تجمع حبيباتي الكروشات اللي راح يولدون بشعبان

[na3ooma]

الجزء الخامس

مستلزمات الخروج

اذا حبينا نخرج مع البيبي لسفر , او مشوار او حتى تطعيم راح نحتاج شوية اغراض منها ضروري ومنها كماليات ..

1- شنطة اغراض البيبي
مهمه مره ومانستغنى عنها , نحط فيها رضعه جاهزة او رضعه معقمه فاضيه مع مقسم حليب مع ترمس صغير وقارورة موية علشان نحضر الرضعه .. وحفاضة او اثنين , ومناديل تنظيف البيبي , وقطن و كيس نحط فيه الحفاضة قبل نرميها . وكيس للرضعه اللي استخدمناها علشان لاتنقط وتوسخ الشنطة.


الشنط اشكال والوان اهم شي انها تكفي كل الاغراض ومليانة جيوب ويكون معاها اللي نحطه على طاولة تغغير البيبي < نسيت اسمه.

2- سرير متنقل
البعض يجب يشتري هالسرير علشان البيبي يفضل مرتاح ,,لكن انتوا بتتعبوا من شيل السرير اللي نايم فيه البيبي وكمان هو لسن معين مايتعدى 4 اشهر



3- عربية البيبي

وهي اهم من السرير وبديل افضل , مريحه ماتشيلوها وكمان تجلس معاكم لحد مايكبر البيبي وفيمنها موديلات فيها كذا شي ..يعني كرسي سيارة ملحق مع العربية او سرير ملحق وكذا تكونوا ضربتوا عصفورين بحجر .. بس العربيات المقسمة اغلى طبعا


دي النوعية اسمها travel system شاملة وسعرها يبدا من 1700 ريال الى 3000 ريال
علشان لما تفكيها تكون بدا الشكل


كرسي هزاز وكرسي اكل وسرير نوم علشان كدا اسمها نظام سفر , لو عندك وحده منها خلاص ماتحتاجي تشيلي كذا غرض للسفر وتنفع للي سفرهم كثير.


وعندكم هدي العربية العادية اللي ممكن تنفع للنوم او الجلوس والبيبي يكون مواجه لك او للناحية التانية , يعني انتي تتحكمي فيها


واسعارها من 1200 وممكن باماكن تانية تبدا من 900 ريال زي سنتر بوينت

وعندكم الموديل الحلو الثلاثي



وبرضو اسعاره فوق 1100 ريال

وعندكم عربيات كلاسيكية معروفة زي دي



وهدي اسعارها تبدا من 300 ريال ..

اهم شي في العربيات انها تتعدل من الظهر علشان البيبي ينام مو يجلس , وتناسب سنه لان البعض يبدا من عمر سنة فانتبهوا للسن اللي على العربية وانها قابلة للتعديل كل ماكبر البيبي على الاقل اول سنة وبعدين تتغير لمقاس اكبر.

4- شنطة حمل البيبي

وهدي برضو كماليات , تشتروها تنفعكم بره البيت اذا زوجك حب يشيل البيبي او انك تلبيسها وتشيلي البيبي في البيت لو لحالك وماعندك احد يساعدك ومحتاجه تشتغلي وتشيليه



5- بطانية الخروج

تفتكروا لما قلت لكم اشتروا بطانيتين غير طقم فرش السرير ؟
كانت بطانية للبيت والتانية للخروج تغطي بيها النونو وهو نايم بره لان العربيات او السراير المحمولة او حتى لو شلتيه بيدك محتاج يتغطى



.

6- اللي متعودين يشيلو البيبي ومايبغوا اي عربية ..طبعا عندهم المدسات

ممكن تكون الجديده , خفيفة ومبتكرة وتشبه الكوفلة زي دي


او المدسات التقليدية الكبيرة



7- واخيرا كرسي السيارة
يمكن عندنا مانهتم كتير بس في اوروبا وامريكا شرط اساسي اذا عندك بيبي ,,انا لما سافرت ولما كان عندي زوجي بعثة كانوا مايعطونا السيارة الا بالكرسي , ويتاكدوا انه يناسب عمر البيبي لحد ماصار عمر بنتي 5 سنوات وسافرنا تاني وبرضو لازم كرسي ولا فيها غرامة كبيرة .. يعني من 0 الى 5 الكرسي اساسي
فيا حبيباتي دندوشة ومس يويو الكرسي موضوع مافيه مفر ابدا





اهم شي للبيبي وقت الخروج الشنطة وفيها كل الاغراض وبعدين اختاري سرير او عربية او مدس ..

