قصة ولادتي بمولودي البكر في مستشفى المساعدية الحكومي

[إشراقة امل]

سلااااااااااااااام كروشات ..
انا عندي طفلين ودحين حامل
وحابا احكي قصة ولادتي بابني البكر , كنت انتظر الولادة بفارغ الصبر , زوجي انتظرني في اول اسبوعين في التاسع وربي ماكتب اولد فيها , وسافر بعثة عمل وقلبه معلق بمولوده الاول , ورحت عند اهلي وامي مريضة مرض مزمن الله يشفيها , طبعا رحت عندها لانو مالي بعد الله الا هيا , وبعد ماسافر زوجي بخمسة ايام تقريبا بديت احس بالالآم وطبعا ماكانت مرره قوية, والساعه 1 ظهر يوم الجمعه حسيت بشي وجري ع الحمام الا المويا نزلت , ورحت على الطوارئ والالآم بدت تزيد وانا احاول اخبي عن امي لانها قلقت عليا كثير , كشفت الدكتورة عليا وقالت مفتوح 1 سم , مانقدر ندخلك غرفة الملاحظة لين ينفتح 4 سم أو تحسي بالدف وقلتلها مااعرف الدف كيف (مسكينة,غبية, تحزن,قولو أي شي) لاني بكرية مو عارفا وربي ماعطتني اجابة شافية وتنفخ وهيا تتكلم , وتمددت على كراسي الانتظار وكانت حديد وجدا سيئة .
وامي المسكينة كلمت الدكتورة وصرخت عليها وما أعطتها أي اهتمام وكانت بغرفة الطواري 3 أسرة وربي كلها فاضية ومع كدا مارضيت تخليني اتمدد على واحد منها , طبعا امي انهارت وكلمت المدير ومافي فايدة انتظرت لين الساعه 3 الا تقريبا تكرموا ودخلوني غرفة الملاحظة وكان الألم يزيد ولا عطوني مهدئات ولاشي وجات الساعة 9 الا في المساء وكنت اقول للممرضة المناوبه انا تعبانة ابغاها تقيس لي , وكل ماكلمتها صرخت عليا وتقول ( انا سوف جهاز مافي ولادة) وكلها دقايق وانا احس بالدف واصرخ وأدف غصبن عني طبعا , لما سمعتني ادف اتصلت على الدكتورة وقالت للممرضات ينقلوني لكشك الولادة وربي من الألم ماني قادرة احمل نفسي عشان اساعدهم ينقلوني لسرير كشك الولادة , وبالقوة نقلوني للسرير التاني , وكل شي بسرعه بسرعه , وولدت الحمد لله الساعه 9ونص مساء , وبعدها اعطتني الكمامة وبنج موضعي وخيطوني , وبعد ماصحصحت مرت عليا الدكتورة تقولي سبحان الله كيف تحملتي .
وهدي قصة ولادتي بالتفصيل , ومولودي الثاني كمان بنفس المستشفى لان ماديتي ماتساعد اولد بخاص , بس الحمد لله ربي أكرمني دحين على تأمين وحامل في بداية السابع .
كنت بولد في الأطباء المتحدون بس بديت اتردد بينه وبين سليمان فقية .
وآسفة طولت عليكم.