حبيباتى سيدات ليبيا تفضلو لأعرف ما حالكم

[أمل ليبيا]

هذه قصة ولادتي للحلوات


ليلة السبت الساعة 2 نص الليل بديت نحس بلية منتظمة تجيني تقريبا كل ستة او سبعة دقايق المهم قعدت نراقب فيها باش نتأكد انه طلق وطار النوم من عيوني للصبح قلت لزوجي وقلي خلي نمشو للمستشفى المهم مشينا درتلي الممرضه كشف قتلي 1 سانتي بس جاني احباط توقعته اكثر المهم قتلي روحي وماتجيش الا اذا نزلت منك مية او دم او بدت الوجعة كل 3 دقايق روحت ولقيت في الثلاجة معدنوس وكوسا وحاجات محاشي واني خاطري فيهم قلت غير بتفسد خلي نديرهم <<<توا بالك فيه
المهم لما تجي الوجعة نوقف شويا وبعدين نواصل لين كملتهم وتغدينا وبعدين كلمت امي ع السكايب قتلي خيره صوتك هكي قتله شئ غير نعسانه ربي يحفظها حست بيا تعبانه المهم لما جاء الوجع زاد وبدا كل 5 و 4 دقايق وبديت نمشي في الحوش ونشرب في مية زمزم وقعمزت في مية سخونه ونقول في اذكار تسهيل وبعدين نزل عليا دم مادورتاش قلت اكيد زي المرة الاولى المهم المغرب خلاص معاش قدرت نتحمل صلينا ورجعت للمستشفى تاني لقيت نفس الممرضة الحق ايدها خفيفة المهم دارتلي كشف قتلي 5 سانتي
الحمد لله واخيرا المهم ركبتلي الاجهزة والوجع الصناعي وطول طلبت الابرة ضربها ليا متخصص ماشاء الله ماحسيتهاش بكل واتصلو بدكتورتي جت وزوجي بجنبي بعدين بديت شويا ونرجع حشاكم وجتني رعشه وتلخبطت المهم الساعة 10 تماما كشفت وقتلي 10 سانتي ولادة جت الدكتورة والممرضات وحطولي الاكسجين ع وجهي وبدو بوش بوش
المهم للاسف من تأثير الابرة فقدت السيطرة ع نفسي ومعاش قدرت ندفع لين يغيب عليا النفس ونحس روحي بنموت بلا فايدة وجو معظم ممرضات القسم وكلهم يشجعو فيا ومعاهم زوجي وبلا فايدة بعدين قتلي لازم نشفطها حاولت 3 مرات وبلا فايده وبعدين قتلي لازم نفتحك هلبا وفتحتني بلا فايدة المهم زوجي داخ لما شافني تعبانه وشاف الدم <<<عابيه عليه بيساعدني
وقعدت لاخر لحظه ندعي وهما الممرضات يزنو ع الدكتولرة دخليها العمليات وبفضل ربي بعد ساعة ونص طلعت فطومتي <<<واخيرا
طبعا اني طول انهرت وبديت نبكي بأعلا صوت ويقولي زوجي نجيبهالك نقوله لالالالالا مانبيهاش ارفوعها غادي مانبيهاش

بعدين خيطتني قعدت ساعه لكن الحمد لله الدكتورة بارك الله فيها سايرتني لاخر لحظه وفكتني من العمليه غير لما نشوف حجابها وهي مسلمة سادتني
وبعدها جابولي بنتي شفتها شويا ورفعوها ياناري ماعدلتش عليها من الصدمة وبعتت مسج لامي عندهم صبح ((صباح الخير ياجديدة الحمد لله اني وماما نضنا بالسلامه حفيدتك فطومة)) مسكينة طول اتصلت وطبعا قلت الو وبدينا واني واياها نبكو معاش قدرنا نتكلمو
اااه تمنيتها جنبي

بعدين حولوني لحجرة اخرى ومشا المخدر بدا فيا الوجع الصح لين جابولي مسكن طول رقدت
والصبح اول مانضت قتلهم نبي بنتي رجعلي عقلي هههه والحمد لله ياربي تجربه طويله وصعبة تجربة الحمل لكن الحمد لله ثمرتها بنية صحيحة وعسوله ان شاء الله ربي يحفظهالي ويقدرني نربيها تربية صالحه يارب