ياجماعه ابغى حل تعبت من التفكير

[miss nana]

السلام عليكم ورحمت الله وبركاته ..
كيفكم ؟
انا عضوه جديده بصراحه دايمن اكون زائره حبيت اليوم
اكون عضوه واقول لكم تجربتي واتمنى منكم المساعده واعرف ماراح تخجلوني

انا متزوجه من سنه و8 شهور >> يعني سنتين

وماعندي اطفال ... وساكنه قدام اهل زوجي انا وزوجي كثير متفاهمين الحمدالله ومنسجمين في حياتنا ولله الحمد بس لازم ولا بد من شوية مشاكل بس مهما كانت حجم المشكله الحمدالله نرجع لبعض اكتر واكتر بس !!!!!!!! لو كان المشكله لاهله !!! اه على حياتي تنقلب





تعبت منهم صراحه .... هم طيبين بس غريبين وامه بالزات مرا غريبه بشكل مو طبيعي لهم طقوس وافكار واشياء غريبه مايقدر احد يفهمهم ... ويكبرو الموضوع لو كان سخيف ...

المهم بدخل في الموضوع

انا طيبه مع اهل زوجي وعمري مااذيت احد منهم لااخواته ولا امه ودايمن افتكر امه في كل مناسبه واجيب هديه حتى لو من غير مناسبه الحمدالله معطيتها كل شي لدرجه الناس يقولو يارب ترزقنا زي مرت ولدها مره طيوبه وتخدم اهل زوجها حتى لو بناتها جالسين انا اخدم واشيل واحط ومااخلي شي حتى الغدا اجهزه واحط السفر وكل شي ويجو بناتها يجلسو ويقومو ولا شي حتى كلمة عيب مافي ولا شكر ولا شي حتى الجزمه الله يكرمكم اجيبها لها وحطها تحت رجلها ... الله يهديها ويصلحها تبغى تكرهني في زوجي وحياتي تبغى تقلب حياتي ليش ماعرف .

مره ام زوجي الله يهديها قالت لي خلينا نعزم اهلك ابغى اشوفهم من زمان عنهم قلت لها اوكي يلا كلمت اهلي وامي وخالاتي وقالو انشاء الله على اساس ان راح نعزمهم في استراحه في نص البلد وخالاتي من الناس الي ماعندهم عيال كبار ولا سيارات يعني لو يبغو يجو راح يجو مع بعض ويروحو مع بعض للحين مافي مشاكل والحمد الله طيب راحت ام زوجي غيرت مكان الاستراحه لمكان مرا بعيد جدا جدا قلنا مو مشكله صارت العزيمه وهي عزيمه عاديه وكلنا عارفين عاديه اتفاجئ انها مسويه تهاويل وكوشه وتقديمات من برا قلت مو مشكله تبغى تفرح عشان اهلها موجودين قلنا ماشي صارت السهره والحمدالله ومكان مرا بعيد قالو خالاتي راح نخرج مع عيالنا كيف نرجع بيوتنا في نص اليل مانقدر لازم نخرخ بدري المهم جو الساعه 10 لين 1 عيالهم قالو يلا لو تجلسو ماراح نرجع ناخدكم قالو خالاتي يلا مشينا تسلمي يام فلان ع سهره والعشا اكثر من رائع والمشكله عزمت الناس ولا رحبت فيهم ولا جلست معاهم والله ولا حتى كيف حالكم جالسه مع اخواتها وبس قلت مو مشكله اصلا مرا انكسفت من اهلي محد قام بواجبهم والله حتى مافي كيفكم ولا شي خرجو وانتهى اليوم....

