مستشفى الولاده في المدينه

[فراشة الاحلام]

السلام عليكم
انا سجلت في المنتدى عشان ابغا افيد غيري بتجربتي في مستشفى الولاده الجديد في المدينه المنوره قبل ثلاث سنوات ولدت ولدي عندهم وكان موعد ولادتي الفجر المهم لمن دخلت غرفة الولاده كان فيه دكتورات سعوديات خافه انهم يولدوني وراحو نادو وحده مصريه الله لا يوفقها بسرعه تبغا تخلص ما استنت علي في الطلق جات وشقتني شق مره كبير مع انه حجم البيبي كان 2ونص كيلو فقط وقعدت بعدها تخيطني ساعه وانا صاحيه وهيا حاطه التخدير الموضعي الي هو وقلته واحد المهم بعد مرور 30 يوم على الولاده وانا احس في الم واحس في وجود حبه في الاسفل ما اقدر اجلس من المها في البدايه توقعت انها (خراج)وعندما ذهبت للكشف عند اكثر من طبيبه قالو انها الخياطه غلط خيطت الطبقه الاولى مع الثانيه فالتأم الجرح غلط والحل وحده قالتلي نكويها موية نار والثانيه قالت لازم نسوي عمليه ونشقك من جديد ونخيطلك خياطه ثانيه وتقعدي 40 يوم بعدها ما تتحركي توكلت على الله وسويت العمليه وكانت اصعب من الولاده وانا الان حامل وباقيلي كم يوم واولد انشالله مستحيل اولد في الولاده بس قالولي عن الدكتوره ايمان في مستوصف العقالي بس قالتلي انها ماتولد فشرحتلها ايش صار في ولادتي الاولى واني ما ابغا اعاني في الثانيه قالتلي يوميا تيجيني في العياده حالتين او اكثر اسويلهم تعديل للخياطه بتخدير موضعي في العياده يعني ان الاهمال في مستشفى الولاده ما زال موجود (حسبي الله ونعم الوكيل)فقررت انشالله اني اولد عند دكتوره احسان بخش تسوي ولادتها في المطبقاني لانه كل مستشفيات المدينه صارت الدكتور الي موجود يولدك يعني انتي وحظك بس الدكتوره احسان سويت عندها عملية التعديل الاولى وكانت الخياطه ممتازه بتخدير كامل في مستشفى الاحمدي وميزتها انها هيا الي تولدك وتيجيكي حتى لو ولادتك كانت الفجر وخياطتها طلبت تجميليه لانها راح تشقني نفس الشق الاول وهذي تجربتي مع مستشفيات المدينه

[FoOoFoOo]

الله يكون بعونك حبيبتي..
وحسبي الله على كل من يشتغل بلا ذمة ولا ضمير..

[Leena.A]

الله يقومك بالسلامة
و يعينك على الولادة في مستشفيات المدينة التعبانة
الواحد يبغى بركة المدينة و يبغى المدينة لكن مستشفياتها و دكاترتها جدا سيئين للأسف
أنا أهلي في المدينة بس بطلت اولد فيها عشان دا السبب !!

[القلق]

فراشة الأحلام أنا نفس معاناتك مع فرق بسيط أني جلست عندهم يومين طلق صناعي حتى شوفت الموت وكان وزن بنتي كيلوين ونصف ومع كذا سوت لي شق كبير وكانت دكتورة مصرية اسمها سلوى وبعدين خيطتني بدون تخدير وخياطة سيئة جدا انفتحت كلها بعد خمسة ايام ورحت لنهاد سنبل وسويت عندها عملية بثلاثة الاف فقط لتعديل المأساة الي سوتها في هذي الدكتورة المصرية وجلست ستين يوم عشان اقدر ارجع لحياتي الطبيعية ( الزوجية) لكن حسبي الله ونعم الوكيل فيهم أتمنى يكون هذاالموضوع تجمع لكل من عانت من مستشفى الولادة يمكن يكون لما سنكتبه صدى وكل وحدة تشاركنا في تجربتها لدى هولاء الجزارين.....وشكرا

[منو الزهراني]

حسبي الله ونعم الوكيل ..
انا كنت محتاره في ولادتي اروح فين ..
الولادات غاليه في المواساه ..
قلت ان شاء الله اروح الاحمدي باذن الله ..
جعل مااصابكم باجره وثواابه ..

[twtw]

الله يكافيهم مايخافوا الله

[فراشة الاحلام]

مشكورين اخواتي على التواصل معي في موضوعي ورجاء كل وحده عانت في ولادتها من اي مستشفى تكتب قصتها حتى يستفيد منها الاخرين