الله على كل شي قدير (قصتي مع العلاج)

[lovesmoosa]

بسم الله الرحمن الرحيم
السلام عليكم ورحمة الله وبركاته
(الجزء الثاني)
قررت أني وزوجي أنروح لدكتور متخصص في علاج العقم هو ما صدق تحليل ورى تحليل وأشعة وأدويه وأبر وكان زوجي يتذمر من كمية الأبر إلي إستمرت لمدة سنه وكنت أصبره على طول وقول له كون قوي
خلص كورس الأبر والدواء وأخيرا(اللي قبل لا ياخذه أكد ليه الدكتور بتكون نتيجة التحاليل كليش مختلفه عن قبل)
قال لينا لازم ننتظر ثلاثة شهور عشان نسوي تحليل عشان الأدويه تعطي مفعولها
وصبرنا كنا أنعد الساعات والأيام عشان يجي هذا اليوم اللي فيه التحليل لأني أحاتي التحليل من صوب والأسئله اللي ما يملون منها الناس من صوب ثاني
مرت الأيام و جاء اليوم إلي ننتظره وكنت متفائله أني وزوجي أخذنا التحليل ونتظرنه النتيجه وكانتتخيلو ما تغير شي للحين صفر عصب زوجي وراح للدكتور وكان ناوي الشر لكن الدكتور ألسانه معسول وهدأه وقال ليه بيحتاج لأشعة ليتأكد أن الخصيتين سليمتين توه متذكر حضرة الدكتور
أني في هل وقت قلت لزوجي نروح لدكتور غيره
لكنه أصر على مواصله معاه لأنه أحسن دكتور في هذا المجال
سوينا الأشعة وكانت صدمه ثانيهلأن كانت النتيجه أن الخصيتين فيهم دوالي وقرر إليه عمليه وسوى العمليه وظل زوجي بروحه في المستشفى (عشان لحد يحس بالموضوع) وأني أحاتيفي البيت
رخصوا ثاني يوم من العمليه وكنت على أعصابي والحمد لله كان يقدر يسوق بس كان ما يقدر يمشي عدل
راح للدكتور بعد شهر عطاه كورس ثاني يحسن من أداء الخصيتين وهو عبارة عن أبر وأدويه لمدة 6شهور وبعد العلاج ياخد عينه
مسكين كان يعور قلبي لأن كانت العمليه للحين ما خفت وكان يداوم ويخذ الأبر وكانت الأبر مؤلمه مرت 6شهور والحمد لله كان صبور مسكين
ويوم التحليل راح وسوى تحليل وكانت النتيجه وراح للدكتور عشان يناقش معاه النيجه إلهو يقول الدكتور يمكن ويمكن تخيلو دكتور يقول يمكن
من بعد هذا التحليل قرر عدم الذهاب لهذا الدكتور
ظلين سنه كامله بدون علاج خبركم النفسيه كانت متحطمه والحاله الماديه متدهوره فقررنا أنريح
وبعدها سأل زوجي عن دكتور أقل كفائه من السابق وأخذ عنده موعد وكانت مواعيده بعيده لكن كان صادق مع زوجي وقال ليه لازم يخذ خزعه من الخصيه عشان يتأكد ويش المشكله في الخصيه وعشان يتأكد يوجد في الخصيه حيوانات منويه ولا لا وسأله زوجي عن العلاج اللي أخذه أعني الأبر والأدويه فقال ليه هذا العلاج مو لحالتك طلع الدكتور الأولي مادي وجذاب
المهم سوى العمليه وكانت النتيجه أن الخصيتين يوجد بهم تلف كبير في الخلايابنسبه أكبر من 90% لكن يوجد خبر مفرح لكن لم نكترث به وهو أنه يوجد حيوانات قليله جدا في داخل الخصيه يمكن نسوي أطفال الأنابيبوكنا ننظر لأطفال الأنابيب بنظره (أن الطفل اللي بجي مادري شلون تفكير مال لول)
فقررنا أنه ما نبغي عيال خلاص
إلى اللقاء في الجزء الثالث ياترى بنعمل أطفال أنابيب ولا لأيا زعم تشويق ههههههههههه
إن شاء الله بكتبه بأسرع وقت ممكن
مع السلامه
أدعو لي ولكل محروم بالذريه الصالحه

[يارحمة الله الواسعه]

شووووقتيني

الله يفرج الهم

والله يرزق كل محروم

[في صمتيے..گلام]

انتظرك كملي مره شوقتيني اعرف النهايه ..