.

اتمنى مانسيت شي للخروج ..باقي جزء لاشياء كثير البعض يعتبرها كماليات والبعض ضروريات وواجبنا اننا نكتبها وممكن نتكلم فيها سوا اذا فعلا ضروري ولا لا ..
وجزء على جنب نخصصه للماما الكروشة الحلوة ..

[Miss YoYo]

المشاركة الأصلية كتبت بواسطة ام الحلوين 5

مشكورره نعومه ع التقسيمات والاغرااض الله يعطيك العافيه ويفرح قلبك بشوفة جنينك
الف الف الف مبروووووك عشقي ع البنووته ادعي ربي يسهل ولادتك والله البنوتات يدنون
مبرووووووووك الف مبروك مس يويو تتربى بعزكم يارب والله يفرح قلبك بشوفتها بحضنك يابعد تسبدي البنوتات يدننون وتربيتهم سهله وحنونات لبى قلوبهم
انا عندي اربع ربي يحفظهم لي اذا شافوني مضايقه قعدو يدلعون فيني الله يصلحهم

الله يبارك فيك أم الحلوين ... ^^

[baby`s smile]

يعطيك العافية نعوماا

عشقي ومس يويو ألف مبروووووك البنوتاااات
عقبال ماتفرحوا فيهم باحضانكم

تحمست أبغى اعرف جنس البيبي
ماشاء الله الأغلب عرفوا .. وكأنوا الأغلب بنات

سفونه يالله هانت ان شاء الله بكره تروحي وتطمني ع البيبي وتطمنينا

[na3ooma]

الجزء السادس

الكماليات ( بعضها ضروري )

كيفكم , يلا نجي لجزء بصراحه مهم ,, وزي ماقلت لكم هو كماليات للبعض وضروريات للبعض الاخر .. بس لازم نكتبه لاننا نحتاج نعرف كل شي .

1- سلة موسى
البعض بعد مايشتري سرير البيبي الدائم , يحب يكون عنده سرير متنقل من غرفة لغرفة
زي سلة موسى ..خفيفة ومتنقله وتنفع تحطيها بأي غرفة ,,البعض يجيبها ويحط لها فرشة او زينة او مفارش مطرزة ويكون سرير استقبال .



عيبها انها ماتتحمل وزن يعني حدها 4 او 6 اشهر من عمر البيبي
وعيبها الثاني حيكون سعرها مرتفع لو لكان للاستقبال علشان الفرشة وغيره.

2- سرير السفر او السرير المتنقل
ينفع مثلا لو انك ساكنة في منطقة ورحتي تزوري اهلك في منطقة تانية يكون معاكي سرير متنقل زي دا

اللي هي الاسرة البلاستيكية , ميزتها خفيفة وتنطوي وتصير شنطة وكمان تتحمل لعمر سنتين وممكن تخلي البيبي يلعب فيها لما يكبر . وسعرها يعتمد بعضها يبدا من 500 ومافوق

3- دولاب للبيبي

مشكلة الدولاب المساحه , لو كان عندك غرفة مخصصة للبيبي , او بيروح غرفة مع اخوه وفيه مساحه لدولابه يصير ممتاز او انك تشتري الادراج الصغيرة


او بعد ماتشتري السرير اشتري وحده ارفف زي دي وتحطيها تحت سرير البيبي .



موجوده بالطلب من ايكيا او مذركير او ممكن تفصليها...

4- طاولات التغيير

وبرضو البعض يعتبرها كماليات ,, وعندك زي ماقلنا انك تشتري سرير كامل بكل قطعه فيه زي الدواليب وطاولة التغيير ,,او تشتري بانيو مع ارفف وطلوة تغيير زي دا


ودي سعرها على حسب مكان بيعها , يعني ممكن من 300 وممكن عند البعض من 700
او انك تكتفي باللبادة البلاستيك اللي تحطيها فوق اي طاولة ..



