رهاب اجتماعي

[leemona]

مرحبا ياحبيباتي
بقلكن مشكلتي اللي ماحد يعرف فيها الا انا
انا يمكن اعاني من الرهاب الاجتماعي ماكنت اعرف حتى قرأت مرة عنه نفس الاعراض
يعني مثلا لما انعزم على عرس ولما اجي اسلم على اقربائي واصدقائي بالعرس تجيني حالة غريبة
ترجف ايدي وكل جسمي يرجف بشكل ملحوظ ويتخشب جسمي احس بالزور احرك رجلي او يدي ويتسارع النبض عندي لحد اوقات احس يصير بوجهي تشنجات وصعوبة تنفس وشفايفي ترجف متل ياسر عرفات الله يرحمه...جد ماعم بالغ عبوصفلكن بدقة لتحسو فيني
طبعا الكل يلاحظ انه ليه ترجفي انحرج واتحجج انه مريضة مرتفعة درجة حرارتي وهكذا....
صرت اكره الاعراس والمناسبات الاجتماعية والحفلات لانه اخاف تصيبني هالحالة..
انا ماكنت اعرف ليه هيك يصير معي...قرات عنه يقولو لازم تزيدي التقة بنفسك
والله انا عندي ثقة بنفسي كبيرة واصلا انا بالجامعة كنت اروح وارجع للبيت بنفسي وانزل عالسوق اشتري كل اغراضي بنفسي
وياما بتعامل مع كل الناس موظفي الجامعة وشبابها وصديقاتي كثيرة وطلعت السرافيس والتكاسي ماعندي اي مشكلة...
بس مشكلتي بالتجمعات النسائية وبالعكس بتصبيني الحالة لما اكون بكامل اناقتي يعني عارفة انه الناس رح تمدحني على جمالي ولبسي
فبصير برجف غريبةةةةةةة يعني نفس الاشخاص اشوفهم وانا لابسة بدلة او سواريه او تنورة قصيرة او متشيكة تجيني الحالة وهم نفسهم اشوفهم
وانا لابسة عادي جدا مثل بالمطعم مثلا او بالجامعة عادي طبيعية اكون ولا يصير معي شي يعني عندي ثقة بنفسي كبيرةوقصدي مااخاف الخروج من البيت او التعامل مع اي حد
طبعا انعزلت عن الاعراس وصرت لما احد يقول في جمعة نسوان او عرس اكره عمري وصرت حاول لما اروح قبل ماادخل اهدي نفسي اقول تنفسي وريلاكس
وادخل تلاقيني صرت ارجف رجف مو طبيعي لدرجة مرة رقصت وانا كل جسمي يرجف وثقل يصير بيديني بالزور اتحرك وكل الناس لاحظت ..واشعر انه قمت بمجهود كبير يعني وقت تقلي حماتي او امي عنا حفلة
بتلاقيني اكلت هم وحاسة كاني رح اعزل كانه من كثر مااحس بمجهود جسمي يتعب تعب واقعد افكر كيف تمرؤ هالمناسبة واخلص منها بدون ماحد ينتبه عليي
ومتل ماقلت ماحدا بيعرف هالشي البعض سمعني مرة جملة فقلت خجلتوني فقالولي هلا عمترجفي ..
يعني يابتحجج باني مريضة ياخجل بس والله انا مابخجل منهم حالة نفسية فيني
كيف بقدر اتخلص منها ساعدوووووووووووووني