انتظر مكالمه من حماتي

[نسمه أيمن]

كيفكم بنات ابغى مشورتكم ضروري
صار بيني وبين زوجي سوء تفاهم والموضوع كبر يوم بعد يوم الى ان تركت البيت وروحت عند اهلي وبعد 12 يوم جه زوجي عشان ياخدني وابوي كان مصصم على الطلاق لان الموضوع دخل فيه الاهل وبعد حوارات طويله بابا وافق اني ارجع بيتي بس بشرط ان حمايا يجي ياخدني من بيت ابوي عشان زوجي يتعلم درس ومايكررها مره تانيه صارت ظروف وابويا اضطر يسافر قبل ما حمايا يجي ياخدني بس شرط اني ما ارجع بيتي الا اذا جت حماتي لامي واخدتني منها زوجي قال ان امه مره تعبانه وماتقدر تيجي وبعد ما الموضوع اتحل رجعت بيتي بس قلت لزوجي انا ماراح اروح عند اهلك الا لم يجو بيتي الاول لاني حسيت ان اهله شايلين يدهم من الموضوع وبكدا ممكن زوجي يكرر الغلط مره تانيه قاللي خلاص بقولهم عادي ولم بلغهم مادري ايش قالو المهم مارضيو يجو قاللي خلاص كبري راسك خلينا نروح يوم الجمعه عندهم واتراضو هناك قلتله لالالالا خلاص ماراح اروح الا لم احد منهم يعبرني ويكلمني على الاقل في التليفون يراضيني لان بعد اللي صار ماينفع اروح بيتهم عادي ولا كان في شيء احس كرامتي اتهانت وهو وافق قاللي خلاص انا بحل الموضوع وصارلنا 10 ايام اليوم جه يكلمني بشويش يقوللي ابغاك تساعديني كيف احل الموضوع بينك وبين اهلي قلتله يعني تبغاني اتنازل عن كرامتي قاللي لا بس فكري معي في حل قلتله والله مادري انا عند وجهه نظري وماراح اغيرها اللي مايهتم فيني ولا يهمه امري مايلزمني واهلك ماسالو عني ولا عن بيت ابنهم اللي كان راح ينخرب وانت حاططهم فوق راسك لاهم راضو اهلي وجم ياخدوني ولا هم راضوني وجم بيتي ولا حتى مكالمه تليفون قاللي انتي موقفك صح وكمان انا ما اقدر اروح اقولهم كلمو زوجتي راضوها عشان تيجي عندكم ايش الحل قاللي فكري وردي عليا ساعديني ...........والله يابنات انا احب حماتي كتير بس انا شايفه كرامتي قبل كل شيء انا ما ابغى اروح ولا اتصل عليهم قبل ماهم يسالو علي انتو ايش رايكم عارفه الموضوع معقد شوي بس محتاجه مساعدتكم كل واحده تقولي لو مكاني ايش راح تسوي