انا بكدب علي الدنيا كلها

[عيون القلب]

السلام عليكم اخواتي

انا هدخل في الموضوع علي طول مشكلتي هي الصلاه.....عارفه انها مشكله ناس كتير بس الموضوع باختصار انا عندي 30 سنه متجوزه من 5 سنين وزوجي قمه في الاخلاق والاحترام وعمره مابيفوت فرض بس المشكله فيا اناااااااااااااااا وانا صغيره بابا كان بيقولي صليتي اقوله اه صليت وابقي بكدب عليه كنت اروح الحمام اتوضي الاقي نفسي واقفه بمنتهي البرود والكسل ومش قادره حتي افتح الحنفيه اروح خارجه تاني م الحمام داخله اوضتي ومنعكشه الاسدال قال يعني صليت وفضلت ع الحال ده كتير يوم اصلي و5 شهور لاء واحيانا كنت بقول اني عندي البريود عشان ماصليش انا فعلا قلبي مكسور من جوا لاني انسانه في منتهي الادب والاخلاق في معاملتي مع الناس لدرجه ان اخت جوزي قالتلي ف يوم والله بالحرف انا مستخسراكي بجد في عدم الصلاه خساره واحده زيك ماتكونش بتصلي طبعا ببقي في نص هدومي ومش عارفه انطق كلمه .... جينا السعوديه من سنتين واول حاجه جوزي عملها انه خلاني احج علي امل انه يغير فيا عدم صلاتي جيت اول اسبوع بعد الحج ايييييييييه الهمه عاليه بعد كده وبقيت نفس اللي كنت بعمله مع بابا بعمله مع جوزي صليتي اه صليت ياحبيبي الاول مكنتش برضي اكدب بقول معصيه واحده احسن من اتنين يعني مصليش بس احسن من اني مصليش واكدب كمان فكنت بقول الحقيقه لاء مش صليت يقاطعني ويخاصمني ومايرضاش يكلمني يقولي انا هاتحاسب عنك يوم القيامه مع اني كبيره وناضجه ومسئوله عن نفسي بس هو مقتنع انه هايتحاسب عني لو انا مصليتش المشكله اني بحلم كتير جدااااااااااااااااا اني بموت وانا مثلا بقع من علي كوبري او دور عالي و أقع في البحر الحلم ده بيتكرر معايا كتير اوي وتفسيره عرفت ان الانسان ده بيكون غرقان في المعاصي وانه لاسمح الله هايموت وهو مش بيطيع ربنا ربنا يرحمنا ويرحمكم جميعا معلش طولت عليكم اعمل بس النهارده وكالعاده جوزي قالي صليتي الفجر قلتله اه راح لقي الاسدال والمصليه زي ماكان حاططهم بايده امبارح قالي الاسدال ماتحركش من مكانه قلتله لاء منا لبسته ورجعته تاني قالي بنفس الوضع وفي نفس المكان تنحت وسكت قالي صليتي قلتله اه والله صليت وانا عمري مابحلف كدب والله خالص معرفش ازاي قدرت انطقها والله وانا بكدب بص في عيني وقالي لو كدبتي عليا متكدبيش علي ربنا مع السلامه وراح خارج رايح الشغل المشكله اني كل مابنوي ببقي واثقه ومتأكده اني هابطل في النص وعمري ماهكمل انتظام في الصلاه دلوقتي الشيطان عمال يلعب في دماغي هو يتحكم فيكي ليه ماكل حد حر يعمل اللي هو عايزه هو انتي صغيره ده انتي 30 سنه اما يجي زعقيله وقوليله انت اللي بتضطرني اني اكدب ماتسألنيش تاني عشان ماتحرجش احراج الصبح .....انا مش عارفه اعمل ايه وصدقوني والله العظيم بقعد اشجع نفسي واقول كل يوم هو يوم جديد واهم جهاد هو جهاد النفس وكلام كتير وفي الاخر الاقي نفسي واقفه بمنتهي البرود واللامبالاه والفرض وقته يخلص وانا محلك سرررررررررررررررر