السلام عليكم ورحمة الله وبركاته ..
طبعا الكل عارف اني الحمد لله ولدت بكرم ومنة من عند ربي بس للأسف الشديد ولدت بأول الثامن..
المهم حبيت أحكيلكم قصتي بالتفصيل الممل .. أصلي بحب أرغي أوي ..هههههههههه وعشان كل حامل تنتبه للأخطاء اللي وقعت فيها وتتعلم منها ..
بدأت قصة ولادتي في يوم الاحد الموافق24\4 كنت جالسة بأمان الله مع زوجي عند حماي وحدثت مشكلة بين زوجي وأحد الأشخاص وانا كنت بالداخل فلما شفت ان الموضوع اتطور قوي لقيت نفسي عمالة بعيط عياط هستيري وانكمشت على نفسي وحسيت زي ما يكون هولد المهم اليوم عدى على خير وطلعنا بيتنا وانا دماغي عمالة تلف من المشكلة وفضلت باقياليوم أفكر فيها وحتى في الحلم حلمت بيها ..
المهم تاني يوم الصبح كنت ماسكة الموبايل وبكلم أختي على السرير وبعد ما قمت لقيت السرير متغرق مكان ما انا كنت قاعدة مية طبعا جالي حالة ذهول ومبقتش عارفة اذا كان عذرا مية الجنين ولا ايه بالضبط ..فقلت لزوجي واتصلنا بدكتورتي وعلى حظي الجميل كانت مسافرة ومعرفناش نوصلها لان الموبايل بتاعها مغلق ويوم الاثنين الصبح صحيت الساعة 3 الفجر على الم شديد جدا في الرحم المهم حاولت استحمل واتوضيت وصليت الفجر بس كنت خلاص بقى وصلت لمرحلة الصراخ من شدة الالم وزوجي طبعا صحي على صوتي ومن شدة الالم كنت اصرخ وسط الصلاة وانا جالسة طبعا المهم الالم استمر معايا حوالي ثلاث ساعات وفهمت من وضعي انه طلق والحمد لله تعالى بعد ما خدت مسكنات ورجعتلي كام مرة كده ودخلت الحمام عذرا يعني اسهال غريب الالم هدي وعرفت انام وباقي اليوم كنت بحس بمية بتنزل بس مش نفس الكمية دي يعني نقط بس مكنتش بقول لزوجي لان كان عنده امتحان مهم يوم الثلاثاء المهم بعد ما خلص امتحانه يوم الثلاثاء حجزنا عند دكتورة جمبي قالوا عنها كويسة ..
وفعلا بالليل رحتلها وعملتلي سونار وقالتلي الحمد لله المية بتاعة الجنين تمام وكشفت علي وقالتلي برضه الحمد لله تعالى الرحم مقفول وقالتلي وانتبهوا معايا للكلام ده كويس عشان هنعلق عليه بعد كده قالتلي اشرب مية كثييييييييير عشان نعوض المية اللي بتنزل دي ونبعد عن اكل الخوخ والفراولة وعصير المانجا والحلبة عشان بيجيبوا طلق وارجعلها الثلاثاء القادم اي بعد أسبوع وقالتلي طبعا رااااااااااااااااحة تامة ما اقومش من على السرير الا للحمام فقط .. وادتني مضاد حيوي وحقنتين كورتزون اخد واحدة اول ما أروح والتانية بعد 12 ساعة عشان لو ان جد اي جديد وحدث ولادة مبكرة ..
