تجمع لامهات التوحد

[مشتاقه لضمة بنوته]

السلام عليكم
حبيت أسويه هالتجمع علشان نفيد بعض وأتمنى منكم التثبيت

ببتدي معكم
انا ولدي عمره 3 سنوات و4 شهور أكتشفنا أن معاه توحد بعد الفحوصات من كان عمره سنتين
أستمر على المراجعات كل بعد 3 شهور على أمل أنه يكون طبيعي بس الحين قرروا أنه يدخل مركز خاص بالتوحد

ياليت الي عندها خبره تفيدنا والي عندها أستفسار بحاول أفيدها على قد أستطاعتي

[ام عاصم2]

ماعندي فكره بس حبيت ادعي لك بادن الله يشفى ابنك يارب بس ابغى اسالك كيف عرفو انه عنده توحد وشو هي الاعراض

[مشتاقه لضمة بنوته]

شكينا أنه مايسمع لانه مايرد علينا أذا ناديناه وماينتبه لشي الي أنا أأشر عليه ولما أقوله جيب هالشي ماكأني أقوله شي وماينتبه لاي أحد يجي عنده وماله شغل بالاطفال لوهم يلعبون مايجي عندهم لما يبي شي ياخذني بأيدي ويوصلني لشي الي يبيه ماينادي ولايتكلم

[طالبة انتساب]

طيب يمكن عنده ضعف بالسمع ..
انا ابن اختي نفس تصرفات ابنك ودوه لدكتور قالهم ضعف بالسمع ما جاء ببالنا انه توحد ..

الله يشفي جميع اطفال المسلمين

[طالبة انتساب]

ايه صح ابن اختي عصبي اذا ما عطيتيه شي يتبطح بالارض وبكاء ..
ومايتكلم واذا ناديناه مايرد ..

الله يحفظه

اشلون تاكد لكم انه توحد الله يشفيه يارب

[مشتاقه لضمة بنوته]

شافه دكتور أطفال وسواله فحص سمع الحمدلله سليم علشان كذا حوله لطب التطوري متخصص بالاعاقات وقالوا أحتمال عنده طيف توحد ومع مرور الشهور أكدوا
أنتي كم عمر أبن أختك

[المهـ ـرة]

الموضوع اولاً رائع جداً
وثانياً اي استفسار أو شىء يخطر ع بالك في هذا الخصوص
لاتترددي بسؤالي عنه
وان شاء الله راح افيدك
انا بالاصل تخصصي علم نفس
وقراءاتي بـ هذا المجال كثيرة جداً
رديت ع عجالة وان شاء الله ليّ عودة
وراح اتابع معك بـ هذا الموضوع
لان كان ودّي يكون في قسم لذوي الاحتياجات الخاصة
وان شاء الله قريباً يرى النور بمنتدى حوامل
قبلاتي لطفلك واوصيكِ بالصبر
وكل شىء بالتدريب والتعود عليه راح تشوفين
كيف راح يكون بالمستقبل
تقديري واحترامي

[طالبة انتساب]

المشاركة الأصلية كتبت بواسطة مشتاقه لضمة بنوته

شافه دكتور أطفال وسواله فحص سمع الحمدلله سليم علشان كذا حوله لطب التطوري متخصص بالاعاقات وقالوا أحتمال عنده طيف توحد ومع مرور الشهور أكدوا
أنتي كم عمر أبن أختك

تقريبا ثلاث سنوات

[مشتاقه لضمة بنوته]

كل الشكر لك أختي المهرة ويعطيك العافيه
أنا حطيت هالتجمع علشان أفيدكم لان هالمرض منتشر حييل
ولازم يكتشف بدري ولا تتطور حالته

أتمنى من الادارة التثبيت ومنكم التقييم

[ام ارجواااااان]

موضوع رائع
والله يشفيه يارب وتشوفيه عريس
الله يوفقك
ولك التقييم والتثبيت
عساااااااااااك على القوه