حبيباتى سيدات ليبيا تفضلو لأعرف ما حالكم

[dr.loly]

المشاركة الأصلية كتبت بواسطة أمل ليبيا

بنات حاق البكرة لازم تعطل ع موعدها؟؟وهل لازم تحسي ببوادر وجع قبل قرب الولادة والا عادي ؟لانه ليا 10 ايام في التاسع وماعنديش اي بوادر للولادة قصدي الوجع الي يقولو زي وجع الدورة ماجانيش بكل!!


عندي بس الالام في الحوض واعلا الفخدين هلبا لين مظايقني في المشي


بالله قولولي تجاربكم وشن هي الحاجات الي جربتوها تسهل الولادة ؟؟
اني عندي مية زمزم بنرقيها ان شاء الله وعاطيتني امي ربي يحفظها عشبة الي تنقعيها في مية لين تنفتح وبعدين تشربيها جابتهالي من الحج من فيكم جربها؟؟

اختي الغاليه على قلبي جدآ أمووووله خودي هالنصائح من اخت تخاف علــيك


اولا ماتسمعيش كلام الناااس في ان البكر تعطل .. او تجــي لية زي دورة او او او ..

رغم ان بعض الاحاديث صحيحه ..لكن المرأة تختلف طبيعة جسمها من مراه لاخري ..

اذا كانت المراه متعددة الولادات تسردلك قصص مختلفه وزي مايقولن جداتنا كل بطن وعجبــها ..



لاني مانبيكش تفكــري في انك ح تولدي قبل موعدك نفس ماصارلي ف لولي لين لقيت روحي فايته التاسع باسبوووع


وبالنسبه للالم طبيعي جدا جدا ف التاسع ..لان الجنين نزل ف الحوض وكبر ,,,
وفي دكتورة مرة قالتلي ان كل ماتزيدي تحملي الثاني والثالت يزيد معاك الثقل بعد حكيتلها ع ثقل الاء بدرري قالتلي توا تجربي ان شاء الله الحمل الثالت اكثر من هك ,,


نحكيلك قصتي في بكريا فروووسي طبعآ موعدي كان 17.3

وبم ان المصحة لي بنجيب فيها مش في اجدابيا ف بنغازي عديت عند هلي بدري تحسبآ لاي طارئ ووصلت عندهم يوم 10 ..

وكان جو رائع قدااامي لان خواتي وماما وخالتي باديات ف الموالح وبعض الاشياء لحفلة اسبوع فراس ..



لكن مجرد ما جاء الليل ورقدواااا .. وقبلها طبعا طلع بينا زوجي وخويا للسوق ومشيت واجد قريب اربع ساعات ف محلات مشي وتصباي .. تحضير لاخر التجهيزات لان ف حاجات ماما كانت تستني في ذوقي فيهن




خلاص روحت خشيت الحمام حشاااك لقيت دم مش بمعني دم هكي لونه قهوي ..

طبعا حسيت بخوف مش عادي حسيتها قربت خلآص........



عموما طلعت لماما وفرحت قالتلي خلاص مش ح تطولي


ونفس ماقالت شموسه كنت عارفه انها سدادة الرحــــم

عموما رقدت ساعتين


وساعه 3 نضت نفسيتي تعبااانه ومضايقه وقعدت نبرم ف حوش هــلي اخرتها خشيت المربوعه

وقعدت نمشي فيها بالطول والعرض ونبرم وخلاص ..

وكانت الليه وقتها زي دورة وتحتمل ..


خلاص ابو فراس جاني طول من الصبح شالني المستشفي وكشفوا عليا

وقالوا نص سم ومازال واجد انفجعت



خلاص شالني ابوفراس ع اساس الدكتورة قالتلي امشي عدينا ومشيت ومشيت( والله ماطيحلي الا جهدي المشي في جيبة فراس وتعبت ف الولاده بسببه وسبب قلة الاكل )



وبعدها ف العشيه قوت الليه .. والباقي حاكيته من قــبل ,,,,,,,




يوم الولاده هو كان اصعب يوم بجد .. والرحم سكر راسه ع 1 سم وبسسس مدة 3ايام



ماما الله يحفظها .. تديرلي ف قرفه وحليب دافئ وزوجي جابلي زنجبيل محلى بالعسل زي شاي الكيس

يديرولي فيه ف الحليب وطبعا يشربوا ويشربوا فيا للتشجيــع لان الحق معش عندي قابليه لشـــئ بكل .. لامتقبله اكل لاشرب ..(وهذه غلطتــي)



لان وقت الولاده تبي جهد وطااااقه وماما نصحتني وااجد وكنت دوب ناكل لقمة او طشة تمر

تعصدلي فيه بزيت الزيتون يمكن هذا لي ساعدني ..







مع قراءة الاذكار وسور من القران الكريم خصيصا الزلزله ..
والحق نظمت تنفسي كويس والقابلات والدكتورة لي جني متمكنات ولله الحمد..

وطبعا ولدت قبل موعدي باربع ايام اوخمس
جبت يوم 13,3


مجرد ماطلع للدنيا فراااس .. شعور رائــــــــــــــــــع وفوق من الرائع يا أموله


ح تنسي كل شئ فات بسهوله ... وهنا هرمون السعاده يبدأ يشتغل في ثواني طبعآ ..




والمسهلات ننصحك ماتاخديهش الا اذا رحمك انفتــــــــح ..

والعشبه اعتقد انها عشبة مريم سامعه بها .. بس ماجربتهش



لي جربتهن ودارتهن ليا ماما هنا ( القرفه .. وحليب دافئ محلي بالعسل والزنجبيل.. وطبعآ التمر المعصد بزيت الزيتووون)


مع تمنياتي ليك بولادة ميسره وسهله يااارب ..






بالنسبه لدعوتك ليا للزوايه يشرفني عزيزتي ... يا ليت والله

خصيصا اني نحس فيك ديما كأنك من جيلي الثمانيانات كأنك مش التسعينات مع احترامي للتسعينات .. قصدي حسب اسلوب حكيك وتفكيرك وهكــي..

ومرحبتين بيك في الشرق الليبي ..ويا الف مرحبا



ويسعدني اني تعرفت عليك ..


توا بنقول لزوجي بيش نمشوا لاموله ف الزاويه بعد اوشـــي في شحات لاني حكيتله عليهم ..ههههههه