انا في ازمة نفسية كبيييرة جدا ارجوكن اخواتي ادخلو وواسوني ولو بكلمة

[sharo_shereen]

اسمحي لي احكي ليكي حكاية صغيرة بس استحمليني
انا حملي الاول كان بنت
وبعدها ب5 سنين ربنا كرمني وحملت تاني وكان نفسي برضوا في بنت لاني مكنتش بحب الولاد عشان الشقاوة والتربية الصعبة بحس البنات اسهل كتير
ولما عرفت اني حاامل بولد زعلت جدااا
وكل اللي يسالني هتسميه ايه اجاوب عتريس حوزمبول اي اسم لانه ماكنش في دماغي ولامهتمة اشتري ليه لبس او طلبات الولادة
ويشاء ربي ان اولد بس قبل ما ادخل غرفة العمليات لاني بولد قيصري الدكتورة بلغتني ان حالته خطيرة وخطر عليه يتولد دلوقتي وخطر عليه يستني
فقلت لها اعمل ايه يعني ابلعه اتصرفي قالت لازم حضانة وسيارة اسعاف تكون جاهزة يطلع من بطنك علي الحضانة علي طول ومش اي حضانة لازم حضانة بقسطرة قلبية ودوخنا عليها علي ما لاقيناها
وولدته وما شفتوش لاني كنت في البنج وكل اللي يروح يشوفوا يجي وشه حزين جداااااااا ويقول انا لله وانا اليه راجعون
انا اسمع كده قلبي يوجعني وقول عاوزة اشوفه ومقدرتش اصبر 3 يوم في العملية مسكت بطني ورحت له ومكنتش شوفته بس اول ما شوفته في الحضانة عرفت ان ده ابني بكيت كتير ودعيت ربنا انه يشفيه ويرد لي معافي لان كان نبض القلب سريع جداا يعني الطفل السليم معدل نبضه 80 نبضة في الدقيقة ابني كان 200 نبضة في الدقيقة متخيلة انه كان بيتنفض من علي السرير والدم مكانش بيخد دورته كاملة
وعلي فكرة انا ولدته في ليلة القدر روحت وقعد ابكي واقول يارب وادعي علي قد ما ربي يقدرني
محستش بتعب الولادة لان في اولويات
وروحت ليه في العيد وبقيت اروح ارضعه وارجع
وفي يوم قالولي هاتي ليه غيار احتياطي قلت حاضر رحت المستشفي بالغيار قالولي استني الاستشاري هيشوفوا لو بقي كويس هتاخديه معاكي
انا سمعت كده بقت الارض مش شايلاني وجه الدكتور وشافه وقالي حمد الله علي سلامته
وجهزوه وحمموه ولبسوه واخدته معايا البيت وانا مروحة ما تتصوريش عدي عليا 15 يوم دوول ازاي
وبقي اغلي عندي من روحي وسبحان الله طلع دمه زي العسل بموت فيه وفي شقاوته وكل الناس اهلي واهل جوزي ومدرسينه في المدرسة بيحبوه جدااااااااا وهو عنده دلوقتي 5 سنين وشهرين العمر كله يا رب
نصيحة لوجه الله ارضي بقضاء الله وانا قريت كتير ان في ستات بتكره الجنين اللي في بطنها
ولما يتولد بيكون اغلي ولادها عندها