حبيباتى سيدات ليبيا تفضلو لأعرف ما حالكم

[اوشي]

تصبحـــــــــــــــــــوا علــــــــــــــــــــــلي خيـــــــــــــر

[جوهرة ليبيا]

خشيت يااوشي ياحبيبه وبدي رعب الولاده ههههههه ربي يسهل عليا وانوض انا وشمعه حوشي التانيه بالف خير

[جوهرة ليبيا]

ذكروني البنات

في حملي بريناد عروس 20يوم او اقل خشيت للدكتوره طلبت تحليل ورجعنا عندها في الغرفه شوي خشت الممرضه وعطت النتيجه للدكتورا

باركتلنا قالت مبروك حامل

ناض راجلي باسني وضمني وانا المسكينه متت من الاحراج اصلا قاعده متعودتش عليه ومتحشمه منه


حتي هو اتحشم واتاسف من الدكتوره قالت عادي اتصير يوميا

طلعنا وشاد ايدي بقوه ويبيني نمشي بشويش


والحق حتي في حملي هذا فرحان بس انا اللي قلتله وضمني في السياره بعدت نجري هههههههه


ربي يحفظه الغالي


وربي مايرزق كل محرومه الذريه الصالحه ياااااااارب



تصبحوا علي الف خير

[هدية الخالق]

السلام عليكم ورحمة الله وبركاته
كيف حالكم حبيباتي اليوم
طبعا اليوم عطلة وفرحااانة بنطير ديما يوم الجمعة في الليل نفرح زي الصغار لأنه صابحة عطلة هههههههه والله ماهو مني من الكساد والروتين الممل طول الأسبوع وراجلي من الصبح لليل برا الله يعاونه حاصل في القراية وضغط عليه الفترة هادي
المهم نضت الصبح التسعة ونص مالقيتش سوما في السرير طلعت للصالة لقيت راجلي مسكين حاصل فيها قاللي نايضة من الثمانية تنقنق وهو طبعا نايض من قبلها بشوي شكله طاير منا النوم هكي نوعيته مايرقدش هلبة شكله من التخميم في القراية والا مش عارفة وخالتكم سوما ترا شن دايرة اليوم من عملة؟
الصبح الساعه سبعة ماحسيتش كان بشي يشح في خيط .....(حمالة الصدر..)من وراء والمشكلة راجلي مقابلني مش وراي كان هذا شكيت فيه هههههه امشي تلفتت ونلقاها سوما ناقزة من سريرها لسريرنا انخلعت ونوضت راجلي نحسابه هو منزلها والمشكلة أول مرة تديرها قبل تصبي بس وتشد في القضبان كأنها محبوسة توا خلاااص تعلمت وعرفت الطريقة خوديها كل يوم هكي تخيلواكان قدمت خطوتين عند رجليا راهي جت على حاشية السرير ونقزت عالوطا ربي يستر وخلاص

[هدية الخالق]

طلعنا مع الساعه 12ونص قلت لراجلي نبوا مكان قريب مانحبش نقعد فترة طويلة في الباص نزهق ومنرجع حشاكم وخصوصا يوقف كل شوية على محطة لين نقلق امشي قال في حديقة قريبة تقريبا نص ساعه تبعد علينا وجنبها سوق ومطعم قال باش ندهوروا بعدها نتغدوا وناخدوا بضاعتنا ونروحوا مشينا ادهورنا الجو في البداية كان حلو ومشمس وركبنا الدراجيح اني وسوما وتمشيت لين قلت بس بعدها الجو سبحان الله انقلب رييح وصقع قريب ثلجت وراجلي لابس نص كم بس واني تحت الجلباب بدي سيور بس قتله خلاص هي نعدوا للسوق الاول نبضعوا وبعدين نمشوا نتغدوا خدينا بضاعتنا عالسريع ومشينا لمطعم بريطاني خاص بالمأكولات البحرية بس اول ماخشينا حسيت اللية بدت تخبط نحسابها دورة خفت تجيني غادي ويصيرلي موقف محرج قلتله خود وجبات نآكلوهم في الحوش وخلاص خدينا حوت نوعين واحد مقلي سكالوب والنوع الثاني في انصاف مع سلطة ومايونيز وخدينا بطاطا مقلية وشرائح بصل مقلي وروحنا وطلع وجع الدورة عالفاضي سحنت فيا طول اليوم ومافي شي وموعدها 15لكن ديما تقدم يومين تلاتة بالريح عمرها ماجت في نفس اليوم قلت كان قعدت االية حتى غضوة ومافي شي منشك في الأمر زي سوسو وشموسة لاني من الاول شاكة انه في غلط صار ونحس في اعراض زي شراهة في الاكل والميل للنوم فترة النهار مع اني ليا شهووور معاد نعرفه نوم النهار وتوا زادت االية شككتني لانه اعراض الحمل زي الدورة ان شاء الله خير
سلامات توا سما شادتها عيااااط واني بديت نتوتر من عياطها لما تعيط يوجعي ضهري سبحان الله شكله تشنج

[هدية الخالق]

صباح الخير شن الجو بنات
سوسو وينك غريبة مش خاشة تعرفي اني ننعس ومنرقد الساعه12ونص لكن قلت خلي نخش نشوف سوسو أكيد نايضة
وخشت قالت حامل والا هههههه فضوووول لكن نحس فيك مش حامل كان هذا راك خشيتي تجري تخبري فينا في المفاجأة
شن بيرقدني هيا خشي نبي نعرف شن صاااار ؟ههههههه
سلام منعدي نرقد نحس في روحي هلكانة كان يسمعني راجلي يقولي منين هلكانة طول اليوم مكسدة والحوش شقيقة صغيرة ماياخدش مني ساعة لكن سما سليمتها بروحها تهلك الله يهديه راجلي علمها عالطب فوق والله ماعاد تبي وطا بتهبلني والله لين نبكي مرات يارب صبرني عليها امتا بدير رجلين وتمشي يخف عليا الحمل شوي
هي سلامااات الليلة نهدرزوا غضوة

[sosolibya]

صباااااااااااااااااااااح الخير نضتو ولامازال

نفسيتي مدمرةةةةةةةة لا إله إلا الله

التحليلي متع الدم حتى هو سالب

مش عار فة شن صارلي اضاااااااااايقت بس راجلي فرح وقاي خلي جسمك وظهرك يرتاح

بس انا مش مطمنة للتحليل علاش ماجتش الدورة اليوم 7 ايام تأخير

وزايد حالتي النفسية امس واليوم نفكر في اني وحييييييييييدة ونبي اختي

خلاص بنبكي ونبكي نشكيييييييييييي

[شموسه 88]

السلام عليكم ورحمة الله وبركاته

[شموسه 88]

بهي ياسوسو قلبك اطمن نا ماازلت ما حلتت واليوم نضت مزكومه اوصداع اوزوجي ابسلامته مازال ماروح"قالي نطلع في العشيه" اليوم فطرت ماقدرتش انصيم اونفس جوك جوي شييييييييين نبي انروح لحوشي انكمل باقي حوستي ادبيشاتي

[sosolibya]

ياريت يجي حد يهدرز معي