ششششش....اخرس ...~

[om aseel]

ششششش تخرس خاااااالص .........


ليه احنا كشعوب عربية بنتعامل مع أولادنا تمام زى الماريونست ما بيتعامل مع العروسة الماريونت بتاعته؟ المفروض إنها تأدي الدور اللي هو راسمهولها على مسرح الحياة؟كام واحد فينا أهله بيتعاملو معاه على إنه شخصية مستقلة يأكل ويتنفس ويعيش ويتعايش؟ كام واحد فينا أهله بيحترموا وجهة نظره ووجوده ورأيه وحريته واستقلاله؟
طيب...كام واحد فينا أهله اتدخلوا في حياته ومستقبله وفرضوا عليه طريق في حياته أو منعوه يمشي في طريق تاني هو كان عايز يمشي فيه؟بلاش كل ده، كام واحد فينا مسبقش وعدى على سمعه الكريم المقولة الأثيرة الرنانة:" أنت مش هتعرف مصلحتك أكتر مننا" بأمارة إيه؟ وبعدين:"أنت حتت عيل تفهم إيه في الدنيا" وطبعا الجملة المشهورة برضه اللي بتتقالك مع كل محاولة للتمرد"شششش اخرس سيبنا نشوف لك مصلحتك!"
وعشان كدة بنفضل كلنا عيال مهما كبرنا،شخصيات ضعيفة و تردد كل ما نيجي ناخد قرار في حياتنا، نسخ أو مسخ من أهالينا، تمام زي حمادة عزو! ومش بعيد كمان اننا نطبق نفس الطريقة مع أولادنا! وعليه العوض في البلد دي!
الغريب ان الدين بيقدر شخصية وعقلية كل إنسان، والرسول عليه الصلاة والسلام كان بيحترم اختيار الأطفال وبيسألهم عن رأيهم وعشان كدة قدرنا وقتها نعمل حضارة عظيمة،لكن بما إننا مأخدناش من الدين اكتر من المناظر فلازم يكون ده حالنا،
أنا بس بسأل نفسي سؤال: يا ترى ممكن ييجي اليوم يسيب الماريونست العروسة بتاعته تعمل اللي هي عايزاه على مسرح الحياة؟؟؟؟!!!!!!
مجرد سؤال ساذج!!!!!!!!!


يا ريت تشاركونى بآراءكم وتقولولى اذا كان كلامى صح ولا غلط.........