حمل سليم ، وبغمضة عين اجهاض بسبب حبة دواء .. قصتي

[اللؤلؤة البيضاء]

السلام عليكم يا بنات
كيفكن شو اخباركن يارب تكونوا تمام
طبعاً صار فترة منقطعة شوي
لأني مريت بظروف جدّاً صعبة بس الحمد لله ع كل حال هلأ احسن ..

طبعا أنا رح ابدا قصتي فوراً
وقررت انزلها حتى يستفيد منها غيري لأنها جد ألمتني نفسياً

أنا متزوجة صرلي سنه و3 شهور
وطبعاً اول مره عرفت حالي حامل بعد انتظار كان بتاريخ 3/12/2017
فرحت كتير وماكنت مصدقه حالي
انتبه ع المشي والحركة وما ابذل اي مجهود
وأي اكل مضر ما آكلو ، بالمختصر انتباه شديد
مر تاني شهر من الحمل بسلام ونهاية اخر يومين بالشهر التاني
اصبت بحرارة وزكام وكحة مرض بسبب البرد يعني
تعبت وكنت مرهقه كتييير..رفضت اخد اي علاجات خوفاً عالحمل رغم توفر العلاجات
الآمنة مر يوم ويومين و3 ايام , وتعبت وخفت إنه الكحة تأثر عالجنين
اتصلت ع دكتورتي ووصفت لي حبوب / أموكسيسلين
وقالت انها آمنه للحمل وسألت عنها .. وسلفتي كانت حامل واخدت كومة حبوب منها

تحديداً اليوم الثاني من الاسبوع التاسع
بالليل تعشيت ، وقررت اشرب اموكسيسلين
وهون بديت مأساتي ..

شربت حبة اموكسيسلين .. وما مر خمس دقايق
الا وانا حسيت اني بدأت افقد حياتي

طبعا حالة صارتلي من سنين بس كانت اخف بكتير
وماتشخصت يومها تشخيص صحيح
ولكن لما بدأت الاعراض بعد شرب الاموكسيسلين
عرفت انه رح اتعب ويصرلي شي مو منيح..

الاعراض كانت
انتفخت ايدي ورجلي واحمرار وتنميل من نوع غريب
وكأنه نمل ماشي بدمي وكأنه الم شديد بدمي
بدأت اختنق ومااقدر اتنفس
وفقط صرت قول لزوجي مستشفى مستشفى
بديت اصابعي تتشنج وتنضم ع بعضها وماقدرت فكها نهائي
زوجي مافهم شو بدي
طلعت من غرفتي وصحت لاهل زوجي باعلى صوت مستشفى الحقوني
لاني كنت عارفه اني رح اتعب اكتر
استفرغت فوراً ومازال الالم يزيد ويزيد .. ألم جد غريب يابنات
والله كأنه اوجاع شديدة بدمي !!!
كنت حتى لما زوجي يصبرني ويمسك ايدي كنت ادايق لانه كان يألمني !!
بعد الاستفراغ فقدت وعيي تمامااااااا
يمكن 10 دقايق يرشوا الماء ع وجهي ويصحوني وبالكاد صحيت ومو عارفه حالي وين
حتى صوت زوجي اخدت دقيقه لميزتو
وقفوني حتى البس عبايتي وحجابي ووقعت مره تانيه بالارض
وتالته ورابعه ونفسي ضااااااق وع كلام سلفتي واهل زوجي جسمي صار اصفر
وفجأة صرت كأني ورقة خريف دبلانه
فوق الوصف شعوري واحساسي
كنت عم شوف الموت بعيني ..
شالني زوجي وحطوني بالسياره
وبدأ عندي مغص شديد بالسياره عرفت اني رح افقد الجنين
لأنه اجتني آلام وتشنج باصابعي واشياء فظيعه
عرفت جنيني رح يروح
وصلت للمستشفى ضربوني ابر
علقولي اكسجين ، وتشخصت حالتي ، حساسية بنسلين
صدمة مناعية من المرحلة الخطره..
نزفت فوراً بنفس اليوم وتوقف نبض الجنين واجهضت..

انا نزلت قصتي حتى تتعظوا ، حتى تكونوا منتبهين
لأني كتير دورت بالنت ومالقيت حالات اجهاض من هالنوع
ويارب ماتصيب اي انسان..حساسية البنسلين مشهوره ولكن حبيت تستفيدوا

ادعولي بالعوض والشفاء ، بعد الحالة هي اصبت بحكة شديدة بكامل جسمي صرلها شهور
وكتلة حميدة بصدري الحمد لله ع كل شي بس كتير تعبت بعدها
ويارب ماتشوفوا شررر