كلهم كماليات بس بالنسبة لكل وحده فينا حيكون واحد فيهم ضروري .

5- اجهزة مراقبة البيبي
وبرضو مهمه , خاصة للي عندها بيبي واحد وراحت تسوي شغل البيت وهو نايم في غرفته
او حتى عندها اطفال ,,وهو نايم ومقفله عليه باب غرفته علشان الازعاج ..
تحسي براحه نفسيه انه نايم ومرتاح وبنفس الوقت لو بكي راح تعرفي

ممكن تشتريها اجهزة صوتية < وهذي جربتها مررره حلوة

الاسعار من 700 بس سمعت انه في اماكن تبيعها من الوكيل بسعر اقل

وعندك الجديده اللي بكاميرا ..

وطبعا من امازون سعرها حلو قرب 700 بس عندنا اسعارها مو اقل من 1200 ريال

6- مقياس لدرجة حرارة الغرفة
وبرضو مهم اذا كان المكيف في البيت مو سبيلت او ديجيتال ,, لان حرارة الغرفة المناسبة للرضيع مابين 21 و 23 درجة ..اقل او اكثر راح يبرد او يصير فطسان حر



تلاقيه في كل مكان (سنتر بوينت - تويز ار اص ومذركير وغيرهم ) ورخيص مايجيب 30 ريال واحيانا يجي هدية مع اطقم البيبي ..وهو زي اللزقة تحطيه على الجدار جنب البيبي وبس وتشوفي كم الحرارة .. اذا عند الاصفر معناه تمام واذا عند الازرق معناه برد على البيبي , والاحمر حر على البيبي

وهدا واحد تاني للحمام


تحطيه في البانيو وهو يكتب لك درجة الحرارة علشان المسكين مايتحمم وينسلق او يتجمد ولازم تكون 37 درجة.

7- حاملة مناديل ..كماليات


مايحتاج تشتروها منفصلة صارت تجي مع اطقم المفارش ,, شفتها موجوده مع طقم المفرش في بيبيز ار اص .

8- العاب للسرير



وبرضو تجي مع طقم المفارش ,,
علشان كدا الطقم بـ 500 هناك لانه يشمل مفرش السرير وكمان اللحاف ومعاهم اللعبة ومعاهم حامل المناديل ومعاهم كمان مفرش حواجز السرير لحماية البيبي .

9- سلة غسيل

ضرورية ,, بصراحه لازم غسيل البيبي مايتحط مع غسيل احد ويتغسل لحاله



سعرها من 30 وممكن اذا مو حابين قماش تشتروا بلاستيك وبوضو موجود شفته .
او تشتروا سلة خشب ,, المهم غسيل البيبي يكون لحال .

10- الكرسي الهزاز
ينفع من اول شهر , وياسلام عليه مريح وموسيقى ولا تتعبي يدك ,,بطارية وخلاص



الاسعار من 700 ريال

11- مرجيحه
هي مو مرجيحه بس ماارعف ايش يسموها بس حلوة وتنفع من سن 6 اشهر



12- ستارة تحمي من الشمس في السيارة
طبعا النونو اللي جالس في الكرسي مو معقول نخليه يتشمس

كمالياااات

13- بلاستيك حماية
هو يحمي من المطر ,,,بس ضروري نجيبه حماية من العج والغبار هههههههههههه


ينفع للكرسي او العربية .

14- ميزان حرارة الطفل
ضروووووووووووووري جدا

جيبوا حق الاذن وريحوا نفسكم مهما كلفكم فهو مفيد وعليه ضمان سنين وكمان البيبي لازم له لانهم يسخنوا بسرعه بعد التطعيمات او من اي فايروس فلازم تعرفي البيبي تعبان لاقدر الله ولا لا ,,,, وموازين الفم مو عملية مع الرضع ونفس الشي موازين الجبين ..
ممكن تجيبوا لهاية ميزان حرارة اذا مو حابين حق الاذن ..بس هو الادق

15- جهاز بخار الغرفة

اتوقع حاليا موجود في كل بيت بسبب الغبار الموسمي عندنا وبسبب كل بيت صار فيه احد تعبان صدره



