ياربي متى يوقف عذابي؟؟؟!!

[ألم بسكات]

السلام عليكم
كيفكم بنات .. بشكيلكم همي وادري الشكوى لغير الله مذله
بمووت ياعالم من كثر البكاء ليل نهار
طليقي كسرني طلقني وانا لسا ماكملت عنده سنه من غير ذنب ولا شي
اتوقع لاني ما جيت على مزاجه
حاولت ارضيه سويت له كل اللي يبيه وكان بيننا خلافات عاديه مثل اي زوجين
الا انها دايم تنتهي باستجابتي له وطاعته
غالب خلافاتنا عن حقوقي .. زوجي ما اخذ منه ولا حق غير المبيت والباقي منسي
لايفتكرني بالنهار ولا باي وقت واذا جاء الليل قال ابي حقي واذا نمتي فانتي ملعونه
تعبت معاه ياعالم
هو يعرف اني اخاف الله ودايم يوريني اني مقصره معاه بحقوقه الشرعيه مع العلم انو ينبسط معي وقتها بس اللي يقصده هو مايبيني انام لين هو ينام ولا اضحك وهو زعلان ولا ازعل وهو فرحان
وادبر نفسي بنفسي ومااعتمد عليه بشي لان هذا يضايقه واذا ضايقته ربي يغضب علي
المهم انا زعلت ورحت لبيت اهلي زعلانه ولا جاء ولا ناقشني ولا راضاني بالعكس ارسل لي ورقتي قسم بالله صدمني خاصه واني حامل بابنه بشهرين
اول فتره قلت بالطقاق واريح والكلام هذا بس الحين بعد ست شهور تعبت نفسيا وجسديا وذهنيا
ابكي ليل نهار اتفشش في اللي حولي واهلي يشوفوني ابكي ويبكون معي يااربي
ابي اسكت عشانهم مو قادره اصلي الليل واستغفر عشان هالالم يروح ولا نفع
حتى ابني اللي ببطني ماعاد افتكرت فيه ساعدوني يا بنات ابي انساه وانسى حبه وانسى ذكراه
نفسيتي في الارض
اللي نست طليقها وعاشت حياتها تساعدني
اسفه طولت عليكم سامحوني