انا مو قد التربيه

[أم البندري111]

من جد تعبت من هذا الموضوع وتربية بنتي حمل ثقييييييييل جدا على ظهري


نبدا من البدايه

انا عندي بنت عمرها حاليا 3 ونص اموت فيها واخاف عليها من نسمة الهوا
ساعات تجبرني اعاملها بقسوة بسبب تصرفاتها

من جد لوماني خايفه عليها كان ماقسيت عليها طبعا امد يدي عليها اظربها بس مو ظرب مبرح ولما يشوفون تصرفاتها الناس برا عبالهم انا الموضوع سهالات عندي
يقولون لي انتي ماتشدين عليها ولازم البنت تتأدب وتعلمت تلفظ الفاظ تتعلمها من اولاد الجيران
يقولون لازم اهددها بالكبريت والفلفل وهذي الاشياء بس انا قلبي مايطاوعني ودي ما اعودها على العنف بس هي تجبرني اظربها ساعات

بذكر لكم كذا مثال على تصرفاتها

مثلن لما نطلع مكان مع ابوها تقعد تبكي بدون سبب وتبي كل شي من العاب وحلويات وكلشي قدامها له لزمه والا ماله وابوها طبعن ما يقصر وانا اقوله حرام عليك تقط فلوسك على هذي الاشياء مجرد مانشتريها الها ترميها وانا قلبي يتقطع على هاي الفلوس مو بخل بس هاي نعمه اليوم هي بايدنا بكره مانضمن ممكن نحتاجها ومامعنا
تخيلو معي أمس مثلا تبي ايسكريم فراولا ونجيب لها تاكل شوي وترمي وتبكي مره ثانيه تبي شوكليت واذا ماعجبها ترمي وعلى هذا الموال وكوب الايسكريم ب20 ؟؟؟؟؟؟

مثال ثاني على تصرفاتها
من يوم عرفت اني حامل وببطني بيبي صارت على اي شي ما يعجبها تبكي بكا مثل الاطفال (وااااااااواااا) وانا دمي يغلي على هذا التصرف وتبي ابوها يحملها على كتفه طول الوقت وتقعد قدامه وهو يسوق السياره (طبعن هي دلوعة ابوها) واخر شي يقولي آخر مره اطلعكم (طيب انا شو ذنبي اذا انته معود بنتك على هذي التصرفات)

مثال ثالث
حاولت ادرب البنت على الحمام وقدرت الحمدلله في مدة بسيطه بس فجأه صارت عندها عاده غريبه في أي مكان ماتستحي تبطل ملابسها وتقعد بدون ملابس وتحط يدها فلاماكن الحساسه وتشمها ؟؟؟؟؟؟؟؟

اصلن هي لما كانت اصغير تقريبا سنه او سنه وشوي كانت عندي خدامه تساعدني بحكم دراستي وكانت كل ما تبدل لها الحفاظ تحط يدها وتخليها تشمها ونبهتها على هذي الحركه ما كنت اعرف شو مغزاها (الحين سافرت هذي الخدامه من قتره طويله) بس معقوله بنتي تكون مانست الحركه

لهذا السبب رجعت البس بنتي الحفاظ الحين وكل من يشوفها يقولي خلاص لازم ماتلبس حفاظ وهي بهالسن بس ما عرفت اتصرف معها أحس انها تتجاهلني ولما اكلمها ماتفهم علي او هذا كله بسبب ابوها لأنها تسوي هذي الحركات كلها قدامه وما يخليني اعاقبها وكذالك اهله كلهم يشوفونها تسوي الغلط قدامي وقدامهم ومايخلوني اخذها واعاقبها ولا حتا اقولها اي شي ؟


فيني غصه يا اخواتي والله أني خايفه عليها تتصرف هذي التصرفات وقت ما اكون بعيد عنها او قدام العمال اللي يشتغلون فالبيت او قدام احد غريب او احد يتحرش فيها وهي ماتعرف شوقاعد يصير الميكله ماني عارفه كيف افهمها ان ها الشي غلط كل محاولاتي معها فاشله لاني اشوفها ماتتجاوب معاي كل همها اللعب واولاد الجيران ولما اكلمها واهددها ماتطالع فيني بس تقعد تبكي وتصارخ ولما احاول اكلمها بالهداوه ماتطالع فيني ولاتعبرني

طبعا انا حامل بالبنت الثانيه الحين واخاف اعاني بتربيتها مثل اختها اخافها تاخذ من اطباعها والله قلبي يعتصر عليهم ما اتخيل يصيبهم مكروه بسبب هذي التصرفات خصوصا الحيم الدنيا تخوف والناس توحشت صارت ماتفرق بين الكبير والصغير والبنت والولد بالتحرش والاغتصاب

[أم البندري111]

اسفه على الاخطاء الإملائيه

[أم الزين]

عاادي يالغلاااا انا بعد افصل على بنااتي بس اصاارخ عليهم واضربهم من يدينهم بس



وعااادي انا اشووف تصرفات بنتج طبيعيه اناا بنااتي نفس بنتج ولا بعد بالتصرفاات بنااتي العن من تصرفاات بنتج



بس نصييحه لاتهددينهاا بولاا شي حراام هاذي جااهل ولاا تسمعين كلام احد

يحرضج على بنتج



وثااني شي خيرتها بتكبر وبتسمع كلاامج

[Dana]

