انا اسفه وبعتذر عن تأخيرى لكنى الكمبيوتر خرب ولسه متصلح اليوم وكنت متلهفه علشان اكمل باقى حكايتى
وفرحت بتفعلكم معايا المهم مش هاطول نكمل باقى الحكايه
طبعا انا كنت متوتره جدا لانى مش عارفه انا ميعاد ولادتى امتى بالظبط ومحدش يقول السونار يعرف
لازم تعرفو كويس ان اى دكتور بيعتمد على ميعاد اخر دوره وليس على عدد الاسابيع اللى بتظهر عنده على شاشه السونار واللى عاوزه تتأكد ممكن تعمل سونار فى اكثر من مكان هتكتشف ان عدد الاسابيع مختلف هو مش بيبقى اختلاف كبير فارق شهور ولا حاجه لكن ممكن الفارق يكون فى الاسابيع
المهم ان الدكتور قالى انت اخر دوره كانت عندك 25/4
ولما اكتشفتى ان حامل بأسبوعين تقريبا كان يوم 15/6
يبقى تقريبا انت حملتى فى اخر شهر 5
يبقى ميعاد ولادتى على 25/2
ولما عملت سونار فى مكان تانى قالى الدكتور الموجود بمركز التحاليلانت هاتولدى 13/3
الفارق مخيف فى واحده ممكن تسالنى وانت خايفه من ايه؟؟؟؟؟؟
طبعا اخاف على ابنى ان يتأخر فى بطنى ولا حاجه
المهم فضلت على كده طول شهر 12وشهر1 كله
وبدأ الدكتور يطلب منى انى امشى كثير ((( ملحوظه لازم تكونى رياضيه مش شرط تروحى جيم او تلعبى رياضه لكن اشتغلى بالبيت ماتخافى مادام مابتشليش حاجه ثقيله لكن حاولى تتحركى وما تاكلى الا الشئ المغذى بسوبلاش قاعده التليفزيون والمقرمشات قدامنا)))
لكنى بصراحه اهملت فى موضوع المشى ده كنت بكسل وبالزات لانى ثقلت قوى
واخر زياره قبل الزياره اللى اتحددلى فيها موعد ولادتى قالى بعد الكشف ان الحوض بتاعى ممتاز لكن الطفل راسه مش نزلت الحوض وده كان حوالى 6/2
رغم انه فى الوضع السليم راسه تحت ناقص تتدخل الحوض وخوفنى من القيصرى
وبدات فعلا اضغط على نفسى واحمل زوجى مشقه مع شغله لانه مهندس وطول شغله واقف تقريبا مرورا على الماكينات وكان يرجع ياكل ونبتدى رحله العذاب على حد تعبيره من مشى 3 او 4 ساعات على الكورنيش او حتى حولين الحى بتاعنا
وفى يوم الدكتور قابلنى صدفه واستغرب لطريقه مشى لانه لاقانى بمشى عادى بصراحه مش كنت زى كثير من الحوامل قرب ولادتهم يمشو براحه متوجعين ويحتاجو كل فتره انهم يرتاحو انا كنت بمشى بخطوات سريع وقليلا ما اتعب ودى حاجه قلقته لانها معناه ان الراس لسه مانزلتش لانها لو نزلت كانت عملتلى نوع من الارهاق اكثر
واخيرا جاء يوم الحسم 15/2
كان ميعادى مع الدكتور المفروض 16/2 لكنى حسيت بتعب خفيف فماما قالتلى مش مهم بكره ياله نروح دلوقتى مش هتفرق
وروحنا الكتور عملى سونار وكشف على اسفل بطنى بدون تعليق طلب منى الذهاب اليوم فورا لمعمل ما ذكر اسمه لى لاجراء سونار اخر حتى يتأكد من شئ ما قمت بسؤاله كثيرا دون فائده ( روحى بس ولما ترجعى هاتعرفى بالنتيجه)
