نقاش -علاقة البنت بالشاب بنية الزواج-اسبوعيا متجدد-

[سمار]

أنا مع الشيئين يعني مع الحب قبل وبعد الزواج لأن لكل شيء ناس يعني أعتقد اللي تتكلم عنه روز هو الحب الصادق الطاهر اللي الكل يرحب فيه حتى عائلات الطرفين بهالحب
يعني في الحب اللي تتكلم عنه يكون كل طرف محترم الطرف الثاني وعارفين أثنينهم وش يبون من نهاية هالطريق اللي ماشين فيه ويخافون على بعض أكثر من خوفهم على أنفسهم أقصد على سمعة بعضهم وخصوصاً البنت يعني عارفين أنهم راح يتوجون هالحب بنهايه معروفه هي الزواج
وهالشيء موجود بالنسبه لي أخوان أبوي بعضهم أخذوا زوجاتهم عن حب وعايشين مع بعض حياه والحمدلله أحلى من الحلى ولايرضا أي طرف فيهم يزعل أو يجرح الثاني وياما مروا بمواقف وقفوا مع بعض فيها كأنهم شخص واحد والحمدلله والله لايغير عليهم
وبالنسبه للحب بعد الزواج فكمان معاه وموجود يعني ماعرفت زوجي الإ بعد ماتقدم وخطبني والحمدلله أحبه أكثر من أول ماعرفته وعايشه حياه أحمدالله عليها طول الوقت
بس المشكله في بعض شباب وشابات هالجيل هم اللي شوهو الحب العفيف وعاشوا علاقات جسديه بإسم الحب وتمرغوا في الوحل والرذيله بإسم شي أسمى وأصدق وأعمق من اللي يسوونه
وأنا متأكده أنهم مستحيل يوصلون له لأنه العلاقه صارت عندهم جسد وخلاص
وهذولا مانجي بسببهم ونحرم ونجلس نسوي أنه أرتكب الواحد جريمه لمن تكلم عنه لأنه شي فطري شي أوجده الله بقلوبنا مانزعه مننا أستغرب كل هالتحامل والهجوم على من طرح الموضوع
على الرغم من أنها تشكر عليه لأنها ماسوت شي حرام ولاحرمت حلال ولا حللت حرام
بلاش نكذب على بعض ونقول أنا بمراهقتنا ما دقت قلوبنا حتى لو شفنا ممثل بالتلفزيون وشكله حلو وعشنا أحلام ورديه حتى بيننا وبين أنفسنا بلاش ناخذ جانب الهجوم وحنا لو صار معانا هالشي أكيد ومليون بالميه أنا بنحلله لأنفسنا وقتها في وقت حنا نحرمه على غيرنا لو سواها وحب
الحب شي حلو وطاهر نتمنى نعيشه طول العمر مع من نحب لكن اللي شوهو الحب أو أعطوا للذنوب اللي جالسين يسوونها أسم الحب هما المسؤلين عن تفكير الناس اللي هاجموا الأخت روز بدون أي تفكير لأن أي وحده راح تغلط ماراح تنتظر تقرا وتطلع على اللي طرحته روز وتلقى حجه علشان تغلط وتمشي بالطريق اللي هي ماشيه فيه لأن اللحين وخاصةً بهالوقت رجال الهيئه والدين والشرطه ماقصروا حذّروا ومازالوا يحذرون لكن فيه بنات مستمره بالغلط يعني هي رايحه لهالشيء برضاها مافيه أحد جابرها أو أظطرها لهالشي هي عارفه كل شي بالطريق هذا وعارفه النهايه بس ضاربه بكل شي عرض الحايط اللي رغبان في الغلط بيستمر فيه واللي عنده وعي وعارف الصح بيعرف وين يحط رجلينه وأي طريق يمشيه وماله داعي نشوه الحب ونحرمه علشان شرذمه عندها أستعداد تحمل المجتمع ككل أسباب دمارها وكأنها مغلوب على أمرها


أعتذر على الإطاله وأدعوا الله أن يجمع كل المحبين في الحلال وأني أكون فهمت اللي تقصديه أخت روز وأشكرك على الطرح
وأدعوا الله أن يحفظلي زوجي وأهلي وأن يرزقني الذريه الصالحه يارب