الله ييسير لك امورك ..

[فداء123]

لالالالالالالا حراااااااااااااااااااااااااااااام لازم تكملين القصه كلها المره الجاااااااااايه ما اقدر استنى اهئ اهئ ما احب الانتظار

[حوريه السعوديه]

وربي اقرأ وابكي اخاف زوجي يمر باللي مر فيه زوجج لان حيواناته صفر وزوجي خلقه للحين يقول انا مافيني شي ومنكر لمرضه الله يستر بس

[ام وسونة]

حراااااااااام عليك وين باقي القصة

[يارحمة الله الواسعه]

ووووين التكمله الله يرزقك ياارب

[lovesmoosa]

بسم الله الرحمن الرحيم
سلام عليكم
كيف الحال إن شاء الله بخير
حبيباتي أني اليوم تعبانهبس أني وعدتكم ولازم أوفي مسامحه على التأخير وشكرا لكل المهتمات بموضوعي
ببدأ بدعاء للعروسات المحرومات
اللهم أرزق كل محروم بالذريه الصالحة عاجلا غير أجل
إن شاء الله ما تمر هل سنه ألا وكلناحوامل وسنه الجاية في حضنه البيبي نايم
إن الله قادر على كل شي
وشكرا لكل العروسات المهتمين بموضوعي
تدرون هاذي ثاني مره أكتب هل كلام لأن الكمبيوتر ما أدري ويش فيه
(عاد بسش هذي كلها مقدمه حضرتي مهستره شوي كل هذا وتقول شوي)
(الجزء الثالث)
مرت سنتين وأحنا مصرين ورافضين فكرة أطفال أنابيب
وكنت أعاني أني وزوجي من كل اللي حاولينه
تخيلوا أصدقائه دائما يقولون له روح تزوج عليها (لأن يعتقدون أن مني المشكله) قداميعيني عينك
فكرنا أنروح لمركز أعشاب معروف
وبالفعل رحنا ووصف لينه (أني وزوجي) الدكتور اللي هناك حبوب وشاي (أعشاب)وقال لينه أن هذا الدواء يخلص الجسم من السموم وينشطه وناس واجد صار عندهم عيال بعد ما كان ميؤس من حالتهم
وبعد 6 شهور نسوي تحليل إذا ما فاد نواصل لمده سنه
مرت 6شهور وسوينه تحليل بس كانت النتيجه سلبيه(الحمد لله على كل شي)
لكن كنت أني وزوجي نحس بتحسن يعني نحس بنشاط وصارت مناعتنه أقوى
مرت السنه وسوينه تحليل لكن النتيجه سلبيه
زوجي وأني ملينه وقررنه نوقف العلاج
لأن كان العلاج مكلف فتخلخلت الميزانيه وتعبت نفسيتنه وقالنا نرتاح شوي ونرد ندور عن حل
ياترا بلاقي حل ولا لا
إلا اللقاء في الجزء الرابع
أبغي تفاعل عروسات يعني ألا تدخل على الأقل
دعوه حلوه مثلها
مع تمنياتي للجميع بالتوفيق
أسألكم الدعاء

[زهرة البنفسج]

الله يرزقك وكل محرومه من المسلمين يااااارب

[يارحمة الله الواسعه]

الله يرزقك ويرزقنا يااارب

الجزء الرابع اكتبي واااااجد ههههههه

متشووقه للقصه