وفعلا نزلت من العياده جرى على مركز الاشعه والتحاليل وعملت سونار واكتشفت ان الدكتور بتاعى شاف بلاوى ومحبش يعرفنى علشان ما اتخضش وكمان حتى يتأكد لما ارجعله بالسونار التاى الدكتور الثانى بقى قالى ان الميه اللى حولين الطفل بدأت تتعكر وده معناه ان جسم الجنين اكتمل ومش محتاج انه يفضل اكثر من كده
ثانيا المشيمه بدأت تعمل تجمعات دمويه وده بيعيق ضخ الدم للطف عن طريق الحبل السرى وبعد مده ممكن تبتدى تنشف وتنفصل عن الحبل السرى
طبعا انا ماتخيلتش كل ده ممكن يجرالى اديت ماما النتيجه وقلتلها ارجعى انت بقى للدكتور واناهارجع بيتى لان زوجى كان قرب يجى وهو مالوش زنب مابيعرفش يحضر لنفسه كوبايه ميه وقلت لنفسى ابقى اعرف من ماما رأى الدكتور
روحت وزوجى جه واكل واتصلت بماما على الموبيل لاقيتها لسه عنده وبتقولى بصى من غير خوف اختارى يابكره يابعده علشان هاتولدىقيصرى انا انهارت ورميت الموبيل لزوجى وقعدت اعيط احساس صعب قوى ان فجأه يقولولك يالله هاتولدى
يمكن الولاده الطبيعيه بتيجى بفجأه من وجع لكن تكونى سليمه ومش فى دماغك قرار القيصرى وفجأه يكون هو ده حلك الوحيد(الراس مانزلتش الحوض_الرحم مافتحش_مجاش طلق ولاده_الميه اتعكرت وخطر على البيبى_المشيمه ممكن تنفصل فى اى وقت)ياعنى مقفوله من كل حته
تانى يوم اللى هو 16/2اخترته يكون ميعاد ولادتى الساعه 9 مساءا
كنت عند ماما من الصبح لانى كنت محتاجه اروق بيتى عشان كنت عارفه ان هسيب بيتى مده عند ماما ومحبتش اسيب حاجه مش مظبوطه لزوجى يحتاس فيها
الدكتور قالى حاولى تاكلى بدرى جدا قد ماتقدرى ياعنى تتغدى بدرى قووى وانا مش فاهمه السبب وبصراحه اكلت الساعه 4 وايه بقى محشى كرنب وبط وعلى حظى كنت جعانه ونفسى مفتوحه قوى واحده هاتستغرب ازاى اكون خايفه ومتوتره واكل ونفسى مفتوحه؟؟؟؟؟؟
ارد عليها واقولها انام ن الناس لما بزعل او اخاف بأكل بشراهه
ورحت المستشفى وهناك لاقيت حب كل الناس خلاتى كلهم متواجدين حتى خالتى المريضه وخلانى وجدتى وقرايب زوجى كلهم اظن المستشفى فى الليله دى ربع عدد الزوار كانو اهلى
ودخلت غرفه العمليات واخدت بنج نصفى( فى حقنه بنج خفيفه الاول بتخدر اسفل البطن قبل حقنه البنج النصفى نفسها لازم تسألو عليها اى واحده حامل مكتوبلها تولد قيصرى لانى لاقيت بعد ولادتى من الناس اللى جم زارونى انهم ولدو قيصرى وما اخدوش الحقنه الاولى دى وبيعانو من وجع)
لان حقنه البنج النصفى دى قويه قوى انا نفسى حسيت بيها رغم الحقنه الاولى بس احساس خفيف وبعد كده اتخدر الجزء السفلى وبدا الدكتور بفتح بطنى انا مش كنت شايفه لانى راسى مستواها كان اسفل من مستور جسمى لكنى كنت عارفه هو بيعمل ايه لانى قبل ولادتى بحولى اسبوع اتفرجت على النت على فيديو ولاده قيصرى
