي لأني بموت من الهم والله وما خطر ببالي أنهم ممكن يضروا لأن النشرة مكتوب بها إن التجارب أظهرت عدم وجود تشوهات للأجنة لكن التجارب على الفئران مب البشر ، فاتمنى وحدة ألاقيها تقول 3 او 4 مرات عادي ، لأني لما ما أكلها حتى الماي ما اشرب من الصبح لليل معده فاضية وترجيع يوصل 6 مرات يوميا !!!!! ( ملحوظة : استخدمتها بكثرة مدة شهر ونصف )

2- عندي افرازات غريبة تخرج هي بسيطة لكن متكررة وتخليني ابدل ملابسي بسببها وهي عبارة عن افرازات بيضاء ، مدري عنها لأني ف الأول نزل لي مثل الماي ووقف وبعدين مثل الدم ووقف وألحين هالافرازات ، والله تعبت ومدري طبيعي أو علامة مو زينة بحكم انهم توأم ولازم انتبه لأي شي مو طبيعي بالحمل .

أنا بحملي الأول ما صارت لي مشاكل ابدا مثل هذي وهذا اللي مخوفني مع اني بولدي كنت ارجع للتاسع بس ع أساس بيبي واحد كل شي متحكم فيه ، بس الحمل بتوأم فعلا صعب ومرهق لي لدرجة اني شهرين ما رحت على دوامي ولا قادرة اسوق سيارة بسبب ظهري ، أقول الحمد لله على هذه النعمة واشكره فعلا بس اتمنى اتطمن عليهم لأن موضوع حبوب الترجيع مخوفني والبارح ما رقدت من الوساوس ، فاللي تعرف شي الله يخليها تبرد قليبي عسى ربي يهون عليها في الدنيا والاخرة ، واللي عندها تلفون دكتورة او عندها موعد قريب تروح وتسأل دكتورتها وتطمني ، ورح اترصد هنا اي رد . وعسى ربي يطمني على أجنتي اللي تعبانة عليهم.