&*&تجمع أمهات المستقبل للمقدمات والمنتظرات نتيجة أطفال الأنابيب والحقن المجهري&*&

[لؤلؤة السعاده]

زوجة عبود بالعكس قولي الحمدالله فيه ناس مايرجعون لهم الاجنين واحد
اول مره سويت أنابيب رجع لي اربع اجنه وسبحان الله فشلت العمليه
وأنا الآن في ال14 من الترجيع ولا ادري حتى كم جنين رجعوا لي متخيله😁
انا استغربت كيف عدت على الدكتور بس قلت خيره من رب العالمين ولاراح نسأل كم ًنتكل على الله وننتظر إلى يوم التحليل
والله يثبتهم يااااارب ❤❤❤

[زوجة عبود]

ابتسامه رغم الالم - كارو- لؤلؤة السعادة
مشكورين على الرد
بس انا والله زعلانه لأن الدكتوره زودتلي المنشطات عن المرة الاولى اللي سويتهاوكانت خمس بويضات ومارجعولي الا وحده من الدرجه الثانيه وطبعا فشلت العمليه فزودتلي هذي المره عشان تطلع اكثر بويضات
ادعولي انها تتلقح كلها او ثنتين واجيب تؤام

[ابتسامه رغم الالم]

الله يبارك لك بالبويضات وتتلقح ويكتب لك فيها الذريه الصالحه

اللهم يا واحد يااحد يافرد ياصمد ان ترزق اختي ام عبودي وتجعلها فرحه لا يعادله شي وترزقها بالتوئم الصالحين الناصحين يارب العالمين

[ابتسامه رغم الالم]

لؤلؤه الله يرزقك بالذريه ياااااااااااااااااااااارب تكوني حااااااامل يارب يارب

لاتنسي تخبرينا

وانتي فين عملتي عمليتك

[مرمر قلبه]

مرحباً صبايا
انا عمري 23 ومتزوجة من سنتين ونص ولا انكتبلي الحمل للأسف مع اننا سليمين ولله الحمد
فقررنا انا وزوجي نعمل اطفال انابيب عند دكتورة سهام عكوم بمستشفى سعد التخصصي
وماشيه في التحاليل ويارب تكون العملية سهلة وتفرحنا النتيجة يااااااارب
والله يفرح كل منتظرة للحمل بشوفة أطفالها أصحاء كاملين الخلقة يارب العالمين

[ابتسامه رغم الالم]

اهلا وسهلا فيك اختي والله يتمم لك باقي الخطوات ويرزقك من واسع فضله

[l6oof♥]

السلام عليكم. كيفكم بنات
انا متزوجه من 6 سنوات ولن يحدث حمل وعمري 28سنه
اليوم راح اكتب لكم تجربتي مع اطفال الانابيب بالتفصيل علما باني سويتها مرتين

التجربه الاول فشلت والحمدلله. والتجربه الثانيه قيد الانتضار والله يستر

التجربه الاولى / مكان العمليه مركز الدكتور سمير عباس ف الرياض.
الدكتور / شريف. للاسف ماكان اختياري لان كان ملفي عند الدكتوره منى مصطفى لكن سافرت وتوهقت وماكان عندي خيار
الزمن /قبل سنتين ونصف
تكاليف العمليه / 12 ونص مع التحاليل والادويه
الادويه المنشطه وقت الدوره واستمرت / ابره تحت الجلد كل ثلاث ايام وابره تحت العضل يوميا 2 بودره و2 سائل
وفي الفتره هذي كتب لزوجي فوار يشربه مرتين ف اليوم عالريق وبعد الاكل مه كولوميد واستمرت التنشيط لمدة اسبوعين مع ايام الدوره وبين كل ثلاث ايام موعد سونار يشوف احجام البويضات وبعدها عطاني ابره تفجيريه 12 بالليل واكون صايمه
وقت السحب / بعد الابره التفجيريه من بكرى الصباح الساعه 9 الحضور ودخلوني الغرفه الخاصه وعطوني لباس العمليه وانتضرت كثير وكنت خايفه عطتني السستر ابره مهدئه مع المغذي
مكان العمليه / طبعا ف التخصصي الطبي لا مافيه مجال يسونها عندهم المكان مايسمح وكان بصراحه المستشفى جدا راقي وخصوصا غرفهم
كم بويضه وكم تلقح منها / تم سحب 10 بويضات وتلقح 4.
طبعا بعد ماطلعوني من غرفة العمليات حطوني بالملاحضه نصف ساعه
بعد ماراح البنج الالام كانت مره قويه اسفل البطن الارحام ومكان المبايض لدرجه كنت وانتم بكرمه ماقدر امسك نفسي
رحت للبيت
وقت الترجيع / بعد يومين من السحب وكنت تعبانه مازال الالم موجود وكانت نفس الطريقه بس من دون بنج زي الكشف الداخلي بس انا ماكنت ادري ان لازم اعبي المثانه وقت الترجيع هو الدكتور عبى المثانه وكنت حاسه انها بتنفجر 10 دقايق وطلعوني للملاحضه نص ساعه وقالي مافيه حمام وانتم بكرتمه من بعد 4 ساعات وكنت مره بنفجر سوى لي قصدره وبعدها ودوني للغرفه وجلست لين المغرب وطلعت
التعليمات اللي وصاني الدكتور فيها / 24 ساعه على ضهري الحمام وانتو بكرامه للضروره تجنب الكحه والعطاس والجماع وطلوع الدرج لمدة اسبوعين وبعدها احلل
الاعراض مابعد ترجيع الاجنه/ 1 2 3 4 ايام الترجيع الم ف ارحام واتوقع سبب فشل العمليه انه استعجل بترجيع الاجنه والرحم لساته مارتاح وبعدها ماحسيت باي اعرض ابدا غير 11 او 12 يوم من ترجبع الاجنه نزل معي دم احمر خفيف جدا وانتضرت يومين وحللت رقمي وماصار فيه حمل والحمد لله وبعد يومين نزلت الدوره اتمنى اني افدتكم. والتجربه الثانيه انشاء الله بكره

[كارو]

مرمر ولطوف اهلا وسهلا فيكم وربي يرزقكم بالقريب العاجل احلى ذرية طيبة يا رب

لطوف استهدي بالله وتوكلي عليه انشالله هالمرة تزبط يا رب بشرينا حبيبتي

[l6oof♥]

المشاركة الأصلية كتبت بواسطة كارو

مرمر ولطوف اهلا وسهلا فيكم وربي يرزقكم بالقريب العاجل احلى ذرية طيبة يا رب

لطوف استهدي بالله وتوكلي عليه انشالله هالمرة تزبط يا رب بشرينا حبيبتي

ان شالله يارب

[زوجة عبود]

اختي ابتسامه رغم الالم مشكوره حبيبتي على الدعوه الحلوه
ولك بمثل مادعيتيلي يارب وباقي البنات
لطوف بشرينا عن النتيجه يارب تطلعين حامل وانا مثلك هذي ثاني تجربة ويارب نطلع كلنا حوامل
مرمر قلبه يارب يسهلك العمليه وتنجح من اول مره