وانصح كل ام حامل انها ماتحولش تعمل كده لانك بتتعبى نفسيا انك عارف بيعملو ايه فيكى
وصدقونى ياحاومل والله العظيم انا حسيت بأبنى وهو خارج منى كثير قالولى ازاى وانت فى البنج قلتلهم عظمه ربنا فى ان روح تخرج من روح تانيه حسيت بيه بيخرج من احشائى فعلا احساس غريب مايتوصف بس مش موجوعه
وبعدها سمعته صوته بيبكى وشيفاها بعيد جنبى بيكشفو عليه وبيلبسوه نسيت كل حاجه وفضلت عينه متعلقه عليه وجابوه بسته ومشى خرج وانا بقى زهقت واعوزه اخرج وراه وبدات احس بخنقه وان صدرى طابق على زعقت وصرخت وقلت سيبونى عاوزه اقوم وكانت لسه بطنى مفتوحه ادونى حقنه مهدئه رحت فى النوم وصحيت لاقتنى فى الترولى خارجه من غرفه العمليات راحه غرفتى
وسمعاهم بيقولى ابنك جعان نازل جعان
والحمد لله انه نزل لانه معنى جوعه ده ان المشيمه مابقتش تديله كفايته وهو كان فى بطنى وطبعا اخدت بستفه من الدكتور بعد ما فقت خالص على المحشى اللى اكلته
لانه قالى القولون تعبه جدا فى تقفيل الجرح طبعا محشى الكرنب عملى انتفاخ وكل ما يزقه جوه يخرج تانى هههههههههههه ام طفسه انا مش كده
نصايح اتعلمتها فى حملى
حاولى تكونى ذكيه فى حملك وتتابعى وماتهمليش كلمه يقولهلك الدكتور
حاولى فى شهورك الاخيره تتحركى وبلاش الخوف مدام مابتشليش تقيل
حاولى تأكلى ماهو مغزى فقط وبلاش المعجنات والمقرمشات
حاولى لو عندك املاح تعلجيها وتاخد العلاج بتاعها حتى لو كان صعب وتبتعدى عن الشطه والحراق والاملاح علشان بعد الولاده المسانه ماتتعبكيش وانت فى الحمام
بعد الولاده باذن الله
حاولى تسمعى كلام الستات بتوعنا الكبار وماتخديش كلامهم تريقه
ياعنى يقولك دفى نفسك يبقى تدفى نفسك وماتقوليش حرانه بجد هتعرفى قيمه ده بعدين
حاولى وانت جايه تقومى من على السرير ماتحمليش على ازرعك معلش ممكن حد يساعدك فى انك تقومى لكن اوعى تحملى على ذراعكبانك تحطى كف ايدك على السرير وتحملى عليه عن تجربه ان زراعى دلوقتى مش قادر يتحمل راس ابنى وانا برضع
حاولى تتغزى كويس جدا فى فتره النفاس لانها خميره لابنك ولصحتك وللبن اللى فى صدرك
اشربى سوايل كثثثثثثثثثثثثثير عصائر بس قليله السكر علشان ماتتخنيش وميه كثير
ومقولكيش بقى ضمه صدرك لابن وضمه زوجك ليكم انتم الاثنين بالدنيا ومافيها وتنسيكى اى تعب
يارب كل واحده حامل تقوم بالف سلامه وينولها ربنا الطفل اللى بتتمناه سليم معافى يقر عينها وعين والده
ويراب كل واحده نفسها تخلف ربنا يرزقها عن قرييييييب
يارب ما اكون طولت ويارب تجربتى حد يستفاد منها
والسلام عليكم ورحمه الله وبركاته
03-08-2010, 08:11 PM
ياحوامل تجربتى مثيره بحملى ( الحزء الثانى)
المحبه للامومه 
جديد منتدى إستفسارات مرحلة الولادة
العرض العادي
