مشكلة امي كيف احلها

[مي مي]

السلام عليكم ورحمة الله وبركاته
اتمنى تقبلوني عضوه جديده معكم

اسمحولي بدخل بالموضوع على طول
امي الله يخليها لي امس شكتلي من مشكلة صارت بينها هي وابوي وانا اصلا عارفه بس امي اول مره تفتحلي قلبها وتتكلم

المشكله هي ان ابوي صارله تقريبا سنتين ماينام مع امي بغرفة النوم دايم نايم بالصالة
وطبعا من وقتها ماصار بينهم جماع
هي تقول انها شاكه بالشغالة وانه من بعد ماسافرت الشغالة بتقريبا اسبوع طلع ينام بالصاله وصارت ذيك الفتره بينهم مشكلة
وتقول ان الشغاله مسويتله سحر ومدري وشو
والحين قاعد يزن يبي يتزوج وامي مسكينه تبكي وميته قهر
المهم
انا عارفه ان الشغالات بلاويهم كثيرة ومااستبعد تكون سوتله سحر
بس بصراحه امي بعد غلطانه
يعني مهمله بنفسها كثير
يعني ماتتحمم الا من الجمعه للجمعه وفي البيت دايم لابسه قمصان من ابو 30 ريال
والشعر منكوش والوضع يحزن
على ان ابوي من الناحيه الماديه مايقصر معها بس هي اقتصاديه حبتين
ودايم لما تتزين اذا جت تطلع ابوي يقولها انتي ماتتزينين الا عند الناس وعندي لا
حاولت اقولها تزيني في البيت تقول لا يعرفني ويعرف شكلي مايحتاج
الله يهديها عندها قناعات غريبه لما كنت نفاس عندها وزوجي كلمني قالي انه رح يجي قمت غيرت ملابسي وتزينت وتعطرت ولما شافتني قالت مين بيجي قلت زوجي قالت الله واكبر هذا كله عشان زوجك يعرفك مايحتاج اطلعيله لو بقميص
واذا قلتلها البسي من الجلابيات والبلايز الحلوه الي عندك بالدولاب تقول لا حرام ماابسها في البيت هذي بس للطلعة
وقالتلي ابوك يبي حرمه معاه وانا خلاص ماعاد عندي الي يبيه
هي عمرها تقريبا 55 وابوي يمكن 60
وتعرفون الحريم بهالعمر تقل رغبتهم الجنسية
بس من كلامها معي انها متضايقه من الوضع وتبيه يرجع ينام معها بغرفة النوم ويجيها من فترة لفترة مو يقطعها على طول
وتقول تبي تروح لشيخ يفك السحر بس من دون مايعرف ابوي
طبعا انا كلامها موداخل مزاجي وعارفه ابوي وش يبي
وفكرت قلت بجيب لهم مفرش سرير جديد واشتري لامي كم قميص نوم واحاول اخليها تغير شكلها بالبيت
تتوقعون هالشي بينفع ؟ ولا امي صادقه ان الي فيه سحر ؟

على فكره ابوي معزم على الزواج
لاني قبل كم يوم سمعته يكلم بالجوال ويقول انه متزوج بس مابينهم شي من سنتين وانها بس ام عياله
انا عارفه ان هالشي من حقه وربي حلل اربع
بس خايفه على امي خايفه يجيها شي لودرت خاصه من كلام الناس الي ماترحم رح يتشمتون فيها واولهم خواتها
اتمنى لوكان فيه بالمنتدى حريم كبار يساعدوني لانهم اخبر