حبيبتي الله يعينك
بس بصراحة كمان أبوها غلطان لأنه مدلعها زيادة عن اللزوم
يعني لما تشترولها شي وترميه وتطلب غيره لا تشتروا وخليها تبكي لحد ما تسكت لحالها ولا تراضوها أبداً
هي تعودت كل شي بدها إياه لازم يصير وهاد غلط لازم تعرف إنه رأيكم إللي بمشي وفهمي زوجك هالحكي
تربيتها لازم وسط لا دلال ولا قسوة زيادة عن اللزوم
وحبيبيت لازم خلص ماتلبسيهاالفوطة أبداً لأنها ما شاءالله كبيرة
ولما تعمل الحركة إللي حكيتي عنها إمنعي عنها شي بتحبه أو إحبسيها بغرفتها لدقائق
وبدك تصبري لأنه بدها شوية وقت لحتى تتعود
الله يعينك على تربيتها

[المهـ ـرة]

شوفي ياقلبي
الضرب ليس الحل الوحيد بالتربية
وعلشان لاتربي عندها عقد نفسية قد تكلفكِ الكثير مستقبلاً
ويصير ردة فعلها معاكسة
اهم شىء علميها مبدأ الثواب والعقاب بطريقة حلوه
يعني اذا سوت الشىء الكويس كافئيها بحلاوه بـ لعبة
ضميها الى صدرك اشعريها بالحنان
هذا العمر ليس عمر يميز فيه الطفل بعض الامور
علشان كذا اقولك ابعدي عن الضرب ولاتربي فيها سلوك العدوانية
وتصبحي مصدر ينفرها منكِ وتصبح اكثر عناداً
تعديل بعض السلوكيات يتم ع مراحل بالصبر
يعني عاودي تعليمها من جديد ولكن بدون اسخدام الضرب حتى وان اخطأت
اعيدي عليها بطريقة تشعرها بالارتياح والسعادة
واذا فعلت اي سلوك خاطىء عدليه بطريقة صحيحة ولكن بعيداً عن الضرب
وصدقيني متى ماشعر الطفل بالحنان والدفء يصبح اكثر تفاعلاً
مع والديه ولكن بدون صراخ وضجيج لأن بعض الاطفال يؤثر عليهم
اجعلي ساعة باليوم امرحي معها وحاولي تبعيدها بطريقة طبيعية
عن السلوكيات الخاطئة

اتمنى اني افدتك
واذا في اي استشارة انا حاضرة
تقديري واحترامي

[الأميرة جوري]

انا مستغربه منج الصراااااااحة
هذي ياهل وكل اليهال كذا موبس بنتج انا وحدة من بناتي التوام فديتها تسوي نفس هالحركة تحطي ايدها تحت وتشمها انا اقووول ليها عيب حبيبي وامسك ايدها واعطيها لعبة او حلاوة علشششان ماترد تسوي هالحركة بسسس ابدا مااضربها ولا اعصب عليها فديتها حتى اني ماافكر انها تسوي هالحركة قدام حد ولا افكر بالتحرش لان بنتي قدام عيني 24 ساعة فليش افكر بهالاشياء السيئه وانا عندي بنتي لاكبر من التوام عمرها 4 سنوات ونص عنيده وتصارخ وتبكي ع اي شي بس مااضربها لاني ام ولام لازم تكووووووون حنوووونة ع اطفالها وتعلمهم بكل الحب والصبر وبخصوص الحفاض انا بنتي من شهرين تقريبا منعتها عن الحفاض بالليل عكس ولدي من سنتين ونص منعته عن الحاض لما كان صغير وبنتي منعته عنها بالليل لما كنت 4 سنوات 4 شهور يعني يختلف من طفل لطفل ولد اختي عمره نفس بنتج وللحين يلبس الحفاض صبح وليل فلا تسمعي كلام الناس ويخلونج تضربي بنتج او تعصبي عليها ناااااس غريبة ينتقدووووون بنت ياهل شوهالنااااااااااس؟؟؟!!!!!! وانج اتكلميها وماتفهم وتبكي ترى كل اليهال كذا باكر بتكبر وبتتغير والله يحفظها ولا تجلسي تقولي باكر اختها بتتعلم من حركاتها او تاخذ اطباعها ولاتقولي قدامها كذا الاطفال حساسين وبتفهم انج تفضلين اختها عليها ترى الغيرة مع كل الاطفال والي قهرني الي يحرضج ع بنتج مايخاف الله بهاالطفلة وهم يدروا ان الاطفال كلهم كذا.حطي عقلج براسج ولا تتسمعين كلام الناس ولا تتشكين من بنتج قدامهم

[سوزان الرياض]

ياحياتي انت ترا تصرفات بنتك طبيعيه مررره
انا اشوف بنات اخواني كذا واللعن
وش كبريت وتهديد ماعليك من الناس اتحداك كانهم يسووون لعيالهم كذا
دلعيها وحاولي تكونين قدوه لها
الله يحفظها لكم

[حيآتوو]

حركاتها عادييه
ولاتهددينها ولاكبريت ولافلفل توها ياهل

3 سنين ونص تفهم
اذا سويتي كذا بعطيك كذا
والا مااعطيك والا اطلعك
كثييير يستجيبون بهالطريقه هالعمر

وحركات الصياح ترا حاسه بحملك
انا بنتي مو بس تصارخ من ولدت
ماما اكليني
ماما حمليني
ودلعععع من الغيره عاادي بالعكس عطيها اهتمام اكثر

بس اتفقي من ابوها يخفف دلع

ولاعليك من احد وهذرة الناس اللي ماتخلص

[درين]

تربيتها لازم وسط لا دلال ولا قسوة زيادة عن اللزوم