كيفكم بنات
الله يسهل عليكم و تولدو بالسلامة
رجعت لكم احكيلكم قصة ولادتي
ارتاحو قد ماتقدرو
بعد الولاده مافي نووووم
سهر و رضاعه و تغيير حفايظ كل دقيقة
والجسم مكسر
حاسة حوضي و رجولي وعظم العانه تألمني
كأني حامل
انا ولادتي محدده يوم 6 او 10 ديسمبر
يوم 1 ديسمبر الاحد اللي فات بعد صلاة الفجر بدء معاي مغص دوره من بطني
وما توقعت انه طلق لانه في حملي الاول الالم بطني و ظهري
ودخلت المنتدى الصباح و قلتلكم في المنتدى و طلبت انكم تدعولي
طبعا انا خططت انه اخذ ابرة ظهر وكنت فرحانه ومعتمده كليا انه ولادتي هذه بدون الم
بدء الالم يزيد و يقوى على الساعه11 صباح
سبحان الله المفروض اروح المستشفى على طول على اساس اخد الابرة من بدري
بس ما رحت و قلت في قلبي اتحمل الالم و الله يكتب اللي فيه خير
و جلست اعاني و اصرخ في البيت و زوجي نائم ما يدري
والشغاله انفجعت علي و قالت رووووحي
طبعا من الساعه 5 الفجر الى 5 العصر و الالم سار قوي من 1 الظهر
رحت الساعه 5 ونص العصر المستشفى
وكشفت علي و قالت ولاده 5 سم ونص
وطلعوني فوق و جلست ابكي زي الاطفال و اقلهم ما ابغى اولد ابغى ابرة ظهر
قالولي طيب
طلعوني فوق و بعدها كشفت بفتره وقالت 7 و نص و زوجي راح يدفع فاتورة ابرة الظهر
يوم رجع قالتله الدكتوره ما يصلح خلاص ولاده ً
وانا ابكي و اصيح و اقلهم ابغى الابره ما ابغى ولاده
والدكتوره تقولي خلاق دحين اعملك تحريض و يفتح بسرعه
وانا زي الاطفال اصرخ و اقلهم ما ابغى الم
وكشفت علي بعدها بفتره مع التحريض سار 9 ونص سم
ورفعو رجولي و انا اقول ماااااااااااا ابغى
حرام عليكم يل كذابين ليش ما اعطوتوني الابره
طنشوني و زوجي عند راسي يقرء على قران و يقول خيره هذه من ربي بدون الابره
وهما يقولو دوفي و الله ما عرفت
و الكل يصرخ دوفي و الممرضه تضغط بطني و و دفييت و نفسي انقطع و مع الصراخ
طلعت بنتي الله يحفظها و بعدها اغمى علي وما فقت الا وهي تخيطني وخلصت
وحسيت بالخياطه بس مقارنه مع الم الطلق ما تحسي
الحمدالله على كل شئ و عقبالكم يارب تتسهل اموركم
بنتي قالو عندها صفار اشوي وما تحتاج نخليها تحت اللمبه حق الصفار
ادعولها يخف الصفار و يحفظها من كل شر و سوء و عين.