بالحمل الرابع و الثلاث السابقين كانو اجهاض، يا رب التمام عخير

[reemk]

كيفكم يا حوامل و كيف حملكم ، الله يتمملنا جميعا عخير يا رب

يا بنات ادعولي انا موعدي السبت القادم بإذن الله ان شاء الله يكون كل شي تمام

احكيلكم قصتي انا و الحمل و الاجهاض، و لاني مريت ب 3 اجهاضات من قبل كل موعد الي بهاد الحمل بكون كتير خايفة لانو اسوأ ايام مرت علي تكون وقت الفحص (طبعا

اول حمل كان النبيض مبين و قوي بالاسبوع السادس و لما رحت افحص روتيني و انا بالاسبوع التاسع كان النبض متوقف (قبلها بكم يوم حسيت وحامي خف و صدري خف وجعه بس فكرت طبيعي) و تعبت نفسيتي من الصدمة كنت بس اخد فوليك اسيد و بعدها باسبوع عملت عمليت تنظيفات لانه ما كان ينزل مني دم ولا اشي

المرة الثانية كنت باخر الشهر التالت و كنت رايحة افحص ال 3D عشان نتطمن عالبيبي من التشوهات و هاد فحص روتيني قبلي دخلو 5 و ما شاء الله الوضع طبيعي (ما كنت هكلانة الموضوع) كنت دايما ادعي ربي اروح كل فحص و الاقي في نبض (كنت اخد بيبي اسبرين و فوليك اسيد)
هالمرة الحمدلله كان في نبض بس كان فيه تشوهات مختلفة بجميع الجسم
سماكة الرقبة كتييييييير سميكة و اللي تدل عتخلف عقلي شديد بالاضافة الى تشوهات بالانف و الفم و العمود الفقري و حتى القدمين (كان نفسي يقولولي اشي منيح واحد) و عملولي ادخال فوري بالمستشفى عشان انزله
بالمستشفى اعطوني طلق صناعي من الصبح كل ساعة او نص ساعو كل شوي يسألو في دم و ما كان لسه ينزل اشي بس وجع خفيف و صابتني بردية قوية و وصلت حرارتي 39 (من دوا الطلق) و تعبت كتير لبعد الخمسة المسا حسيت حنفية انفتحت مني و نزل الجنين بس و نزلت المشيمة بعديها و انا بدورة المياه بس كان ضايل شوية دم بالرحم فعملولي تنظيفات و بعدها بشهر عملولي تنظيفات سريعة لانه كان لسه باقي دم صغير كتير بالرحم

المرة الثالثة ما كنت لسه رايحة افحص كنت بنهاية الاسبوع الخامس و ماخدة اول موعد بعدها باسبوع
بس بلش ينزل علي دم بني ركضت عالمستشفى كان يوم احد فحصوني قالولي الرحم مسكر و ما في دم بالرحم و خلوني اوقف البيبي اسبرين و قالولي ارتاح قد ما بقدر و ارجع بعد اسبوع عشان النبض (كان في نبض بس قليل) و ارجع عالمستشفى فورا ازا الدم عبى فوطة كاملة خلال نص ساعة (العفو منكم)
زاد الدم بس روحت لاني تعبت و انا بسوق و الطريق للبيت كانت ازمة
طبعا انا بشتغل فاخدت كم يوم استراحة و كان الدم يقل و يزيد بس اتحرك شوي
يوم الخميس بلش يسير معي شوية اوجاع بالبطن بس ما كان الدم يزيد و حسيت صدري راح منه الوجع (انا بكل حمل بضل صدري يوجعني و الحلمات بكونو حساسين كتير)
طبعا احساسي قالي انو خلص الحمل عم بوقف بس ضليت احكي لحالي بتخيل
يوم الجمعة زاد وجع بطني و كان زي وجع الدورة و الطلق و صار يزيد بالليل و اجا زوجي و قعدنا نتعشى مع بعض ما قلتله لسه عالوجع كان مبسوط حبيبي
بس خلص اكل قلتله بدي اروح عالمستشفى عشان الوجع و الدم عم بزيدو
ما وصلت المستشفى الا انا معبية فوطة كاملة و بس فحصوني كان الجنين عم ينزل بعنق الرحم
فعملولي ادخال فوري و عملية تنظيفات رابعة (صرت خبرة بالعملية)

و هي قصتي للآن دعواتكم لي ليوم السبت لانه دكتورتي حكتلي ممكن يبين عندها ازا في سماكة للرقبة هداك اليوم.

و بالتوفيق لكل الحوامل يا رب