16 - مفرش لعب البيبي

ودا برضو حلو حطي البيبي ينشغل بالالوان واللعب والاصوات ...
له موديلات لاعمار من صفر ,,واعمار من 3 اشهر ومن 6 اشهر



نكتفي حاليا ,, واكيد اذا فيه كم شغله باعرضها
ولسه جزء الكروشات الحلوات

[~* عبق الأنوثة *~]

ألف مبروووك حبيباتي عشقي الآطفال و مس يويو على البنوتات
و يتربوا في عزكم
إن شاء عقبالي أنا بعد أتأكد من جنس البيبي
لآني رحت من يومين لدكتورة تانية عشان أتأكد من انو ولد
قهرتني مستلعنة كشفت على كل شي و مارضت تقولي الجنس
قالت لي احتمال 60% ولد و ماأكدت لي
و الله قهـــــــرررررر
إهئ إهئ إهئ إهئ
لآ تقولي نشوفك الشهر الجاي
قلت في خاطري تحلمين أجي لك مرة تانية
و زوجي قالي خلآص بنبدأ نجهز على إنو ولد
و إن شاء ياربي يكون ولد

[نونييييي]

نعومه تسلم ايديكى على مجهودك الرائع ما شاء الله كفيتى ووفيتى

مس يويو وعشقى ماشاء الله ربنا يباركلكم فى بنوتاتكم وتفرحوا بيهم وهما بحضنكم باذن الله
سفن اخبارك انتى والنونو يارب الدكتورة تقولك بكرة ان وضعك انت والنونو تمام ورجع كمان احسن من الاول وتيجى تبشرينا بكرة بنوعه

انا موعدى بعد اسبوع عند الدكتورة وان شاء الله اعرف النوع انا احساسي انه ولد فيارب يصدق احساسي لكن اذا اراد الله وكانت بنت فالحمد لله من قبل ومن بعد اهم شئ الصحة والصلاح

[na3ooma]

المشاركة الأصلية كتبت بواسطة نونييييي

نعومه تسلم ايديكى على مجهودك الرائع ما شاء الله كفيتى ووفيتى

مس يويو وعشقى ماشاء الله ربنا يباركلكم فى بنوتاتكم وتفرحوا بيهم وهما بحضنكم باذن الله
سفن اخبارك انتى والنونو يارب الدكتورة تقولك بكرة ان وضعك انت والنونو تمام ورجع كمان احسن من الاول وتيجى تبشرينا بكرة بنوعه

انا موعدى بعد اسبوع عند الدكتورة وان شاء الله اعرف النوع انا احساسي انه ولد فيارب يصدق احساسي لكن اذا اراد الله وكانت بنت فالحمد لله من قبل ومن بعد اهم شئ الصحة والصلاح

الله يسلمك , وانا كمان عندي موعد بعد اسبوع مراجعه
باقي موعد الشهر السادس وبعدها حتكون مواعدينا كلنا كل اسبوعين ..
لازم مرتين في السابع , ومرتين في الثامن ...ولما ندخل التاسع موعد اسبوعي لحد الولادة

يارب اولد من اوله طفشت كل ولادة اخلص التاسع < فيس اتعقد

[نونييييي]

نعومه حتى انا نفسي على نصف التاسع بالكتير اكون والدة مع ان ببناتى باخذ اسبوع بالعاشر ومحمد ولدته اخر يوم بالتاسع

[na3ooma]

انا ولدي اخر يوم في التاسع
وبنتي خامس يوم في العاشر هههههههههههههه
وبنتي اللي بعدها قبل مااخلص التاسع بخمسة ايام ,,يعني برضو اخر اسبوع
لما قلت كدا للدكتورة اللي متابعتني قالت الجاي اكيد زيهم

[نونييييي]

لا لا تقولى نعومه يعنى ما فى امل انى اولد بدرى يارب رحمتك بس شوفى انا مستعدة اولد فى العاشر بس اهم شئ ربنا يرزقنا بهون الطلق وولادة سهله وما نحس بيها واننا نولد طبيعى لان بنتى الاخيرة ولدتها قيصرى وتعبت بالخياطه جدا بعد الولادة