وفعلا روحت البيت وخدت الدواء والحقنة وتاني يوم خدت تاني حقنة وفضلت أشرب في مية بكمية مهولة وعصاير عشان اعوض المية المهم من ساعتها المية مش راضية تقف عذرا ساعات احط فوطة الاقيها غرقانة وساعات نقط واحنا كل يوم نتصل بدكتورتي لعل وعسى تكون رجعت من السفر وزوجي حكي الوضع للسكرتير بحيث اول ما تيجي يقولها وفعلا يوم السبت قالنا ان الدكتورة جت وقالها على الحالة وقالتله نيجيلها بكرة فزوجي قالي اني اكلمها احكيلها فقلتله السكرتير قال انه حكالها وهيه تلاقيها جت من السفر مرهقة جدا فمش هتقدر تروح العيادة النهاردة وفعلا ثاني يوم وكان يوم الاحد الموافق1\5 رحتلها وحكيتلها اللي حصل فقالتلي قومي على السرير نعمل سونار واول ما بدأت السونار وبصت على الشاشة لقيت وشها غير جدا وجاب الوان واتوترت وبتقولي مفيش ولا نقطة مية حوالين البيبي انتي ازاي ساكتة على نزول المية فحكيتلها اللي حصل مع الدكتورة التانية اللي رحتلها وجالها حالة ذهول من اللي سمعته لدرجة انها بتقولي انتي متأكدة انها دكتورة نسا قولتلها أه طبعا قالتلي ان الكلام اللي قالتهولي عن الخوخ والحاجات التانية كله غلط في غلط وتعجبت جدا من موضوع المية اللي تعوض مية الولادة دي المهم بعدها سألتني ان كنت خدت حقن الكورتيزون فبكل ثقة قلتلها أه خدت حقنتين هما تلات امبولات خدتهم على مرتين فقالتلي بس قلتلها أه فاكتشفت اني كان المفروض اخد أربع حقن مش بس اتنين ... انا طبعا نسيت أقولكم انها مجرد ما قالتلي على موضوع المية اللي مش موجودة واناطبعا انهرت وبدأت بالبكاء والدعاء المهم قالتلي ان الوضع ميستحملشي ولازم ولادة حالا وقالتلي ان هناك احتمال ان البيبي يكون حصله حاجة لان الكيس مفتوح بقاله أسبوع فممكن تكون فيه التهابات دخلتله وان احتمال كبير جدا يدخل الحضانة وانها تطمئني ان البيبي حتى الان بخير لكن بعد ذلك ما الذي سيحدث هي متقدرشي تضمنلي ده وان عليا بالدعاء وان احنا مش هنقدر نحاول طبيعي لان المية هيه اللي بتحمي البيبي في الطبيعي وبما انه مفيش ولا نقطة مية فميش قدامنا غير القيصري وقالتلي اني اطلع فيالتو واللحظة على المستشفى واعطتني ورقه اديها للمستشفى وقالتلي اخلي طبيب النسا المناوب يكلمها حتى تشرح له الوضع حتى تصل لنا هي ..
المهم انا كنت استقريت اني باذن الله تعالى هاولد في القصر العيني الفرنساوي فطلعنا على هناك كنت انا وزوجي واخته واتصلنا باخته التانية تجيبلنا الشنطة بتاعة المستشفى المهعم حطولي جهاز التخطيط ومن ثم بعد الاسئلة المعتادة دخلت غرفة العمليات وسبحان الله مع اني كنت خايفة جدا الا اني كنت واثقة ان ربنا مش هيسيبني وخدت البنج النصفي ولم أتذكر من الادعية اللي كنت محضراها لولادتي غير الدعاء لعمي وأبي وعمتي بالشفاء العاجل ولعضوتين هنا بتسهيل الولادة ومن ثم لكل الي وصوني بالدهاء لهم بتحقيق ما يتمنوه وباقي العملية كنت بدعي ان بنتي تبقى كويسة وأروح بيها ومتحتجش حضانة..
طبعا في غرفة العمليات انا مذنبة ممرضة جمبي وماسكة ايديها وفجأة سمعت صوت غريب جدا ولقيت الدكتورة بتقولي مبروك يا فلانة جبتي بنوتة فانا الصراحة بلمت هههههههههه اه والله اذبهليت بنوتة ايه هوه انا خلفت يعني خلاص ولا ايه المهم خدوا البنت لدكتور الاطفال والحمد لله الحمد لله الحمد لله باسم الله ماشاء الله تعالى ربنا جبر بخاطري الدكتور قال مش محتاجة حضانة وجابوهالي ابوسها وشالوا الكمامة بتاعة الاكسوجين عشان ابوسها بصلتها كده وانا مستغرباها جدا ومش مستوعبة ان دي بنتي ولا انها كانت في بطني اصلا ههههههههههههه وايه كمان عايزة أقولكم اني بوستها عشان اللي واقفين مستنيين أبوسها لكن انا فعليا كنت مستغرباها جدا لانها مولودة ماشاء الله ضغيرة جدا ..
هههههههههههههههه على رأي المثل المصري جبنا في سيرة القط جه ينط .. معلشي أكملكم في وقت تاني لاني الانسة صحيت والعياط اشتغل .. بس بالله عليكم تدعولها لاني امبارح عملنالها تحاليل الدكتورة كانت طلباها وهنروحلها بيها النهاردة وادعولها الصفرا تنزل وتروح من عندها لحسن عالية قوي عليها وادعولها تتخن كده ووزنها يزيد وصحتها تبقى تمام وادعولي انا بقى اخس كده وابقى تمام والجرح يخف عليا ويلم ويبقى تمام
05-15-2011, 04:49 AM
قصة بولادتي بكتكوتي عائشة
somia 
جديد منتدى إستفسارات مرحلة الولادة
العرض المتطور