اليوم البعده صاحيه ومتنرفزه وماتبغى تكلم احد ليش يخرجوا بدري كدا ؟ ليش ماجلسوا ؟وليش وليش وليش وياريت ولو كدا ولو كدا واشياء تخجل صراحه ..
قال لها ولدها يامي الناس مو على كيفنا كل انسان وله ظروف تقول مالي شغل انا مسويه كل دا الشي ومايقعدو قلت في نفسي هيا حتى سلام لله ماقالت ولا شي وانا عارفه مسويا دا الشي عشان اهلها اول مرا يتجمعو بس عيب التقليل من شاان الناس حتى امي اضايقت كثير من تصرفاتها المهم....

السهره كانت حلوه والله مو ناقصها شي والناس تعشو يعني لمتى تبغاهم يجلسوا ؟ لمتى ؟
خلاص انتهت السهره والحمد الله والرجال تعشو وكل شي يعني خلاص ؟
لا مصره وتصارخ صارخ يمكن الحي كله سمع صراخه تقول ليش يخرجو بدري ليش طيب هو الناس على كيفنا ؟ ولا لازم كل شي على كيفنا مافي ايمان والله شي مو طبيعي والله جلسنا يومين صراخ ومضارب على موضوع ليش ماجلسو ؟ انسانه غريبه والله شي جدا سخيف ومايستاهل خلاص كل شي سويته قهوه شاي عشاء خلاص لمتى يعني ؟ والله العظيم اني مستغربه وعيوني كدا ليش امك تصارخ وتضارب يومين على هالسخافه هههه شر البلية مايضحك .

لامره مسويه مشكله ليش صورري حقت الزواج والشبكه عندي ليش ماتكون عندها ليش ماخذين كل شي عندهم ياجماعه بس هادي صوري انا صح ولا انا غلطانه ؟ قلت اقصري الشر يابنت واعطيها صورك عطيتها صوري يوم نقلت بيتها لو تشوفو صوري وين لقيتها مرميه اااااااه تقطع قلبي ولا حق التعب وديكور تقطعت والله العظيم انقهرت بس مابينت لزوجي شي

ولا كل مره تعرف اني طالعه طلعه مهمه تعزم ضيوف في البيت والله احسها عانيه كل شي تسوي ولا تستهبل ولا ايش مااعرف طيب زوجي يجي يقولي مافي طلعه امي عازمه ضيوف اقول له طيب انا قايله من اسبوع اني بطلع وهما عارفين كل شي ليش النكد يقولي خلاص انتهى الموضوع مافي طلعه

ولا تزعل عشان صور وشي تافهه وناس جلسو وماجلسو وكل ماطلع من يوم تعرف اني طالعه اليوم الفلاني تروح بسرعه تدور لها اي احد تعزمه والله لاحظتها كم مره انا تعبت من هالتفاهات والمشكله تقولي لازم لايمان بالله ولازم تقولو قدر الله ماشاء فعل طيب ليش ماتقله لنفسها؟

ماعرف كيف اتصرف معاها كل يوم مضاربات بيني وبين زوجي وهي السبب تحرشه علي وهوا يجيني صراح ولا نعيش يوم طيب مع بعض

كيف اتصرف معاها والله تعبت والله العظيم

لاتقولو طنشي لاني لي سنتين اطنش ومن كثر التطنيش وتعب وتفكير قلت استشيركم واخذ تجاربكم لاني تعبت منها ومن تصرفاتها .

ولا تقولو انقلي من بيتك لان ابوه محلفه لو تسيب البيت الي احنا فيه لااغضب عليك

شوفو لحد فين السخافه وصلت ؟ يعني مكتوب علي السقى طول عمري

يااهل الخبره انقذوني

اسفه طولت عليكم بس والله ضغطي مرفوع وتعبت من هالعيشه والله احمد ربي واسجد له ليل نهار واقول الحمدالله على ماعطاني اللهم لااعتراض على حكمك بس والله تعبت افكر وتعبت اطنش وتعبت منهم .

استنى رايكم ولاتحرموني من دعاكم وان ربي يرزقني الذريه الصالحه ويبعد عني كل حاسد يارب ...